Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ngaa Wala Nagaselebrar sang Birthday ang mga Saksi ni Jehova?

Ngaa Wala Nagaselebrar sang Birthday ang mga Saksi ni Jehova?

Ang mga Saksi ni Jehova wala nagaselebrar sang birthday bangod nagapati kami nga wala nalipay ang Dios sa sini nga selebrasyon. Bisan pa wala sing direkta nga mabasa sa Biblia nga nagadumili sang pagselebrar sang birthday, ginabuligan kita sini nga maathagan parte sa birthday kag maintiendihan ang panan-aw sang Dios sa sini nga okasyon. Binagbinaga ang apat ka impormasyon kag ang mga prinsipio sang Biblia may kaangtanan sini.

  1. Ang pagselebrar sang birthday may pagano nga ginhalinan. Suno sa Funk & Wagnalls Standard Dictionary of Folklore, Mythology, and Legend, ginaselebrar ini bangod sa pagpati nga kon birthday sang isa ka tawo, “ang malaut nga mga espiritu kag mga impluwensia may kahigayunan nga salakayon ang may birthday” kag “ang presensia sang iya mga abyan kag ang ila pagtamyaw sa iya makabulig para indi sia maano.” Ang libro nga The Lore of Birthdays nagasiling nga sang una, ginarekord gid ang birthday bangod “kinahanglan ini para sa horoscope” nga base sa “makatalanhaga nga pagtuon sa astrolohiya.” Nagasiling pa gid ini nga libro nga “ang mga kandila sa birthday, suno sa pagpati, may madyik para matuman ang mga ginapangayo.”

    Pero ginapakamalaut sang Biblia ang paggamit sang madyik, pagpamakot, espiritismo, ukon mga butang nga kaangay sini. (Deuteronomio 18:14; Galacia 5:19-21) Ang matuod, ang isa sa mga rason kon ngaa ginpakamalaut sang Dios ang Babilonia sadto amo ang pagpakigbahin sang mga pumuluyo didto sa astrolohiya, nga isa ka sahi sang pagpamakot. (Isaias 47:11-15) Wala ginaisaisa sang mga Saksi ni Jehova ang ginhalinan sang tanan nga kustombre; pero kon maathag ang ginasiling sang Biblia parte sa sini, wala namon ini ginabalewala.

  2. Ang mga Cristiano sang una wala nagaselebrar sang birthday. Suno sa The World Book Encyclopedia “ang pagselebrar sang kaadlawan sang isa ka tawo isa ka pagano nga kustombre.” Ginapakita sang Biblia nga ang mga apostoles kag ang iban pa nga gintudluan mismo ni Jesus naghimo sing sulundan nga dapat sundon sang tanan nga Cristiano.2 Tesalonica 3:6.

  3. Ang lamang nga selebrasyon nga ginasugo sa mga Cristiano indi parte sa pagkabun-ag, kundi sa kamatayon—ni Jesus. (Lucas 22:17-20) Indi ini katingalahan, kay siling sang Biblia “mas maayo pa . . . ang adlaw sang kamatayon sangsa adlaw sang pagkatawo.” (Manugwali 7:1) Sang katapusan sang iya kabuhi sa duta, si Jesus nakahimo sang maayo nga ngalan sa Dios, gani ang adlaw sang iya kamatayon mas importante sangsa adlaw sang iya pagkabun-ag.Hebreo 1:4.

  4. Sa Biblia, wala gid sing ginsambit nga alagad sang Dios nga nagselebrar sang birthday. Indi masiling nga nalipatan lang ini, kay may ginsambit ang Biblia nga duha ka selebrasyon sang birthday sang mga tawo nga wala nagasimba sa Dios. Pero, ining duha ka okasyon pareho nga may indi maayo nga resulta.Genesis 40:20-22; Marcos 6:21-29.

Ang mga bata bala sang mga Saksi nagabatyag nga daw napit-an kay wala sila nagaselebrar sang birthday?

Pareho sang bisan sin-o nga mapinalanggaon nga mga ginikanan, ginapabatyag sang Saksi nga mga ginikanan ang ila pagpalangga sa ila kabataan sa bug-os nga tuig. Lakip sa sini ang paghatag sang mga regalo kag masadya nga mga pagtilipon. Ginatinguhaan nila nga ilugon ang perpekto nga halimbawa sang Dios, nga kinabubut-on nga nagahatag sing maayo nga mga butang sa iya mga anak. (Mateo 7:11) Ang mga bata sang mga Saksi wala nagabatyag nga ginapit-an, pareho sa masunod nga ginhambal nila:

  • “Mas nami makabaton sing regalo kon wala mo ini ginapaabot.”—Tammy, 12 anyos.

  • “Bisan pa wala ako sing regalo sa akon birthday, ginaregaluhan man ako sang akon mga ginikanan sa iban nga okasyon. Mas gusto ko ini kay nagaka-surprise ako.”—Gregory, 11 anyos.

  • “Party na ’ya sa inyo ang pulo ka minutos, diutay nga cupcake, kag kanta? Kadto bala kamo sa balay para mabal-an ninyo kon ano ang matuod nga party!”—Eric, 6 anyos.

Magtuon sing Dugang Pa

Paano ang mga Prinsipio sa Biblia Makabulig sa Aton?

Ginpaathag ni Jesus kon ngaa kinahanglan naton ang panuytoy kag kon ano ang duha ka panguna kag pinakaimportante nga prinsipio sa Biblia.