Magdiretso sa kaundan

Magdiretso sa listahan sang kaundan

Pasadyaha Ninyo si Jehova

Pasadyaha Ninyo si Jehova

 Ika-131 nga Gradwasyon sa Gilead

Pasadyaha Ninyo si Jehova

SANG Septiembre 10, 2011, ang mga pamilya, mga abyan, kag iban pa nagtipon para sa gradwasyon sang ika-131 nga klase sang Watchtower Bible School of Gilead. Antes magsugod, ginakulbaan ang mga humalambal kag mga estudyante. Pero pagkatapos sang programa, ang 9,063 nga nagtambong kalmado na kag nagayuhum kay nalipay sila sa mga pamulongpulong, demonstrasyon, kag mga interbyu.

Si Stephen Lett, nga miembro sang Nagadumala nga Hubon sang mga Saksi ni Jehova kag tsirman sang programa, naghatag sing nagabukas nga pamulongpulong. Ginbinagbinag niya ang mga bersikulo sa Biblia nga nagapakita nga si Jehova nga Dios daw may pisikal nga lawas kag ginpadaku kon paano ginagamit ni Jehova ang iya malaragwayon nga mga mata, dulunggan, kamot, kag butkon.

Una, ginbinagbinag niya ang 2 Cronica 16:9, nga nagasiling nga ang “mga mata [ni Jehova] nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.” Ginpalig-on niya ang mga estudyante nga mag-alagad sing bug-os tagipusuon kay Jehova. Mailog nila ang Dios kon tan-awon nila ang maayo sa mga tawo. Dayon, ginbinagbinag ni Brother Lett ang 1 Pedro 3:12 nga nagasiling nga ang dulunggan ni Jehova nagapamati sa pangamuyo sang mga matarong. Ginsilingan niya ang mga estudyante nga mangamuyo pirme kay Jehova, kay gusto gid ni Jehova nga pamatian sila.

Ginbinagbinag man niya ang Isaias 41:13, diin nagpromisa si Jehova: “Ako ang GINOO nga imo Dios, magauyat sang imo kamut nga too; nagasiling sa imo, ‘Dili magkahadluk, magatabang ako sa imo.’” Si Brother Lett nagsiling: “Makapaumpaw gid ang ginsiling ni Jehova. Ginauntay niya ang iya kamot para uyatan ang aton kamot.” Ginsilingan niya ang mga estudyante nga batunon pirme ang bulig ni Jehova kag indi ini pag-isikway. Nagsiling man sia nga mailog sang mga estudyante si Jehova kon buligan nila ang iban.

Sa katapusan, ginbasa ni Brother Lett ang Isaias 40:11. Gin-agda niya ang mga tumalambong nga handurawon ang pagpalangga ni Jehova nga ginapakita sini nga bersikulo. “Ginakungkong kita ni Jehova sa iya mga butkon,” siling ni Brother Lett. “Ginadala niya kita sa iya dughan.” Ano ang dapat naton himuon? Ginlaygayan ang mga estudyante nga mangin mahagop pareho sang gamay nga karnero para mahamuot sa ila si Jehova.

“Yari sa Amon Ini nga Bahandi sa Daga nga mga Suludlan”

Ini ang tema nga ginbinagbinag ni David Splane sang Nagadumala nga Hubon. (2 Corinto 4:7) Ano ang bahandi? Nagapatuhoy bala ini sa ihibalo ukon kaalam? “Indi,” sabat sang humalambal. “Ang bahandi nga ginasiling ni apostol Pablo amo ang ‘ministeryo’ sang ‘pagpadayag sang kamatuoran.’” (2 Corinto 4:1, 2, 5) Ginpahanumdom ni Brother Splane ang mga estudyante nga ang lima ka bulan nila nga pagtuon preparasyon para sa pinasahi nga asaynment sa ministeryo. Ina nga asaynment dapat gid pabaloran.

Ginpaathag sang humalambal nga ang “daga” ukon lunang nga mga suludlan nagapatuhoy sa aton lawas. Ginpatuhay niya ang suludlan nga lunang kag ang suludlan nga bulawan. Ang mga suludlan nga bulawan wala pirme ginagamit. Pero ang mga suludlan nga lunang ginhimo para gamiton. Bisan butangan pa sing bahandi ang suludlan nga bulawan, mahimo nga maganyat kita gihapon sa suludlan sangsa bahandi nga unod sini. “Indi ninyo gusto nga  masentro sa inyo ang atension,” siling ni Brother Splane sa mga estudyante. “Bilang mga misyonero, gusto ninyo nga dayawon sang mga tawo si Jehova. Gani mangin mapainubuson bilang lunang nga mga suludlan.”

