Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano Kadamo ang mga Saksi ni Jehova sa Bilog nga Kalibutan?

Ano Kadamo ang mga Saksi ni Jehova sa Bilog nga Kalibutan?

Report sa 2015 Tuig sang Pag-alagad *

Kadamuon sang mga Saksi ni Jehova sa bilog nga kalibutan

8,220,105

Kongregasyon

118,016

Kadutaan diin may ginahimo nga pagwali ang mga Saksi ni Jehova

240

Paano ninyo ginaisip ang inyo mga miembro?

Ang ginaisip namon nga mga Saksi ni Jehova amo lamang ang aktibo nga nagawali sang maayong balita sang Ginharian sang Dios kada bulan. (Mateo 24:14) Nalakip sa sini ang bawtismado nga mga Saksi pati man ang mga wala pa mabawtismuhan, pero kalipikado na nga mag-upod sa pagwali.

Dapat bala mag-amot sing kuarta ang isa para mangin miembro?

Indi. Ang donasyon indi kinahanglan para maisip ang isa bilang Saksi ukon para makabaton sing asaynment ukon pribilehiyo sa amon organisasyon. (Binuhatan 8:18-20) Ang matuod, wala mabal-an kon sin-o ang nagahatag sing donasyon. Ang kada Saksi nga nagaamot sang ila tion, kusog, kag kuarta sa amon hilikuton sa bilog nga kalibutan nagahatag sini sing kinabubut-on kag suno sa ila kahimtangan.2 Corinto 9:7.

Paano ninyo mabal-an kon ano kadamo ang aktibo nga nagawali?

Kada bulan, ginareport sang mga Saksi sa ila lokal nga kongregasyon ang ila nahimo nga pagbantala. Ini nga report ginahatag sing kinabubut-on.

Ang mga report sa kongregasyon ginaisip kag ginarekord, kag ang kabilugan sini ginapadala sa lokal nga sanga talatapan. Dayon ginapadala sang sanga ang total nga report sang kada pungsod ukon teritoryo sa amon ulong talatapan.

Sa tapos sang kada tuig sang pag-alagad, * ginahibalo kon pila ang pinakadamo nga Saksi sa kada lugar sina nga tuig. Dayon ginatotal ini para mabal-an kon ano kadamo ang mga Saksi sa bilog nga kalibutan. Ang detalyado nga report sang kada pungsod, pati ang mga eksperiensia sa pagbantala, ginabalhag sa Tuigan nga Libro sang mga Saksi ni Jehova. Ang pareho sini nga mga report nagpalig-on sa mga Cristiano sang una, gani ini nga mga report nagapalig-on man sa amon.Binuhatan 2:41; 4:4; 15:3.

Ginaisip bala ninyo ang mga nagapakig-upod sa inyo organisasyon pero wala nagawali?

Bisan pa wala namon sila ginalakip sa kadamuon sang mga Saksi, ginaabiabi namon sila sa amon mga kongregasyon. Ang kalabanan sa ila nagatambong sa Memoryal sang kamatayon sang Cristo kada tuig, gani mabulubanta kon pila sila ka bilog kon isipon ang diperensia sang kadamuon sang nagtambong sa Memoryal sa kadamuon sang mga Saksi. Sang 2015, ang nagtambong sa Memoryal may kadamuon nga 19,862,783.

Madamo sa mga wala nagatambong sa amon mga miting ang nakabenepisyo sa amon programa nga pagtudlo sang Biblia. Sang 2015, naghiwat kami sing aberids nga 9,708,968 nga pagtuon sa Biblia kada bulan, kag sa iban sini pila ka indibiduwal ang dungan nga ginatudluan.

Ngaa mas madamo ang rekord sang kadamuon sang mga Saksi sa sensus sang gobierno sangsa inyo rekord?

Ang sensus sang gobierno pirme ginahimo paagi sa pagpamangkot sa mga tawo kon ano ang ila relihion. Halimbawa, ang U.S. Census Bureau nagasiling nga sa ila mga surbe “katuyuan nga hibaluon kon bala ang mga tawo nga ginapamangkot nila nagakabig sang ila kaugalingon nga sumulunod sang isa ka relihion,” kag nagdugang pa ini nga ang kadamuon “base lang sa personal nga opinyon imbes sa matuod nga impormasyon.” Sa bahin naman sang mga Saksi ni Jehova, ang ginaisip namon amo ang mga nagawali kag mga nagareport sang ila hinimuan, kag indi lang ang basta nagasiling nga Saksi sila.

^ par. 2 Ang tuig sang pag-alagad nagasugod sa Septiembre 1 asta sa Agosto 31 sa masunod nga tuig. Halimbawa, ang 2015 nga tuig sang pag-alagad nagsugod sang Septiembre 1, 2014, asta sang Agosto 31, 2015.

^ par. 16 Ang tuig sang pag-alagad nagasugod sa Septiembre 1 asta sa Agosto 31 sa masunod nga tuig. Halimbawa, ang 2015 nga tuig sang pag-alagad nagsugod sang Septiembre 1, 2014, asta sang Agosto 31, 2015.

Magtuon sing Dugang Pa

Ano ang Ginapatihan sang mga Saksi ni Jehova?

Hibalua ang 15 sa amon panguna nga mga ginapatihan.

Paano Ginaorganisar sang mga Saksi ni Jehova ang Ila Hilikuton nga Pagbantala?

Ginasunod namon ang sulundan nga ginbilin ni Jesus sang ari sia sa duta. Ano ang pila sang iya paagi sa pagbantala?

Paano Ginaorganisar ang mga Kongregasyon sang mga Saksi ni Jehova?

Hibalua kon paano kami ginahatagan sing panuytoy kag instruksion paagi sa sini nga kahimusan.