Ang Biblia nagasiling nga sang ginsakop sang mga Israelinhon ang Ginsaad nga Duta, ginpartida nila ini sa ila mga tribo. Nabaton sang napulo ka pamilya sang tribo ni Manases ang kadutaan nga ara sa katundan sang Jordan, kag nabaton sang iban nga pamilya ang kadutaan nga ara sa sidlangan sang Jordan. (Josue 17:1-6) May pamatuod bala ang mga arkeologo nga natabo ini?

Sang 1910, nakutkutan sa Samaria ang koleksion sang buka nga mga banga nga may mga sinulatan. Makita sa sining buka nga mga banga, ukon ostraca, ang mga rekord nga nasulat sa Hebreo parte sa malahalon nga mga produkto nga ginpadala sa palasyo sang kapital nga siudad. Lakip sa sini ang mga alak kag mga produkto nga pangpatahom. Sa kabilugan, 102 ka ostraca halin sa ikawalo nga siglo B.C.E. ang nakit-an, pero 63 lang sa sini ang mabasahan. Mabasa sa 63 ka mga ostraca ang mga petsa, ngalan sang mga pamilya, kag kon sin-o ang mga nagpadala kag mga ginpadal-an sang mga produkto.

Talalupangdon nga ang tanan nga pamilya nga nasulat sa Samaria Ostraca iya sang tribo ni Manases. Suno sa NIV Archaeological Study Bible, “dugang ini nga ebidensia sa ginsiling sang Biblia nga lugar nga gin-istaran sang mga pamilya sang tribo ni Manases.”

Ginapamatud-an man sang Samaria Ostraca nga sibu gid ang ginsiling sang manunulat sang Biblia nga si Amos parte sa manggaranon nga mga tawo sadto nga tion: “Nagainom sila sing alak sa mga yahong kag nagapamanyos sila sing pinili nga lana.” (Amos 6:1, 6) Ginapamatud-an sang Samaria Ostraca nga ini nga mga produkto ginpadala sa mga kadutaan nga gin-istaran sadto sang napulo ka pamilya sang tribo ni Manases.