Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano ang Ginapatihan sang mga Saksi ni Jehova?

Ano ang Ginapatihan sang mga Saksi ni Jehova?

Bilang mga Saksi ni Jehova, ginatinguhaan namon nga mangin Cristiano base sa mga gintudlo ni Jesus kag ginhimo sang iya mga apostoles. Ginasumaryo sini nga artikulo ang amon panguna nga mga ginapatihan.

  1. Dios. Ginasimba namon ang lamang matuod kag Labing Gamhanan nga Manunuga nga si Jehova. (Salmo 83:18; Bugna 4:11) Sia ang Dios ni Abraham, ni Moises, kag ni Jesus.Exodo 3:6; 32:11; Juan 20:17.

  2. Biblia. Ginakilala namon nga ang Biblia amo ang ginpasulat sang Dios nga mensahe para sa mga tawo. (Juan 17:17; 2 Timoteo 3:16) Ginabase namon ang amon mga ginapatihan sa tanan nga 66 ka libro sini, nga nagalakip sang “Daan nga Katipan” kag “Bag-ong Katipan.” Si Propesor Jason D. BeDuhn nagsulat nga ginabase sang mga Saksi ni Jehova “ang ila pagpati kag mga buhat sa ginasiling mismo sang Biblia nga wala ginapilit ang ila kaugalingon nga pagpati.” *

    Ginapatihan namon ang bilog nga Biblia, pero nagapati man kami nga ang pila ka bahin sang Biblia ginsulat sing simbuliko kag indi dapat paghangpon nga literal.Bugna 1:1.

  3. Jesus. Ginasunod namon ang mga panudlo kag halimbawa ni Jesucristo kag ginakilala namon nga sia ang amon Manluluwas kag sia ang Anak sang Dios. (Mateo 20:28; Binuhatan 5:31) Gani, mga Cristiano kami. (Binuhatan 11:26) Pero, natun-an namon sa Biblia nga si Jesus indi amo ang Labing Gamhanan nga Dios kag wala nabase sa Kasulatan ang doktrina nga Trinidad.Juan 14:28.

  4. Ang Ginharian sang Dios. Matuod ini nga gobierno sa langit, indi lang kahimtangan sa tagipusuon sang mga Cristiano. Amo ini ang magabulos sa mga gobierno sang tawo kag magatuman sang katuyuan sang Dios sa duta. (Daniel 2:44; Mateo 6:9, 10) Malapit na lang ini matabo, bangod ginapakita sang Biblia nga nagakabuhi na kita sa “katapusan nga mga adlaw.”2 Timoteo 3:1-5; Mateo 24:3-14.

    Si Jesus ang Hari sang Ginharian sang Dios sa langit. Nagsugod na sia sa paggahom sang 1914.Bugna 11:15.

  5. Kaluwasan. Ang kahilwayan gikan sa sala kag kamatayon nangin posible paagi sa halad gawad ni Jesus. (Mateo 20:28; Binuhatan 4:12) Para makabenepisyo ang mga tawo sa sini nga halad, dapat indi lang sila magtuo kay Jesus kundi kinahanglan nila bag-uhon ang ila pagkabuhi kag magpabawtismo. (Mateo 28:19, 20; Juan 3:16; Binuhatan 3:19, 20) Ang binuhatan sang isa nagapamatuod nga buhi ang iya pagtuo. (Santiago 2:24, 26) Pero ang kaluwasan mabaton indi lang paagi sa pagpangabudlay, kundi bangod sa “wala tupong nga kaayo sang Dios.”Galacia 2:16, 21.

  6. Langit. Si Jehova nga Dios, si Jesucristo, kag ang matutom nga mga anghel nagaistar sa duog sang mga espiritu. * (Salmo 103:19-21; Binuhatan 7:55) Pila lamang ka tawo—144,000—ang pagabanhawon pakadto sa kabuhi sa langit agod maggahom kaupod ni Jesus sa Ginharian.Daniel 7:27; 2 Timoteo 2:12; Bugna 5:9, 10; 14:1, 3.

  7. Duta. Gintuga sang Dios ang duta para istaran sang mga tawo sing wala sing katapusan. (Salmo 104:5; 115:16; Manugwali 1:4) Pakamaayuhon sang Dios ang matinumanon nga mga tawo sing perpekto nga panglawas kag kabuhi nga wala sing katapusan sa paraiso nga duta.Salmo 37:11, 34.

  8. Kalautan kag pag-antos. Nagsugod ini sang nagrebelde ang isa ka anghel sang Dios. (Juan 8:44) Ini nga anghel, nga gintawag nga “Satanas” kag “Yawa” pagkatapos sia magrebelde, naghaylo sa una nga mag-asawa nga magbuylog sa iya, kag nangin malain gid ang resulta sini sa ila mga kaliwatan. (Genesis 3:1-6; Roma 5:12) Para masolbar ang isyu nga ginpautwas ni Satanas, gintugutan sang Dios ang kalautan kag pag-antos, pero indi Niya pagtugutan nga magapadayon ini asta san-o.

  9. Kamatayon. Ang mga tawo nga napatay wala na nagaluntad. (Salmo 146:4; Manugwali 9:5, 10) Wala sila nagaantos sa kalayuhon nga impierno.

