Magdiretso sa kaundan

Magdiretso sa listahan sang kaundan

 Pamangkot sang mga Bumalasa . . .

Ngaa Ginsugo sang Dios si Abraham nga Ihalad ang Iya Anak?

Ngaa Ginsugo sang Dios si Abraham nga Ihalad ang Iya Anak?

▪ Suno sa tulun-an sang Genesis sa Biblia, ginsugo ni Jehova nga Dios si Abraham nga ihalad ang iya anak nga si Isaac. (Genesis 22:2) Daw indi ini maintiendihan sang pila ka bumalasa sang Biblia. “Sang nabatian ko ini nga istorya sang bata pa ako, naakig gid ako,” siling sang propesor nga si Carol. “Ano sia nga klase sang Dios nga magsugo sini?” Normal lang ini nga reaksion, pero may duha ka punto nga dapat naton dumdumon.

Una, binagbinaga kon ano ang wala ginhimo ni Jehova. Wala niya gintugutan nga dayunon ni Abraham ang paghalad, bisan pa handa na si Abraham nga himuon ini, kag wala na ini ginpahimo sang Dios sa iban. Gusto ni Jehova nga ang tanan niya nga sumilimba, lakip ang kabataan, padayon nga magkabuhi sing malipayon.

Ikaduha, nagsiling ang Biblia nga may pinasahi nga rason si Jehova sa pagsugo kay Abraham nga ihalad si Isaac. Nahibaluan sang Dios nga ginatos ka tuig sa ulihi, tugutan Niya ang iya Anak, * nga si Jesus, nga mapatay para sa aton. (Mateo 20:28) Gusto ni Jehova nga mabatyagan naton ang iya ginsakripisyo sa sini nga halad. Paagi sa iya sugo kay Abraham, ginpakita niya sing maathag ang iya himuon nga paghalad sa palaabuton. Paano?

Binagbinaga ang ginsiling ni Jehova kay Abraham: “Dalha palihug ang imo anak, ang imo bugtong nga anak nga si Isaac nga imo gid ginahigugma, kag . . . ihalad mo sia didto bilang dulot nga sinunog.” (Genesis 22:2, NW) Ginpatuhuyan ni Jehova si Isaac bilang anak nga “imo gid ginahigugma.” Nahibaluan ni Jehova nga ginahigugma gid ni Abraham si Isaac. Ginahigugma man ni Jehova ang iya Anak nga si Jesus, amo nga duha ka beses sia nga naghambal gikan sa langit, nga nagapatuhoy kay Jesus nga “akon Anak, ang hinigugma.”—Marcos 1:11; 9:7.

Ginsambit man ni Jehova sa iya sugo kay Abraham ang tinaga nga “palihug.” Suno sa isa ka iskolar sang Biblia, ang paggamit sang Dios sini nga tinaga nagapakita nga “nahibaluan sang GINUO kon daw ano ka serioso sang iya sugo.” Siempre, nasubuan gid si Abraham sa sini nga sugo; gani mahunahuna naton ang kasakit nga nabatyagan ni Jehova samtang ginatan-aw niya ang iya pinalangga nga Anak nga nagaantos asta mapatay. Amo ini ang pinakamasakit nga naeksperiensiahan ukon maeksperiensiahan ni Jehova.

Mahimo wala kita nanamian sa sugo ni Jehova kay Abraham, pero dumduma nga wala gintugutan ni Jehova nga dayunon sining matutom nga patriarka ang paghalad. Ginluwas niya si Isaac para malikawan ni Abraham ang pinakamasakit nga maagihan sang isa ka ginikanan. Pero, wala ginproteksionan ni Jehova ang “iya kaugalingon nga Anak kundi ginhatag niya sia para sa aton tanan.” (Roma 8:32) Ngaa gintugutan ni Jehova nga maeksperiensiahan ini nga kasakit? Para “maagom naton ang kabuhi.” (1 Juan 4:9) Nagapahanumdom ini sang gugma sang Dios sa aton! Wala bala kita napahulag nga higugmaon man sia? *

[Mga Nota]

^ par. 5 Wala ginatudlo sang Biblia nga ang Dios nangin amay ni Jesus paagi sa isa ka babayi. Sa baylo, nagtuga si Jehova sang isa ka espiritu nga tinuga, nga sang ulihi ginpadala sa duta kag natawo paagi sa birhen nga si Maria. Gani bilang Manunuga ni Jesus, nagakaigo nga ang Dios tawgon nga iya Amay.

^ par. 8 Para sa dugang nga impormasyon kon ngaa kinahanglan mapatay si Jesus kag kon paano naton mapakita ang aton apresasyon sa sini, basaha ang kapitulo 5 sang libro nga Ano Gid ang Ginatudlo Sang Biblia?