Magdiretso sa kaundan

Magdiretso sa listahan sang kaundan

“Imposible!”—Ano ang Buot Silingon Sini?

“Imposible!”—Ano ang Buot Silingon Sini?

 “Imposible!”—Ano ang Buot Silingon Sini?

ANG Titanic, nga naglayag sang 1912, amo ang pinakadaku kag pinakamahal nga barko sadto. Bangod moderno ang desinyo sini, ginkabig ini nga “indi malunod.” Siempre, nahibaluan naton kon ano ang natabo. Sa una nga paglayag sini, nagbunggo ini sa iceberg sa North Atlantic kag nalunod, upod ang mga 1,500 ka pasahero sini. Ang barko nga ginkabig nga imposible malunod, naglugdang pila pa lang ka oras nga naglayag ini.

Ang tinaga nga “imposible” may madamo nga kahulugan. Masiling naton nga imposible ang isa ka butang kon indi naton ini masarangan, mahimo, ukon maintiendihan. Madamo nga teknolohiya subong ang ginakabig anay nga imposible bangod sadto nga tion, indi ini mahimo sang tawo ukon indi gani mahangpan. Ang pagpakadto sang tawo sa bulan, pagpadala sing mga salakyan sa Mars kag pagkontrol sini halin sa Duta, pagkilala sang tanan nga bahin sang genetic code sang tawo, kag pagtan-aw sing aktual kon ano ang nagakatabo sa iban nga banwa ukon iban nga bahin sang kalibutan—ini nga mga katunayan subong mahimo nga isiling nga imposible sang nagligad nga 50 ka tuig. Parte sa sini, ang presidente anay sang Estados Unidos nga si Ronald Reagan nagsiling sa kilala nga mga sientipiko: “Kamo nga nagapanguna sa teknolohiya naghimo sang imposible nga mga butang sadto nga kinaandan na lang subong.”

Bangod sang talalupangdon nga mga pag-uswag nga nagakatabo, si Propesor John Brobeck nagsiling: “Indi na makasiling sing pat-od ang isa ka sientipiko nga ang isa ka butang imposible. Makasiling lamang sia nga basi posible. Pero mahimo makasiling sia nga ang isa ka butang imposible ipaathag suno sa aton lamang nahibaluan subong.” Ang propesor nagdugang nga kon may butang nga daw imposible sa aton, “ang isa ka butang nga dapat idugang amo ang ginhalinan sang enerhiya nga wala naton mahibaluan sa biological kag physiological nga siensia. Sa aton Kasulatan ginatawag ining ginhalinan sang enerhiya nga gahom sang Dios.”

 Ang Tanan nga Butang Posible sa Dios

Madugay pa antes nakasiling sini si Propesor Brobeck, si Jesus sang Nazaret nga ginlaragway subong pinakabantog nga tawo nga nagkabuhi, nagsiling: “Ang mga butang nga imposible sa tawo posible sa Dios.” (Lucas 18:27) Ang balaan nga espiritu amo ang labing gamhanan nga puersa sa uniberso. Indi ini matakus sang teknolohiya. Paagi sa balaan nga espiritu, makahimo kita sang mga butang nga imposible kon sa aton lang.

Bilang mga tawo, may mga kahimtangan nga daw ginabudlayan kita nga atubangon. Halimbawa, mahimo kita nga masubuan gid kag daw wala na sing paglaum kon mapatay ang aton hinigugma. Mahimo mabudlay katama ang kahimtangan sang aton pamilya kag daw wala na kita sing pasingadtuan. Ano ang aton himuon?

