Palangga gid sang mga Saksi ni Jehova ang pareho nila nga mga Saksi. (1 Pedro 2:17) Madamo sa aton ang pareho sing ginabatyag kay Tannis, nga isa ka sister sa Kenya. Sia nagsiling, “Gusto ko gid mabal-an ang nagakatabo sa akon palangga nga mga kauturan sa bilog nga kalibutan.” Paano mabal-an ni Tannis kag sang minilyon pa ka Saksi ang nagakatabo sa ila mga kauturan? Sugod sang 2013, nangin posible ina paagi sa Newsroom nga seksion sang aton website, ang jw.org.

 Sa Newsroom nga seksion may masaligan nga mga report parte sa mga Saksi ni Jehova. Nalakip sa ginareport diri ang parte sa pag-release sang Biblia, pagbulig sa mga nahalitan sang kalamidad, mga construction project, kag iban pa nga importante nga mga hitabo. Diri ta man mabal-an ang mga report parte sa aton mga kauturan nga ginpriso bangod sang ila pagtuo. Mabasa man sa Newsroom ang makapalig-on nga mga eksperiensia parte sa aton mga preaching campaign kag pagselebrar sang Memoryal. Sin-o ang naga-research sini nga mga artikulo, kag paano ini ginahanda para mangin balita?

 Ang Newsroom nga seksion ginadumalahan sang Office of Public Information (OPI). Ini nga department ara sa world headquarters kag ginadumalahan sang Coordinators’ Committee sang Nagadumala nga Hubon. Ang OPI may ara sobra 100 ka kauturan nga nagatrabaho bilang mga writer, researcher, visual artist, kag mga translator. Kalabanan sa ila mga remote volunteer. Ang iban sa ila amo ang nagakontak sa mga opisyales sang gobierno, sa mga propesor kag mga teacher, kag sa media. Ang OPI ginabuligan sang sobra 80 ka Public Information Desks (PID) sa mga sanga sa bilog nga kalibutan.

 Para mahanda ang isa ka news article, nagabuligay ang OPI kag ang mga PID. Kon makapili na ang mga kauturan sang isa ka hitabo nga nami ibalita, gina-research nila ini nga balita kag nagatipon sila sang masaligan nga impormasyon. Nalakip sa ila ginahimo ang pagpang-interbyu kag pag-istorya sa mga eksperto. Kon makakuha na sila sang masaligan nga impormasyon, isulat nila ang news article. Dayon, i-edit ini, i-proofread, butangan sang mga piktyur, kag paaprobahan sa Coordinators’ Committee.

 Ano ang ginabatyag sang aton mga kauturan sa Newsroom nga seksion? Si Cheryl, nga isa ka sister sa Pilipinas nagsiling, “Kada aga, nanamian gid ako magbasa sang mga balita parte sa organisasyon ni Jehova kag sa iya katawhan.”

 Madamo ang nagasiling nga ang mga balita sa Newsroom sang jw.org lain gid sa mga balita sa news media. Si Tatiana nga taga-Kazakhstan, nagsiling: “Nagapasalamat gid ako nga masaligan ko ang mga balita sa jw.org. Maathag ini kag matuod.” Ang isa ka sister sa Mexico nga si Alma nagsiling: “Ang mga balita sa iban nga news media makapa-stress, pero ang mga balita sa Newsroom makapalig-on.”

 Ang Newsroom nga seksion indi lang masaligan kundi makapabakod man sang pagtuo. Si Bernard nga taga-Kenya, nagsiling: “Ini nga mga balita nakabulig sa akon nga mabatyagan nga ang mga kauturan sa bilog nga kalibutan pamilya ko gid, bisan pa ara sila sa sarisari nga lugar. Masambit ko na ang ila ngalan kag ang mga nagakatabo sa ila sa akon pangamuyo.” Ang isa ka sister nga si Bybron nga taga-Kenya man, nagsiling: “Eksayted gid ko kon may balita nga may gin-release nga Biblia sa lain naman nga lenguahe! Nagapahanumdom ini sa akon nga si Jehova wala gid sang ginapasulabi.”

 Bisan gani ang mga balita parte sa aton kauturan nga ginahingabot makapalig-on gihapon. “Napalig-on gid ako kon pensaron ko ang ila kaisog,” siling ni Jackline nga taga Kenya. Ginatinguhaan ko nga matun-an kon ano ang nakabulig sa ila nga makabatas. Natun-an ko nga ang ‘simple’ nga mga butang pareho sang pangamuyo, pagbasa sang Biblia, kag bisan gani ang pagkanta lang, nakabulig para mangin mabakod ang aton mga kauturan.”

 Naapresyar naman sang sister nga si Beatriz ang mga balita parte sa kalamidad. Nagsiling sia: “Paagi sa Newsroom nakita ko kon paano ginaatipan sang aton organisasyon ang kinahanglanon sang aton mga kauturan sa madasig, organisado, kag mahigugmaon nga paagi. Bangod sini makasiling ako nga amo gid ini ang organisasyon ni Jehova.”

 Nagapasalamat gid kita nga may ara kita pirme pinakabag-o nga mga balita parte sa aton mga kauturan! Indi ini mahimo kon wala ang imo mga donasyon sa worldwide work, nga ginahimo sang kalabanan gamit ang sarisari nga paagi sang pag-donate sa donate.jw.org. Madamo gid nga salamat sa imo maalwan nga mga amot.