Handurawa ang amay nga nagaistorya sa iya pito ka tuig nga bata nga lalaki. Nagsiling sia, “Madugay na nga tion ang nagligad, nagtuga ang Dios sang duta kag sang tanan nga ari diri, kag nagtuga sia sang adlaw, bulan, kag mga bituon.” Ginpamensaran ini sang bata sing makadali kag namangkot, “Tay, sin-o ang nagtuga sa Dios?”

“Wala sing nagtuga sa Dios,” sabat sang Tatay. “Wala sia sing ginsuguran kag wala sing katapusan.” Ining simple nga sabat bastante na sa bata subong. Pero samtang nagadaku sia, paligban gihapon niya ini. Indi niya mahangpan kon paano nga wala sing ginsuguran ang isa. Kay bisan gani ang uniberso may ginsuguran. ‘Diin naghalin ang Dios?’ palibog niya.

Ano ang sabat sang Biblia? Pareho man sa ginsabat sang amay sa aton halimbawa. Si Moises nagsulat: ‘GINOO, sa wala pa ang mga bukid maggowa, ukon mahuman mo ang duta kag ang kalibutan, kutub sa gihapon tubtub sa gihapon ikaw Dios.’ (Salmo 90:1, 2) Si propeta Isaias nagsiling man: ‘Wala ka bala makahibalo? Wala ka bala makabati? Ang nagapadayon nga Dios amo ang GINOO, ang Manunuga sang mga ukbung sang duta.’ (Isaias 40:28) Sing kaanggid, ang sulat ni Judas nagapatuhoy sa Dios nga nagaluntad “sa tanan nga nagligad nga tion.”—Judas 25.

Ini nga mga teksto nagapakita nga ang Dios “Hari nga dayon,” subong sang ginsiling ni apostol Pablo. (1 Timoteo 1:17) Buot silingon nga ang Dios padayon nga nagaluntad, sadto kag bisan sa palaabuton. (Bugna 1:8) Gani ang iya padayon nga pagluntad may kahilabtanan sa iya pagka-Labing Gamhanan.

Ngaa nabudlayan kita nga mahangpan ini? Bangod malip-ot lang ang aton kabuhi, lain gid ang aton pagtamod sa tion sangsa kay Jehova. Ang Dios wala sing katapusan, amo nga ang isa ka libo ka tuig sa iya daw isa lang ka adlaw. (2 Pedro 3:8) Sa pag-ilustrar: Mahangpan bala sang tibakla nga nagaedad lang sing 50 ka adlaw ang aton kabuhi nga 70 ukon 80 ka tuig? Siempre indi! Pero, ginapaathag sang Biblia nga pareho kita sa mga tibakla kon ipaanggid sa aton Dakung Manunuga. Bisan gani ang aton ikasarang sa pagpangatarungan tuman ka limitado kon ikumparar sa iya. (Isaias 40:22; 55:8, 9) Gani indi katingalahan nga indi mahangpan sang tawo ang iban nga aspekto sang kinaugali ni Jehova.

Bisan pa mabudlay hangpon ang ideya nga wala sing katapusan ang Dios, maintiendihan naton nga nagakaigo ini. Kon may nagtuga sa Dios, mahimo nga sia na ang Manunuga. Pero ang Biblia nagapaathag nga si Jehova amo ang ‘nagtuga sang tanan nga butang.’ (Bugna 4:11) Dugang pa, nahibaluan naton nga wala nagaluntad ang uniberso sadto. (Genesis 1:1, 2) Diin gali ini naghalin? Siempre, dapat anay magluntad ang Manunuga. Nagluntad na sia antes pa gintuga ang iban nga intelihente nga mga tinuga, subong sang iya bugtong nga Anak kag mga anghel. (Job 38:4, 7; Colosas 1:15) Gani maathag nga sang una sia lamang ang nagaluntad. Wala sia gintuga; wala sing nauna nga nagluntad nga mahimo makatuga sa iya.

Ginapakita sang aton pagluntad kag sang bug-os nga uniberso nga may Dios nga wala sing katapusan. Ang Isa nga nagtuga sang tuman ka daku nga uniberso kag sang mga kasuguan nga nagakontrol sini, dapat padayon nga nagaluntad. Nagakaigo lang nga sia ang naghatag sing kabuhi sa tanan nga butang.—Job 33:4.