    Buhion liwat sang Dios ang binilyon nga napatay paagi sa pagkabanhaw. (Binuhatan 24:15) Pero, ang mga ginbanhaw nga indi magsunod sa mga ginapatuman sang Dios pagalaglagon sing dayon kag indi na pagbanhawon pa.Bugna 20:14, 15.

  10. Pamilya. Ginasunod namon ang orihinal nga talaksan sang Dios sa pag-asawahay nga amo ang paghiusa sang isa ka lalaki kag sang isa ka babayi, nga ang lamang basihan sang pagbulagay amo ang seksuwal nga imoralidad. (Mateo 19:4-9) Kumbinsido kami nga ang kaalam nga makita sa Biblia makabulig nga magmadinalag-on ang mga pamilya.Efeso 5:22–6:1.

  11. Ang amon pagsimba. Wala namon ginasimba ang krus ukon ang bisan ano nga imahen. (Deuteronomio 4:15-19; 1 Juan 5:21) Ang pila ka panguna nga bahin sang amon pagsimba amo ang masunod:

  12. Ang amon organisasyon. Gin-organisar kami sa mga kongregasyon, nga ginatatap sang hubon sang mga gulang. Pero, ang mga gulang indi mga klero, kag wala sila ginasuelduhan. (Mateo 10:8; 23:8) Wala kami nagapanukot sang ikapulo ukon diesmos, kag wala sing nagapangolekta sa amon mga miting. (2 Corinto 9:7) Ang tanan namon nga hilikuton ginasuportahan sang mga donasyon.

    Ang Nagadumala nga Hubon, nga isa ka gamay nga grupo sang hamtong nga mga Cristiano nga nagaalagad sa amon ulong talatapan, nagahatag sing mga direksion para sa mga Saksi ni Jehova sa bilog nga kalibutan.Mateo 24:45.

  13. Ang amon paghiusa. Nahiusa ang amon mga ginapatihan sa bilog nga kalibutan. (1 Corinto 1:10) Ginapanikasugan man namon nga indi kami mabahinbahin bangod sa lainlain nga ginhalinan, rasa, kag tindog sa kabuhi. (Binuhatan 10:34, 35; Santiago 2:4) Pero bisan nahiusa kami, may kahilwayan kami sa pagdesisyon. Ang tagsa ka Saksi nagadesisyon base sa iya nahanas sa Biblia nga konsiensia.Roma 14:1-4; Hebreo 5:14.

  14. Ang amon paggawi. Ginapanikasugan namon nga ipakita ang indi maiyaiyahon nga gugma sa tanan namon nga ginahimo. (Juan 13:34, 35) Ginalikawan namon ang mga buhat nga wala ginakahamut-an sang Dios, lakip ang sala nga paggamit sang dugo paagi sa pagpatughong sini. (Binuhatan 15:28, 29; Galacia 5:19-21) Mahidaiton kami kag wala kami nagaentra sa inaway. (Mateo 5:9; Isaias 2:4) Ginatahod namon ang gobierno sa amon pungsod kag ang ginapatuman nga mga kasuguan sini basta indi ini supak sa mga kasuguan sang Dios.Mateo 22:21; Binuhatan 5:29.

  15. Ang amon kaangtanan sa iban. Si Jesus nagsugo: “Higugmaa ang imo isigkatawo subong sang imo kaugalingon.” Nagsiling man sia nga ang mga Cristiano ‘indi bahin sang kalibutan.’ (Mateo 22:39; Juan 17:16) Gani, ginapanikasugan namon nga ‘himuon ang maayo sa tanan,’ pero wala gid kami nagaentra sa pulitika kag sa mga hilikuton sang iban nga relihion. (Galacia 6:10; 2 Corinto 6:14) Pero, ginatahod namon ang desisyon sang iban parte sina nga mga butang.Roma 14:12.

Kon may mga pamangkot ka parte sa mga ginapatihan sang mga Saksi ni Jehova, puede mo tan-awon ang dugang nga impormasyon sa amon website, kontakon ang isa sa amon mga opisina, magtambong sa miting sa Kingdom Hall nga malapit sa imo, ukon istoryahon ang isa ka Saksi sa inyo lugar.

^ par. 4 Tan-awa ang Truth in Translation, pahina 165.

^ par. 10 Ang malaut nga mga anghel gintabog sa langit, pero nagaluntad gihapon sila sa duog sang mga espiritu.Bugna 12:7-9.

Magtuon sing Dugang Pa

Sin-o ang Founder sang mga Saksi ni Jehova?

Basaha kon ngaa si Charles Taze Russell indi founder sang isa ka bag-o nga relihion.

May Kaugalingon Bala nga Biblia ang mga Saksi ni Jehova?

Mas mapuslanon ang imo pagtuon sa Biblia kon maggamit ka sing sarisari nga translation. May tatlo ka rason kon ngaa ilakip mo ang New World Translation of the Holy Scriptures.

Ngaa Wala Nagaselebrar sang Birthday ang mga Saksi ni Jehova?

Binagbinaga ang apat ka impormasyon parte sa birthday nga nagapakita kon ngaa wala nalipay ang Dios sa sini.

Nagapati Bala ang mga Saksi ni Jehova kay Jesus?

Binagbinaga kon ngaa dapat magtuo kay Jesus ang matuod nga mga Cristiano.

Sin-o Gid Bala ang mga Saksi ni Jehova?

May kilala ka bala nga mga Saksi ni Jehova? Daw ano mo gid bala kami ka kilala?