Magdiretso sa kaundan

Magdiretso sa secondary menu

Mga Saksi ni Jehova

Hiligaynon

Paglab-ot sa 60 ka Adlaw nga Deadline

Paglab-ot sa 60 ka Adlaw nga Deadline

Sang Biernes, Hulyo 5, 2013, nalipay gid ang pamilya Bethel sa United States sang mabatian nila si Anthony Morris nga miembro sang Nagadumala nga Hubon, nga nagpahibalo: “Ginkasugtan na nga ibaligya ang anom ka bilding sa 117 Adams Street kag 90 Sands Street sa Brooklyn. * Para mabaligya ang Bilding 1 asta 5, dapat bakante na ini sa tungatunga sang Agosto sini nga tuig.”

Maathag nga daku gid ini nga proyekto. Kon takson ang kalaparon sang kada panalgan sining lima ka bilding, katumbas ini sa 11 ka soccer field para sa internasyonal nga mga hampang! Kag dapat bakante na ini sa sulod sang 60 ka adlaw!

Sa sulod sang mga dekada, ara sa Bilding 1 asta 5 ang mga imprintahan kag mga makinaryas para sa pag-bookbind. Pero sang 2004, ginsaylo ini sa Wallkill, New York.

Sugod sadto, ini nga mga bilding ginhimo nga talaguan kag pasilidad para sa maintenance. Diri ginabutang ang mga materyales para sa konstruksion, kagamitan sa opisina, kag mga makinaryas nga ginagamit sa mga proyekto sa pagpanukod sa United States kag iban pa nga pungsod.

Para mahawanan ang mga bilding sa sulod sang gintalana nga panahon, kinahanglan ang maid-id nga pagplano. Una, gin-imbentaryo ang unod sang mga bilding para mabal-an kon ano ang ibaligya, ihaboy, ukon gamiton pa. Dayon, may mga kahimusan para mahimo ini sa paagi nga madasig kag luwas sa katalagman.

Nagpangabudlay gid ang pamilya Bethel para masuportahan ini nga proyekto. Nagpatawag man sila sing 41 ka temporaryo nga boluntaryo para magbulig. Ang mga boluntaryo naghalin sa madamo nga bahin sang United States. Ang kalabanan sa ila mabakod, pamatan-on, kag di-minyo nga mga lalaki. Ginbaton nila ang pangagda nga magboluntaryo sa sulod sang anom asta napulo ka semana kag biyaan ang ila mga pamilya, abyan, kag mga trabaho para makabulig sa Bethel. Ano ang ila ginsiling parte sa ila asaynment?

Si Jordan nga 21 anyos naghalin sa Washington State. Nagsiling sia: “Tani sadto pa ako nag-aplay.”

Ang 20 anyos nga si Steven taga-Texas. Nagsiling sia: “Pamatyag ko, bahin ako sang isa ka daku, mapisan, kag malipayon nga pamilya nga may mga miembro sa bisan diin nga bahin sang kalibutan.”

Si Justin nga 23 anyos nagsulat: “Kasahu gid ako diri sa Bethel. Dalayawon gid ang espirituwal nga kaalam, gugma, kag paghiliutod diri.”

Si Adler nga 20 anyos halin sa Puerto Rico, nagsiling: “Nabudlayan gid ako magbugtaw sing aga pa, pero may bag-o ako nga mga abyan diri, kag kabalo ako nga ang amon pag-abyanay asta san-o.”

Ang 21 anyos nga si William, nagsiling: “Halin sang gamay ako, handum ko gid nga magpa-Bethel. Abi ko masubuan ako diri ukon magaisahanon, pero indi gid gali. Ang Bethel ang pinakamaayo nga naeksperiensiahan ko! Para sa akon, wala na sing mas maayo pa diri.”

Nalab-ot bala sang team ang ila deadline? Huo—sa sulod lang sang 55 ka adlaw.

^ par. 2 Ang bilding sa 90 Sands Street bakantehon sa 2017.