Ginasilingan kita sang Biblia nga ang may pagtuo sa Makagagahom kag nagapangamuyo sang Iya balaan nga espiritu samtang nagahimo sang iya masarangan nga pahamut-an Sia, makabaton sang bulig nga malandas ang daw indi masarangan nga mga problema. Talupangda ang pasalig ni Jesus: “Sa pagkamatuod nagasiling ako sa inyo nga ang bisan sin-o nga magsiling sa sini nga bukid, ‘Alsa kag saylo sa dagat,’ kag wala nagaduhaduha sa iya tagipusuon kundi nagatuo nga mahanabo ang iya ginasiling, mahanabo ini.” (Marcos 11:23) Wala sing kahimtangan nga imposible mabatas ukon malampuwasan kon tugutan naton ang gahom sang Pulong sang Dios kag ang iya espiritu nga mag-impluwensia sa aton.

Halimbawa, binagbinaga ang isa ka tawo nga 38 na ka tuig nga minyo kag napatay ang iya asawa sa kanser. Daw tinakluban sia sang langit. Pamatyag niya daw indi niya mabatas ang kasubo. May mga tion nga gusto na lang niya mapatay sangsa mabuhi nga wala ang iya asawa. Nagsiling sia nga daw yara sia sa nalupyakan sang landong sang kamatayon. Sa paghanduraw liwat, nagapati sia nga ang paghilibion samtang nagapangamuyo kag ang adlaw-adlaw nga pagbasa sang Biblia, subong man ang pagpangayo pirme sang giya sa espiritu sang Dios, nakabulig sa iya nga atubangon ang daw imposible sa pamatyag niya.

Nagahuyango na ang pag-asawahay sang magtiayon. Mapintas ang bana kag damo sing bisyo. Daw indi na makaagwanta ang iya asawa amo nga mahikog na lang ini kuntani. Pero nagsugod sa pagtuon sa Biblia ang iya bana sa mga Saksi ni Jehova. Paagi sa iya natun-an, nauntatan niya ang iya mga bisyo kag kapintas. Natingala gid ang iya asawa sa “imposible” nga mga pagbag-o.

Ginlaragway sang isa ka lalaki ang iya kabuhi nga tuman kasubo bangod sang droga kag imoralidad. “Wala na ako sing dignidad,” siling niya. Sinsero sia nga nangamuyo sa Dios: “Ginuo, kabalo ko nga nagaluntad ka. Palihug buligi ako!” Bangod sa iya pangamuyo, nagtuon sia sa Biblia upod sa mga Saksi ni Jehova kag subong resulta, nagbag-o gid ang iya kabuhi. “Pirme ako ginakonsiensia kag nagabatyag nga wala sing pulos,” siling niya. “Kon kaisa, ginasubuan gid ako. Pero ginbuligan ako sang Pulong sang Dios nga madula ini. Kon indi ako makatulog, ginadumdom ko ang mga teksto nga akon natun-an. Nakabulig ini para magtawhay ang akon panghunahuna.” Minyo na sia subong kag malipayon. Aktibo sila sang iya asawa sa pagbulig sa iban nga magsalig sa gahom sang Pulong sang Dios. Bangod magamo ang iya kabuhi sang pamatan-on pa sia, para sa iya daw imposible nga amo na ini ang iya kabuhi subong.

Ining mga eksperiensia nagapakita nga ang Pulong sang Dios gamhanan gid kag ang iya balaan nga espiritu makahimo sing “imposible” nga mga butang sa aton kabuhi. Pero mahimo magsiling ka, “Nagakinahanglan ina sang pagtuo!” Huo, matuod ina. Ang Biblia nagasiling  nga “kon wala sing pagtuo imposible nga mapahamut-an gid [ang Dios].” (Hebreo 11:6) Pero pensara ini: Ang isa ka maayo nga abyan, ayhan isa ka manedyer sang bangko ukon ang isa nga may awtoridad, magsiling sa imo: “Indi ka magkabalaka. Kon may kinahanglan ka, kadtui lang ako.” Sigurado gid nga mapalig-on ka sini nga promisa. Pero makapasubo nga sa masami indi matuman sang mga tawo ang ila promisa. Mahimo nga nagbag-o ang kahimtangan sang imo abyan amo nga imposible niya nga tumanon ang ginpromisa niya sa imo. Kon mapatay sia, madula na ang iya maayo nga kabubut-on kag ikasarang sa pagbulig. Pero indi amo sina sa Dios. Ang Biblia nagapasalig sa aton: “Wala sing imposible sa Dios.”Lucas 1:37, The Jerusalem Bible.

