Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Nagabulig Bala Kamo sa Tion sang Kalamidad?

Nagabulig Bala Kamo sa Tion sang Kalamidad?

Huo, ang mga Saksi ni Jehova masami nga nagabulig sa tion sang kalamidad. Nagahatag kami sing praktikal nga bulig sa mga Saksi kag indi Saksi, suno sa ginasugo sang Biblia sa Galacia 6:10: “Maghimo kita kon ano ang maayo sa tanan, apang ilabi na sa mga may labot sa aton sa pagtuo.” Nagahatag man kami sing emosyonal kag espirituwal nga suporta sa mga biktima nga nagakinahanglan gid sini.—2 Corinto 1:3, 4.

Organisasyon

Pagkatapos sang kalamidad, ginakontak sang mga gulang sang mga kongregasyon sa apektado nga mga lugar ang mga Saksi agod tan-awon ang ila kahimtangan kag kon ano ang bulig nga ila kinahanglan. Dayon ginareport nila sa lokal nga sanga talatapan sang mga Saksi ni Jehova ang resulta sang ila surbe kag kon ano pa lang ang ila nahatag nga bulig.

Kon indi masarangan sang mga kongregasyon sa lugar ang bulig nga kinahanglan, ang Nagadumala nga Hubon sang mga Saksi ni Jehova nagahimo sing kahimusan para makapadala sing bulig. Amo man sini ang paagi sang una nga mga Cristiano sa pag-atipan sa ila mga kauturan sang may tiggulutom. (1 Corinto 16:1-4) Ang lokal nga sanga talatapan nagatangdo sing Disaster Relief Committee para mag-organisar kag magdumala. Ang mga Saksi sa iban nga lugar nagahatag sang ila tion kag mga pagkabutang para magbulig.—Hulubaton 17:17.

Pundo

Ang iban nga donasyon nga ginapadala sa mga sanga talatapan sang mga Saksi ni Jehova ginagamit sa pagbulig sa mga biktima sang kalamidad. (Binuhatan 11:27-30; 2 Corinto 8:13-15) Ang mga nagabulig sa sini nga hilikuton mga boluntaryo, gani ang pundo direkta nga nagakadto sa mga bululigan, indi sa sueldo sang mga empleyado. Ginatinguhaan gid namon nga magamit sing husto ini nga mga donasyon.—2 Corinto 8:20.