Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Nagapati Bala ang mga Saksi ni Jehova sa Daan nga Testamento?

Nagapati Bala ang mga Saksi ni Jehova sa Daan nga Testamento?

Huo. Ang mga Saksi ni Jehova nagapati nga ang bug-os nga Biblia “gintuytuyan sang Dios kag mapuslanon.” (2 Timoteo 3:16) Lakip sa sini ang Daan nga Testamento kag Bag-ong Testamento nga amo ang pagtawag sa sini sang kalabanan. Pero, sa masami ini nga mga bahin sang Biblia ginatawag sang mga Saksi ni Jehova nga Hebreo nga Kasulatan kag Cristianong Griegong Kasulatan. Sa sini nga paagi, indi maggua nga ang iban nga bahin sang Biblia daan na kag indi importante.

Ngaa pareho nga kinahanglan sang mga Cristiano ang Daan nga Testamento kag Bag-ong Testamento?

Sa pagtuytoy sang Dios, ang Cristiano nga si apostol Pablo nagsulat: “Ang tanan nga butang nga ginsulat sadto ginsulat sa pagtudlo sa aton.” (Roma 15:4) Gani, importante para sa aton ang impormasyon nga ara sa Hebreo nga Kasulatan. Kay man, diri naton matun-an ang kasaysayan kag praktikal nga mga laygay nga makabulig sa aton.

  • Kasaysayan nga makabulig sa aton. Mabasa sa Hebreo nga Kasulatan ang detalyado nga rekord sang pagpanuga kag pagpakasala sang tawo. Kon wala ini nga impormasyon, indi naton masabat ang mga pamangkot pareho sang: Diin kita naghalin? Ngaa nagakapatay ang tawo? (Genesis 2:7, 17) Mabasa man sa sini ang pagpakig-angot ni Jehova nga Dios sa mga tawo nga nakaeksperiensia sing mga kadalag-an kag kabudlayan pareho sa aton.Santiago 5:17.

  • Praktikal nga laygay. Ang mga libro sa Biblia nga Hulubaton kag Manugwali, nga ara sa Hebreo nga Kasulatan, puno sing kaalam nga wala nagadaan. May laygay ini kon paano mangin malipayon ang pamilya (Hulubaton 15:17), paano mangin balanse ang pagtamod sa trabaho (Hulubaton 10:4; Manugwali 4:6), kag kon paano mangin malipayon ang mga pamatan-on (Manugwali 11:9–12:1).

Makabenepisyo man kita kon tun-an naton ang Kasuguan nga ginhatag sang Dios kay Moises nga narekord sa Torah (ang una nga lima ka libro sa Biblia). Bisan pa ini nga Kasuguan wala na ginapatuman sa mga Cristiano, ang mga prinsipio sa sini makabulig sa aton nga mangin malipayon.Levitico 19:18; Deuteronomio 6:5-7.

 

 

Magtuon sing Dugang Pa

Ano ang mga Paagi Para Maintiendihan ang Biblia?

Bisan ano man ang imo gindak-an, mahimo mo maintiendihan ang mensahe sang Dios nga ara sa Balaan nga Kasulatan.