“Nagapati Ka Bala Sini?”

Madamo nga hitabo ang nagapamatuod nga husto ang ginasiling sina nga rekord sang Biblia. Binagbinaga ang pila ka halimbawa.

Ang 90 anyos nga si Sara nagkadlaw sang ginsilingan sia nga magaanak sia sang lalaki, pero nangin matuod ini kay may mga Israelinhon. Isa ka tawo ang gintukob sang daku nga isda kag naluwas pagligad sang tatlo ka adlaw amo nga nasulat niya ini nga hitabo. Sia si Jonas. Nahibaluan ni Lucas, nga isa ka doktor, ang kinatuhayan sang lipong kag sang patay. Ginrekord niya kon paano ang solterito nga si Eutico nahulog sa bintana kag napatay pero nabuhi liwat. Indi ini uluistorya. Kon usisaon sing maayo ini nga mga hitabo, mapamatud-an gid ini nga matuod.—Genesis 18:10-14; 21:1, 2; Jonas 1:17; 2:1, 10; Binuhatan 20:9-12.

Makatilingala nga ginsilingan ni Jesus ang iya abyan nga si Marta: “Ang tanan nga nagakabuhi kag nagatuo sa akon indi na gid mapatay.” Sa sining daw imposible nga promisa, namangkot si Jesus: “Nagapati ka bala sini?” Maayo nga usisaon man naton subong ini nga pamangkot.—Juan 11:26.

Pagkabuhi sing Wala Katapusan sa Duta—Imposible Bala?

Sa isa ka artikulo parte sa kalawigon sang kabuhi, ang mga manunulat nagsiling: “Indi na magdugay nga magakabuhi kita sing malawig sangsa subong—sing wala katapusan pa gani.” Ang The New Encyclopædia Britannica nagapaathag nga may ara indi mahibaluan nga rason kon ngaa nagakapatay ang tawo kag amo ini ang nagapauntat sang mga proseso sa lawas. Indi ini bangod sang pagkaguba kag pagdaan sang mga selula, ukon sang iban pa nga proseso. * Nagsiling pa ini: “Ang pagtigulang sang isa posible nga bangod sa pagkaguba sang nagakontrol nga mekanismo nga kinahanglan sa komplikado nga pagpanghikot.”

Bisan pa nga makapainteres ini tanan, may mas mabakod pa nga rason nga ginahatag ang Biblia sa pagpati nga mabuhi sing wala katapusan sangsa mapaathag sang lohika kag siensia. Si Jehova nga Dios, ang aton Manunuga kag Tuburan sang kabuhi, nagpromisa nga ‘lamunon niya sing dayon ang kamatayon.’ (Salmo 36:9; Isaias 25:8) Nagapati ka bala sa sini? Ini nga promisa halin kay Jehova, kag imposible nga magbutig sia.—Tito 1:2.

[Nota]

^ par. 18 Para sa dugang nga impormasyon parte sa pagtigulang kag sa kalawigon sang kabuhi, basaha ang mga artikulo sa “Daw Ano Kalawig Ka Mahimo Mabuhi?” sa Mayo 2006 nga gua sang Magmata! nga ginhimo sang mga Saksi ni Jehova.

[Blurb sa pahina 27]

‘Ang imposible nga mga butang sadto nangin kinaandan na lang subong.’—RONALD REAGAN

[Blurb sa pahina 28]

Kay sin-o ka mapalapit kon wala ka na sing mapasingadtuan?

[Picture Credit Line sa pahina 27]

NASA photo