Magdiretso sa kaundan

Magdiretso sa listahan sang kaundan

 Pamangkot sang mga Bumalasa . . .

Malaglag Bala ang Duta?

Malaglag Bala ang Duta?

▪ Ang iban nagpati nga malaglag ang duta sang Oktubre 21, 2011. Pero wala ini matabo. Gani, wala natuman ang prediksion sang U.S. radio broadcaster nga si Harold Camping. Nagsiling sia nga ang Adlaw sang Paghukom matabo sang Mayo 21, 2011, diin magalinog sa bilog nga kalibutan, kag pagligad sang lima ka bulan, sa Oktubre 21, maguba ang duta.

Pero ang duta indi gid malaglag kay indi pagtugutan sang Manunuga nga matabo ini. Ang Biblia nagasiling: “Ginpahamtang mo sing malig-on ang kalibutan, gani nagapabilin ini.”—Salmo 119:90, Ang Pulong sang Dios, APD.

Pero ang iban mahimo magsiling nga ang aton planeta malaglag paagi sa kalayo. Ginpatuhuyan nila ang 2 Pedro 3:7, 10 nga nagasiling: “Paagi sa amo man nga pulong ang langit kag ang duta karon ginatigana sa kalayo kag ginatipigan tubtob sa adlaw sang paghukom kag sang paglaglag sa di-diosnon nga mga tawo. . . . Apang ang adlaw ni Jehova magaabot subong sang kawatan, nga sa sini ang mga langit magataliwan nga may nagasagitsit nga kagahod, apang ang mga elemento matunaw bangod sa sobra nga kainit, kag ang duta kag ang mga binuhatan nga yara sa sini madayag.” Literal bala ining ginsiling ni apostol Pedro?

Indi. Ngaa? Bangod ang kahulugan sini nga mga bersikulo dapat magsanto sa kon ano gid ang ginapahangop sang sulat ni Pedro kag sang bilog nga Biblia. Kon hangpon ini sing literal, nagakahulugan ini nga ang langit, ukon uniberso—nga may binilyon ka bituon kag iban pa nga butang—masunog bangod lang ang gamay nga bahin sini may malain nga mga tawo. Gub-on mo bala ang malapad nga hunasan bangod indi mo gusto ang isa ka binlod nga balas sini? Siempre indi! Gani indi man paglaglagon ni Jehova ang bilog nga uniberso bangod lang sa pagrebelde sang isa sang iya mga tinuga.

Dugang pa, wala ini nagasanto sa ginsiling ni Jesucristo: “Malipayon ang mga malulo, kay magapanubli sila sang duta.” (Mateo 5:5; Salmo 37:29) Himuan ayhan sang mahigugmaon nga amay ang iya pamilya sang manami nga balay kag dayon sunugon lang ini? (Salmo 115:16) Indi gid! Si Jehova indi lamang Manunuga kundi mahigugmaon man nga Amay.—Salmo 103:13; 1 Juan 4:8.

Sa sini nga bersikulo, gingamit ni Pedro ang tinaga nga “duta” para patuhuyan ang malain nga mga tawo. Talupangda nga ginsambit ni Pedro ang Anaw sang panahon ni Noe. (2 Pedro 3:5, 6) Sina nga hitabo, mga malain lamang ang ginlaglag, pero ang duta kag ang matarong nga si Noe kag ang iya pamilya wala malaglag. Gingamit man ni Pedro ang tinaga nga “langit” para patuhuyan ang gobierno sang mga tawo. Kon amo, ang hungod nga nagahimo sing malain laglagon, lakip man ang tanan nga gobierno sang tawo, nga pagabuslan sang paggahom ukon Ginharian sang Dios sa langit.—Daniel 2:44.

Gani, malaglag bala ang duta? Indi. Ang malaglag amo ang malain nga mga tawo. Ang planeta nga duta kag ang matarong nga mga tawo magapabilin asta san-o.—Hulubaton 2:21, 22.