Magdiretso sa kaundan

Magdiretso sa listahan sang kaundan

Mga Dulunan nga Indi Makaupang

Mga Dulunan nga Indi Makaupang

 Mga Dulunan nga Indi Makaupang

Ginatinguhaan sang mga Saksi ni Jehova nga tamdon sing alalangay ang tanan nga tawo. Ginasunod nila ang ginsiling ni Jesus sa iya mga disipulo: “Tanan kamo mag-ulutod.” (Mateo 23:8) Napamatud-an ini sa duha ka tilipunan sang pagsimba sang mga Saksi—ang isa sa Portugal kag ang isa sa Espanya.

ANG napaderan nga siudad sang Valença do Minho, sa naaminhan nga Portugal, gintukod sa magamo nga tion. Makita gikan sa mga pader sini ang Minho River, nga dulunan sang Espanya kag Portugal. Sa tabok sang suba, nahamtang ang isa ka siudad sang Espanya nga Tui, nga may katedral nga daw pader. Ang panguna nga mga pader sang Tui kag Valença gintukod sang ika-17 nga siglo, sang nagainaway ang Espanya kag Portugal.

Sang 1995, ginkuha na ang mga dulunan kag ang kontrol sang customs sa sining duha ka pungsod sang European Union. Pero indi lang ini ang dapat himuon para maghiusa ang mga tawo. Dapat man bag-uhon ang hunahuna kag balatyagon. Ini nga paghiusa napamatud-an sa isa ka gamay kag matahom nga tilipunan sa pagsimba sa Valença nga ginatawag Kingdom Hall sang mga Saksi ni Jehova, nga ginagamit sang Espanyol kag Portuguese nga kongregasyon sang mga Saksi.

Sang 2001, ang mga Saksi sa Tui nagakinahanglan sing bag-o nga Kingdom Hall. Kinahanglan sila maghalin sa ila ginaarkilahan nga tilipunan, pero kulang ang ila kuarta para magpatindog sang bag-o nga tilipunan. Indi man sila makasarang mag-arkila kay diutay lang sila. Gani ginpangabay sang Espanyol nga mga Saksi ang Portuguese nga mga Saksi sa Valença kon puede nila magamit ang ila tilipunan, nga pila lang ka kilometro halin sa sentro sang Tui.

“Gin-istoryahan namon ini sa amon miting sang Disiembre 2001,” siling ni Eduardo Vila nga miembro sang Tui Congregation sa Espanya. “Pagkatapos sang miting, nabatyagan ko  nga gintandog ni Jehova ang tagipusuon sang amon kauturan nga Portuguese. Nangabudlay sila para mapatindog ang ila matahom nga Kingdom Hall, kag napabakod ang amon pagtuo kay handa nila ini nga ipagamit sa amon.”

“Gin-abiabi namon ang Espanyol nga mga kauturan sa amon Kingdom Hall,” siling ni Américo Almeida, isa ka Portuguese nga Saksi nga ara man sadto nga miting. “Nagasalig kami nga pakamaayuhon ni Jehova ini nga kahimusan, kag nakahimo kami sing desisyon nga gin-ugyunan sang tanan.” Maayo gid ang pagtamdanay sang Espanyol kag Portuguese nga mga Saksi. “Wala na namon natalupangdan nga indi pareho ang amon nasyonalidad. Daw mag-ulutod na kami,” siling ni Paolo nga taga-Valença.

Ang isa nga matalupangdan dayon sa sulod sang Kingdom Hall amo ang duha ka relo sa likod, nga indi pareho ang oras. Ang Espanya abanse sing isa ka oras sa Portugal, kag daw sa sini lang nga butang indi sila pareho. Sang kalay-uhon ang tilipunan, gindumalahan sang Regional Building Committee sa Espanya ang mga nagatrabaho nga naghalin sa duha ka kongregasyon. “Madamo nga eksperiensiado nga mga Saksi sa Espanya ang nagbulig sa amon. Ang pila sa ila naglakbay sing sobra 160 kilometros,” siling ni Paolo. “Ini nga proyekto nagpasuod sa duha ka kongregasyon.”

 Binagbinagon naton ang isa pa ka halimbawa.

Paghiusa sa Gintunga nga Lugar

Ang Puigcerdá, isa ka siudad sa dulunan sang Espanya kag Pransia. Nahamtang ini sa sentro sang mabungahon nga lugar nga napalibutan sang kabukiran sang Pyrenees. Ang bilog nga lugar, nga ginatawag Cerdaña, bahin anay sang Espanya. Pero sang 1659, paagi sa kasugtanan nga ginatawag Treaty of the Pyrenees, ginhatag sang Espanya ang katunga sang Cerdaña sa Pransia.