Nagsiling man ang humalambal nga sang panahon sang Biblia ang pila ka lunang nga suludlan makabato sa kalayo kag may madamol nga barnis para indi maglitik. Paano ini naaplikar sa mga misyonero? Pag-abot nila sa ila asaynment, pareho lang nga may madamol sila nga barnis. Indi na sila gawa mangin sensitibo, ukon dali maakig. “Marealisar ninyo nga mabatas ninyo ang madamo pa nga kabudlayan,” siling ni Brother Splane. Gintugyan ni Jehova ining bahandi sang ministeryo, indi sa mga anghel, kundi sa lunang nga mga suludlan. “Ginapakita sini nga nagasalig sa inyo si Jehova,” konklusion sang humalambal.

“Kon Nagdalagan Ka Upud sa mga Tawo . . . Paano Bala ang Pagpalumba Mo sa mga Kabayo?”

“Ano ka kadasig magdalagan kag ano kalayo ang imo masarangan?” pamangkot ni Samuel Herd sang Nagadumala nga Hubon. Ngaa ginpamangkot niya ini sa mga estudyante? Ginpaanggid niya ang eksperiensia sang mga estudyante sa inagihan ni propeta Jeremias. Binudlayan ining matutom nga tawo sa pag-atubang sa mga problema. Pero makaatubang pa sia sing grabe nga mga kabudlayan. Gani ginpamangkot sia ni Jehova: “Kon nagdalagan ka upud sa mga tawo nga nagatiil, kag ginlapyo ka nila, paano bala ang pagpalumba mo sa mga kabayo?”—Jeremias 12:5.

Gingamit ni Brother Herd ini nga punto sa mga estudyante. Nagsiling sia: “Bangod sa inyo mga eksam, mahimo nagbatyag kamo nga nagpalumba kamo sa mga kabayo. Pero ang matuod, nagdalagan kamo upod sa mga tawo, indi sa mga kabayo. Sa inyo asaynment, magapalumba kamo upod sa mga kabayo, ukon makaatubang kamo sing mas grabe nga mga kabudlayan. Paano ninyo ini atubangon? Ginhanda kamo sang Gilead nga magdalagan upod sa mga kabayo nga indi pagkapuyon.” Ginpalig-on niya ang mga estudyante nga padayon nila nga pabakuron ang ila espirituwalidad, magtuon pirme sa Biblia, kag mangamuyo.

Nagsiling si Brother Herd nga sa ulihi ang pila ka misyonero maluyahan ukon makaeksperiensia sang indi pagsapak sang mga tawo. Maluyahan man sila bangod sa balatian ukon pagbatyag nga indi na makasarang. Pero ginpasalig niya ang mga estudyante nga may makabulig sa ila para mabatuan ang mga kabudlayan kag indi pagkapuyon. “Nagadalagan ka man upod sa mga tawo ukon sa mga kabayo,” siling niya, “magsalig nga buligan ka sang Dios nga makalab-ot sa finish line. Sa amo, mangin madinalag-on kamo nga mga misyonero sa kadayawan ni Jehova.”

Iban Pa nga Bahin sang Programa

“Indi Ka Manghulam sing Pila Lamang ka Bilog.” Ginbinagbinag ni John Ekrann, nga miembro sang Komite sang Sanga sa Estados Unidos, ang kasaysayan ni propeta Eliseo kag sang balo nga babayi, nga kuhaon na kuntani sa iya ang iya mga anak para ibaligya nga ulipon. (2 Hari 4:1-7) Ang balo may isa lang ka gamay nga suludlan sang lana. Ginsugo sia ni Eliseo nga manghulam sang mga suludlan sa iya mga kaingod, nga nagasiling: “Indi ka manghulam sing pila lamang ka bilog.” Paagi kay Eliseo, ginpuno ni Jehova ang tanan nga suludlan nga ginhulam sang balo. Dayon ginbaligya sang balo ang lana, gani nabayaran niya ang iya mga utang kag may ginsuporta pa sia sa iya pamilya.

Ano ang matun-an sang mga estudyante sa sini nga kasaysayan? Indi pislian ang balo sa paghulam sang mga suludlan. “Gintipon niya ang bisan ano nga suludlan nga masudlan sing lana,” siling sang humalambal, “kag mas maayo kon daku.” Dayon ginpalig-on ni Brother Ekrann ang mga estudyante nga batunon ang tanan nga asaynment, gamay man ini ukon daku. “Indi mangin pislian,” siling niya. Ginpahanumdom man niya ang mga estudyante nga ang mga pagpakamaayo nga nabaton sang balo  nagadepende sa iya pagpamati sa sugo ni Eliseo. Ano ang leksion? Ang mga pagpakamaayo nga mabaton naton nagadepende sa aton kapisan kag pagtuo. “Indi magpulupatawhay,” siling sang humalambal.

