Magdiretso sa kaundan

Magdiretso sa listahan sang kaundan

Ngaa ang Manugpamati sang Pangamuyo Nagatugot sang Pag-antos?

Ngaa ang Manugpamati sang Pangamuyo Nagatugot sang Pag-antos?

 Ngaa ang Manugpamati sang Pangamuyo Nagatugot sang Pag-antos?

BISAN pa nagapangamuyo sila, ang pila nagaduhaduha gihapon nga nagaluntad ang Dios. Ngaa? Mahimo bangod nakita nila ang tuman nga pag-antos sa kalibutan. Nakapamangkot ka man bala kon ngaa ginatugutan sang Dios ang pag-antos?

Ginhimo gid bala sang Dios ang mga tawo kon ano sila subong—indi perpekto kag nagaantos? Indi naton matahod ang isa ka dios nga nagtuyo nga mag-antos ang mga tawo. Pero binagbinaga ini: Samtang nanamian ka sa pagtan-aw sang bag-o nga salakyan, natalupangdan mo nga may gupi ini. Masiling ka bala nga ginhungod ini sang manughimo? Siempre indi! Mahimo magsiling ka nga “perpekto” ini sang ginhimo pero may isa ukon may butang nga naghalit sini.

Sing kaanggid, kon nagadayaw kita sa makatilingala nga kahim-ong kag desinyo sang kinaugali kag matalupangdan naton ang kagamo kag korapsion nga nagapabudlay sa kabuhi sang tawo, ano ang aton konklusion? Ang Biblia nagatudlo nga perpekto ang paghimo sang Dios sa unang mag-asawa pero sang ulihi sila mismo ang nagtuga sang kahalitan sa ila kaugalingon. (Deuteronomio 32:4, 5) Ang maayong balita amo nga nagpromisa ang Dios nga kay-uhon ang halit—nga himuon nga perpekto liwat ang matinumanon nga mga tawo. Pero ngaa naghulat pa sia sing tuman kadugay?

 Ngaa Kadugay Gid?

Ang rason may labot sa isyu kon sin-o ang dapat maggahom. Wala gintuyo ni Jehova nga gamhan sang mga tawo ang ila kaugalingon. Sia ang ila Gumalahom. Ang Biblia mismo nagasiling: “Wala sa tawo nga nagalakat sa pagmando sang iya mga tikang.” (Jeremias 10:23) Makapasubo nga ginpili sang una nga mag-asawa nga magrebelde sa paggahom sang Dios. Bangod sini nangin makasasala sila. (1 Juan 3:4) Bilang resulta, nadula nila ang pagkaperpekto kag nahalitan nila ang ila kaugalingon kag ang ila mga kaliwat.

Sa sulod sang linibo ka tuig, gintugutan ni Jehova nga gamhan sang mga tawo ang ila kaugalingon, kag ginapakita sang maragtas nga wala sila sing ikasarang sa paghimo sini. Ginapakita sini nga ang tanan nga gobierno sang tawo amo ang kabangdanan sang pag-antos. Wala sing isa sini ang nakadula sang inaway, krimen, inhustisya, ukon balatian.

Paano Dulaon sang Dios ang Kahalitan?

Ang Biblia nagapromisa nga paluntaron sang Dios sa ulihi ang isa ka matarong nga bag-o nga kalibutan. (2 Pedro 3:13) Ang mga nagpili lamang nga magpakita sang gugma sa isa kag isa kag sa Dios ang tugutan nga mag-istar diri.—Deuteronomio 30:15, 16, 19, 20.

Ang Biblia nagasiling man nga “sa adlaw sang paghukom” nga nagahilapit na, dulaon sang Dios ang pag-antos kag ang kabangdanan sini. (2 Pedro 3:7) Pagkatapos sini, ang gintangdo sang Dios nga Gumalahom, si Jesucristo, amo ang magagahom sa matinumanon nga mga tawo. (Daniel 7:13, 14) Ano ang himuon sang paggahom ni Jesus? Ang Biblia nagasiling: “Ang mapainubuson magapanubli sang duta,  kag magakalipay sila sa kabuganaan sang paghidait.”—Salmo 37:11.

Bilang Hari sa langit, dulaon ni Jesus ang tanan nga halit—lakip ang balatian, pagtigulang, kag kamatayon—nga resulta sang pagrebelde sang mga tawo kay Jehova, “ang tuburan sang kabuhi.” (Salmo 36:9) Ayuhon ni Jesus ang tanan nga nagabaton sang iya mahigugmaon nga paggahom. Sa iya paggahom, matuman ini nga mga promisa sang Biblia:

▪ “Ang pumuluyo indi magsiling, ‘Nagamasakit ako’; ang katawohan nga nagapuyo sa iya patawaron sang ila kalautan.”—Isaias 33:24.

▪ “Pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:4.

Indi bala makalilipay mahibaluan nga sa indi madugay tumanon sang Dios ang iya promisa nga dulaon ang tanan nga pag-antos? Samtang wala pa ini, dapat magsalig kita nga ginapamatian niya ang aton mga pangamuyo, bisan pa nga ginatugutan niya subong ang pag-antos.

Nagaluntad ang Dios. Mabatian ka niya, bisan ang imo mga kasakit kag kalisod. Kag gusto niya nga makita ka nga nagakabuhi sing malipayon sa tion nga madula na ang tanan mo nga pagpangduhaduha kag kasakit.