Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ngaa Wala Kamo Nagapatughong sang Dugo?

Ngaa Wala Kamo Nagapatughong sang Dugo?

Sayop nga mga pagpati

Pagpati sang iban: Ang mga Saksi ni Jehova wala nagatomar sang bulong ukon nagapabulong.

Kamatuoran: Ginapangita namon ang pinakamaayo nga paagi sang pagbulong para sa amon kag sa amon pamilya. Kon magmasakit kami, nagakadto kami sa mga doktor nga nagapasugot nga magbulong kag mag-opera nga wala nagagamit sang dugo. Ginapabaloran gid namon ang pag-uswag sa medisina. Ang matuod, ang mga pagbulong nga wala sang dugo nga ginhimo para sa Saksi nga mga pasyente, ginagamit man subong sa iban nga pasyente. Sa madamo nga pungsod, ang bisan sin-o makapili na nga indi magpatughong sang dugo para malikawan ang mga risgo sini pareho sa paglaton sang balatian, reaksion sang immune system, kag pagsala sang mga nagatughong.

Pagpati sang iban: Ang mga Saksi ni Jehova nagapati nga ang pagtuo makapaayo sang balatian.

Kamatuoran: Wala kami naga-faith healing.

Pagpati sang iban: Daku ang gasto kon indi magpatughong sang dugo.

Kamatuoran: Ang mga pagbulong nga wala nagagamit sang dugo mas barato. *

Pagpati sang iban: Madamo nga Saksi, pati mga bata, ang nagakapatay kada tuig bangod wala nagpatughong sang dugo.

Kamatuoran: Wala gid ini sing basihan. Ang mga doktor regular nga nagahimo sing komplikado nga mga operasyon sa tagipusuon, sa tul-an, kag pag-transplant sang mga organo nga wala nagatughong sang dugo. * Ang mga pasyente, pati ang mga bata, nga wala gintughungan sang dugo masami nga maayo ukon mas maayo pa ang kahimtangan sangsa mga nagpatughong. * Gani, wala sing makasiling nga ang pasyente mapatay kon indi sia magpatughong sang dugo, ukon sigurado nga mabuhi kon magpatughong sia.

Ngaa wala nagapatughong sang dugo ang mga Saksi ni Jehova?

Indi ini isyu parte sa medisina kundi may labot ini sa pagsimba. Maathag nga ginsugo kita sang Daan kag Bag-ong Testamento nga maglikaw sa dugo. (Genesis 9:4; Levitico 17:10; Deuteronomio 12:23; Binuhatan 15:28, 29) Isa pa, para sa Dios, ang dugo nagarepresentar sang kabuhi. (Levitico 17:14) Gani, wala kami nagapatughong indi lamang bangod ginatuman namon ang Dios, kundi bangod ginatahod man namon sia subong Manughatag sang kabuhi.

Pagbag-o sang pagtamod

Ang komplikado nga mga operasyon mahimo magmadinalag-on bisan indi magtughong sang dugo

Sang una, ginatamod sang medisina ang paglikaw sa pagpatughong sang dugo nga indi makatarunganon, ukon paghikog pa gani. Pero nagbag-o na ini. Halimbawa, sang 2004, ang isa ka artikulo sa dyurnal parte sa medisina nagsiling nga “madamo nga paagi sa pagbulong sa mga pasyente nga Saksi ni Jehova ang mangin kinaandan na nga paagi sang pagbulong sa iban.” * Ang isa ka artikulo sa Heart, Lung and Circulation nagsiling sang 2010 nga “‘ang pag-opera nga wala nagatughong sang dugo’ dapat indi lamang para sa mga [Saksi ni Jehova] kundi amo dapat ang himuon sang mga doktor sa tanan nila nga operasyon.”

Linibo ka doktor sa bilog nga kalibutan ang nagagamit na subong sang blood-conservation techniques para sa komplikado nga mga operasyon nga wala nagatughong sang dugo. Ginagamit naman ini nga mga paagi sa nagauswag pa lang nga mga pungsod kag madamo nga pasyente nga indi Saksi ni Jehova ang nagapangabay nga amo man ini ang gamiton sa ila.

^ par. 8 Tan-awa ang Transfusion and Apheresis Science, Volume 33, Num. 3, pahina 349.

^ par. 10 Tan-awa ang The Journal of Thoracic and Cardiovascular Surgery, Volume 134, Num. 2, pahina 287-288; Texas Heart Institute Journal, Volume 38, Num. 5, pahina 563; Basics of Blood Management, pahina 2; kag Continuing Education in Anaesthesia, Critical Care & Pain, Volume 4, Num. 2, pahina 39.

^ par. 10 Tan-awa ang The Journal of Thoracic and Cardiovascular Surgery, Volume 89, Num. 6, pahina 918; kag Heart, Lung and Circulation, Volume 19, pahina 658.

^ par. 14 Continuing Education in Anaesthesia, Critical Care & Pain, Volume 4, Num. 2, pahina 39.

 

Magtuon sing Dugang Pa

Ano ang Ginasiling sang Biblia Parte sa Pagpatughong sang Dugo?

Suno sa Biblia, ang Dios nagsugo nga ‘maglikaw sa dugo.’ Paano ini naaplikar sa aton subong?