“Kalan-on Sila nga sa Aton.” Ginbinagbinag ni William Samuelson, nga manugtatap sang Theocratic Schools Department, ini nga tema nga nabase sa Numeros 14:9. Ginpadaku niya ang maayo nga halimbawa nanday Josue kag Caleb. Ang termino diri nga “kalan-on” nagapahangop nga ang pumuluyo sang Canaan mahapos pierdihon kag makapabakod ini sa mga Israelinhon. Ano ang matun-an sa sini sang mga estudyante? “Sa inyo palaabuton nga asaynment,” siling sang humalambal, “kabiga nga ang mga kabudlayan makapabakod sa inyo.”

“Ang Ila Bala Pagtuo Naangkla sing Maayo sa Pag-atubang sa mga Bagyo?” Ginbinagbinag ni Sam Roberson, nga isa sa mga instruktor, ang paandam ni apostol Pablo nga ang pagtuo sang iban “nahalitan kaangay sang naguba nga sakayan.” (1 Timoteo 1:19) Ginpalig-on niya ang mga estudyante nga pabakuron ang pagtuo sang iban nga maangkla sing maayo kay Jehova nga Dios. “Ang inyo hilikuton,” siling niya, “mapaanggid sa ginahimo sang panday sang salsalon.” Paano? Ginasulda sang panday ang mga parte sang kadena para maangkla sing maayo ang barko. Sing kaanggid, ginabuligan sang mga misyonero ang ila ginatudluan sa Biblia nga mapakita ang mga kinaiya nga kinahanglan para sa kaluwasan.

Ginpaanggid ni Brother Roberson ang mga parte sang kadena sa walo ka kinaiya nga mabasa sa 2 Pedro 1:5-8. Nagsiling sia nga kon buligan sang mga misyonero ang ila ginatudluan nga mahangpan kon paano ginapakita ni Jehova ini nga mga kinaiya, matigayon sang ila ginatudluan ang indi mabugto nga kaangtanan kay Jehova. Mabatas nila ang mga problema nga magatilaw sang ila pagtuo.

Mga Eksperiensia kag mga Interbyu

Gin-agda sang isa pa ka instruktor, nga si Michael Burnett, ang mga estudyante sa Gilead nga isugid kag ipakita paagi sa reenactment ang pila nila ka eksperiensia sa pagbantala. Nalipay ang mga tumalambong nga mabatian kon paano nakabantala ang mga estudyante sa mall, erport, mga balay, kag bisan sa tawo nga nagsala sa pagtawag sa ila sa telepono.

Dayon, gin-interbyu ni Michael Hansen sang pamilya Bethel sa Estados Unidos ang madugay na nga misyonero nga si Stephen McDowell nga nag-alagad sa Panama, kag ang mga misyonero anay nga sanday Mark Noumair sa Kenya, kag William Yasovsky sa Paraguay. Ginpadaku sang ila bahin ang tema nga “Magkalipay sa Paghimo sang Kabubut-on ni Jehova.” (Salmo 40:8) Halimbawa, ginsugid ni Mark Noumair nga nalipay gid sila sang iya asawa sa ila asaynment. Daku gid ang ila kalipay kay nangin abyan nila ang mga Saksi didto. Nalipay man sila sang nakita nila nga ginasunod sang mga kauturan ang mga instruksion, ginbag-o ang ila kabuhi, kag kon paano ginpakamaayo ni Jehova ang ila pagtinguha. Ginpasalig niya ang mga estudyante nga mangin malipayon gid sila sa ila asaynment.

Sa tapos mabasa sang isa ka estudyante sang ika-131 nga klase ang sulat sang ila pagpasalamat, gintapos ni Brother Lett ang programa paagi sa pagpalig-on sa mga naggradwar nga mangin maalamon. Kon himuon nila ini, nagsiling sia nga mapasadya nila si Jehova. Mapasadya sini nga mga misyonero si Jehova samtang ginaalagad nila sia sing matutom sa ila asaynment.—Isaias 65:19.

 [Tsart/Mapa sa pahina 31]

ESTADISTIKA SANG KLASE

10 ka pungsod ang ila ginhalinan

34.7 aberids nga edad

19.0 aberids nga tuig sugod sang ginbawtismuhan

13.5 aberids nga tuig sa bug-os tion nga ministeryo

[Mapa]

(Para sa aktual nga pormat, tan-awa ang publikasyon)

Ang mga misyonero ginpadala sa mga pungsod nga makita sa idalom

MGA PUNGSOD NGA GINPADAL-AN SANG MGA MISYONERO

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

GERMANY

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SOUTH AFRICA

UNITED STATES OF AMERICA

VENEZUELA

[Retrato sa pahina 30]

Ginpakita sang mga estudyante paagi sa reenacment ang isa nila ka eksperiensia sa pagbantala

[Retrato sa pahina 31]

Ika-131 nga Gradwasyon sang Watchtower Bible School of Gilead

Ang mga raya nanumeruhan halin sa atubangan pakadto sa likod, kag ang mga ngalan nalista sa wala patuo sa tagsa ka raya.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.