Magdiretso sa kaundan

Magdiretso sa listahan sang kaundan

 Magtuon sa Pulong sang Dios

Ngaa Ginabawtismuhan ang mga Cristiano?

Ngaa Ginabawtismuhan ang mga Cristiano?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ano ang buot silingon sang bawtismo sang isa ka Cristiano?

Ang bawtismo isa ka pangabay para matigayon ang maayo nga kaangtanan sa Dios. Gani, ang isa ka Cristiano dapat bawtismuhan, indi kon lapsag pa sia, kundi kon naintiendihan na niya ang parte sa Dios kag nangin disipulo ni Jesus. (Binuhatan 8:12; 1 Pedro 3:21) Mangin disipulo kita ni Jesus kon ginatun-an kag ginatuman naton ang iya mga sugo.—Basaha ang Mateo 28:19, 20.

Sang panahon sang mga apostoles ni Jesus, madamo ang nagtuon dayon parte sa Dios kag kay Jesus. Halimbawa, sang natun-an sang isa ka tawo nga posible matigayon ang kaluwasan paagi sa kamatayon ni Jesus, nangin disipulo sia gilayon. Subong, madamo nga sinsero nga tawo ang nangin sumulunod ni Jesus.—Basaha ang Binuhatan 8:26-31, 35-38.

2. Ngaa ginbawtismuhan si Jesus?

Mga 30 anyos si Jesus sang ginbawtismuhan sia ni Juan nga Manugbawtismo sa Suba Jordan. Ang bawtismo ni Jesus nagarepresentar sang iya desisyon nga himuon ang kabubut-on sang Dios para sa iya. (Hebreo 10:7) Nalakip sa sini ang paghalad sang iya kabuhi para sa mga sala sang katawhan. Antes pa sia nagkari sa duta, ginahigugma kag ginatuman na niya ang iya Amay, si Jehova.—Basaha ang Marcos 1:9-11; Juan 8:29; 17:5.

  3. Ngaa dapat magpabawtismo ang isa ka Cristiano?

Indi pareho kay Jesus, natawo kita nga makasasala. Pero paagi sa kamatayon ni Jesus, posible naton matigayon ang maayo nga kaangtanan sa Dios. (Roma 5:10, 12; 12:1, 2) Mahimo kita mangin miembro sang iya pamilya. (2 Corinto 6:18) Paano? Sa aton pribado nga pangamuyo, ginadedikar naton ang aton kaugalingon kay Jehova, nga nagapromisa nga himuon ang iya kabubut-on sa bilog naton nga kabuhi. Dayon para mahibaluan sang publiko, dapat naton ini simbuluhan paagi sa pagpabawtismo.—Basaha ang Mateo 16:24; 1 Pedro 4:2.

4. Ano ang himuon mo para mangin kalipikado sa bawtismo?

Ginatudluan sa Biblia sang mga Saksi ni Jehova ang mga tawo nga gusto mangin suod sa Dios. Ang pagtuon mo sa Biblia kag pagtambong sa Cristiano nga mga pagtilipon makapabakod sang imo gugma kag pagtuo sa Dios. Makabulig man ini para mangin maayo ang imo batasan. Ang pagpakita sang gugma, pagtuo, kag iban pa nga maayo nga kinaiya, makabulig sa imo nga matuman ang imo promisa nga alagaron si Jehova sing wala katapusan.—Basaha ang Juan 17:3; Hebreo 10:24, 25.

Para sa dugang nga impormasyon, basaha ang kapitulo 18 sini nga libro, Ano Gid ang Ginatudlo Sang Biblia?, nga ginhimo sang mga Saksi ni Jehova.