Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Indi Malipatan nga Biyahe

Indi Malipatan nga Biyahe

Kada tuig, linibo ang naga-tour sa mga pasilidad sang sanga talatapan sa United States kag sa ulong talatapan sang mga Saksi ni Jehova sa New York State. Ini nga mga lugar ginatawag nga Bethel, isa ka Hebreo nga ngalan nga nagakahulugan, “Balay sang Dios.” Ang mga bisita halin sa malapit kag malayo nga mga lugar nagakadto para makita ang paghimo sing mga literatura, matun-an ang pag-organisar sang amon hilikuton, kag mabisitahan ang ila mga abyan nga nagaalagad diri. Ang isa sa mga bisita sining karon lang determinado gid nga makakadto diri.

Si Marcellus, isa sa mga Saksi ni Jehova nga taga-Anchorage, Alaska, U.S.A. Na-stroke sia sang nagligad nga mga tuig, gani pila lang ka tinaga ang iya mahambal. * Naga-wheelchair sia kag kinahanglan buligan sa iya adlaw-adlaw nga hilikuton. Bisan pa amo sini ang iya sitwasyon, gusto gid niya nga makakadto sa Bethel. Sining karon lang, natuman gid niya ini nga handum.

“Desidido gid sia,” siling ni Corey, amigo ni Marcellus nga nagbulig sa iya sa pagplano sini nga biyahe. “Pirme niya ako ginatawgan kon ano na ang plano. Bangod halos ‘Huo’ lang kag ‘Indi’ ang mahambal ni Marcellus, kadamo sang dapat ko ipamangkot sa iya kon magtawag sia.” Ang ila pag-istoryahanay daw pareho sini:

“Gusto mo makadto ko da?”

“Indi.”

“Gusto mo tawgan ko imo doktor?”

“Indi.”

“Parte bala ini sa imo pagkadto sa Bethel?”

“Huo.”

“Dayon isugid ko sa iya kon ano na ang akon nahimo sa amon plano. Nalipay gid ako nga natuman niya ang iya handum.”

Madamo gid nga kabudlayan ang naatubang ni Marcellus para makabiyahe. Bangod diutay lang ang iya kita, duha ka tuig sia nga nagsupot para may igasto sia sa 5,400 kilometros nga biyahe pakadto sa New York. Bangod sang iya pisikal nga limitasyon, kinahanglan pa nga may responsable nga mag-upod sa iya. Dayon, kinahanglan ang sertipikasyon halin sa iya doktor nga puede sia makabiyahe, kag nakuha niya ini pila na lang ka adlaw antes sang iya iskedyul nga maglakat.

Pag-abot ni Marcellus sa New York, gin-updan sia sang tour guide sa pag-tour sa mga pasilidad sa Brooklyn, Patterson, kag Wallkill. Nakita niya ang dalagku nga mga imprintahan sang mga libro kag Biblia kag nahibaluan niya kon ano ka organisado ang hilikuton diri. Nakita man niya ang eksibit nga “The Bible and the Divine Name” kag “A People for Jehovah’s Name.” Sa iya pag-tour, may nakilala sia nga bag-o nga mga abyan. Isa gid ini ka indi malipatan nga biyahe!

Madamo ang nagsiling nga kulang ang mga tinaga para ilaragway ang ila pagkadto sa Bethel. Pero sang ginpamangkot si Marcellus kon bala nalipay sia sa iya pagkadto sa Bethel, nagsabat sia, sa mga tinaga nga mahambal niya: “Huo. Huo. Huo!”

Ang pagkadto sa Bethel makapalig-on gid sa imo kag sa imo pamilya, subong nga nakapalig-on ini kay Marcellus. Ang mga bisita ginaabiabi sa amon mga sanga talatapan sa bilog nga kalibutan. Ginaagda ka namon nga magkadto diri.

^ par. 3 Napatay si Marcellus sang Mayo 19, 2014, samtang ginahanda ini nga artikulo para sa publikasyon.

Magtuon sing Dugang Pa

Ano ang Bethel?

Ang Bethel isa ka pinasahi nga lugar nga may tuman ka importante nga katuyuan. Kilala sing dugang ang mga nagaobra didto.

Ano ang Ginahimo sa Sanga Talatapan?

Ang mga bisita mahimo mag-tour sa bisan diin nga sanga talatapan. Ginaagda namon kamo nga magbisita!