Subong, ang mga Pranses nagapamalaklon sa Puigcerdá, nga panguna nga siudad sa Cerdaña. Kag sugod sang 1997, ginpagamit sang mga Saksi ni Jehova sa Puigcerdá ang ila Kingdom Hall sa Pranses nga mga Saksi. Sina nga tuig, ang Pranses nga mga Saksi ginpahalin sa ila ginaarkilahan nga tilipunan. Ang pinakamalapit nga Kingdom Hall sa Pransia mga isa ka oras ang biyahe, kag kon tigtulugnaw, ang bukid nga ginaagyan pakadto didto masami ginakulapan sing niebe.

Sang ginsugid sang Pranses nga mga Saksi nga kinahanglan nila ang tilipunan, nagpasugot dayon ang Espanyol nga mga Saksi nga ipagamit ang ila Kingdom Hall. “Nalipay gid ang Espanyol nga mga Saksi nga ipagamit ang ila tilipunan,” siling ni Prem, isa ka Saksi sa sina nga lugar. “Siempre ini nga kinaiya natun-an namon sa Biblia halin pa sang una. Duha lang ka semana ang nagligad, nagabuslanay na kami sa paggamit sang amon Kingdom Hall, kag 13 ka tuig na namon ini nga ginahimo.”

“Nalipay gid kami kay sa Puigcerdá ang amon Kingdom Hall,” siling ni Eric, nga manugdumala sa Pranses nga kongregasyon. “Nadumduman ko pa ang pag-abiabi sa amon sang Espanyol nga kongregasyon. Gindekorasyunan nila sang bulak ang ila tilipunan kag may karatula nga, ‘Ginaabiabi namon kamo, pinalangga nga mga kauturan.’”

“Abi sang mga tawo nadula na ang kongregasyon sa Pransia kay wala na sang Kingdom Hall didto,” siling pa ni Eric. “Pero narealisar nila nga nagsala sila kay padayon kami nga nagawali sa Pransia kag nagapanagtag sing imbitasyon para sa amon pagtilipon sa Espanya. Nalipay ang mga interesado sa pagtambong sa amon tilipunan sa Espanya. Luwas sini, bangod ginapagamit sa amon sang Espanyol nga mga Saksi ang ila tilipunan, nagsuod pa gid kami. Madugay na namon nahibaluan nga may Espanyol nga kongregasyon sa pihak nga dulunan, pero wala kami gawa sing kontak sa ila. Subong nga pirme na kami nagakitaay, wala na kami nagabatyag nga nagaisahanon sa sini nga lugar.”

 Indi bala sila magsahuay bangod sa ila kultura? “Sang nahibaluan namon nga hiwaton sa Espanya ang amon pagtilipon, nabalaka gid ako,” siling sang otsentahon nga Pranses nga Saksi. “Pero nagapasalamat kami kay maabiabihon kag mainabyanon ang mga Saksi sa Puigcerdá, gani wala gid kami sing problema. Nagpabakod pa ini sa amon paghiusa bilang mga alagad ni Jehova.”

Ang Paagi Para Maghiusa

Ang mga nagtukod sang European union nagsiling nga ang miembro nga mga pungsod “nagahimo gid sing pamaagi para maghiusa ang mga tawo sa Europa.” Para mahimo ini, gindula na ang mga dulunan sang dekada 1980 kag 1990. Pero para maghiusa ang mga tawo, dapat man bag-uhon ang ila hunahuna.

Ginatinguhaan gid sang mga Saksi ni Jehova nga dulaon ang pagpasulabi kag dumot. Naintiendihan nila nga mas maayo kon lainlain ang ila ginhalinan kag nga “ang Dios wala sing ginapasulabi.” (Binuhatan 10:34) Sa ila internasyonal nga mga kombension kag mga Kingdom Hall, narealisar nila kon ‘daw ano kaayo kag katahum sang mag-ulutud nga nagapuyo sing tingub sa paghiliusa!’ (Salmo 133:1) Ang paghiusa sang mga Saksi sa Valença kag Puigcerdá upod sa ila mga kauturan sa kaingod nga mga pungsod isa ka pamatuod sini.

[Blurb sa pahina 13]

“Wala na namon natalupangdan nga indi pareho ang amon nasyonalidad. Daw mag-ulutod na kami”

[Blurb sa pahina 14]

“Ini nga proyekto nagpasuod sa duha ka kongregasyon”

[Blurb sa pahina 15]

‘Daw ano kaayo kag katahum sang mag-ulutud nga nagapuyo sing tingub sa paghiliusa!’ SALMO 133:1

[Retrato sa pahina 12, 13]

Ang Tui kag Minho River kon tan-awon halin sa napaderan nga siudad sang Valença do Minho

[Retrato sa pahina 14]

Pagkay-o sang Kingdom Hall

[Retrato sa pahina 15]

Ang Cerdaña kag ang kabukiran sang Pyrenees

[Retrato sa pahina 15]

Espanyol kag Pranses nga mga manugdumala sang duha ka kongregasyon nga nagatipon sa Kingdom Hall sa Puigcerdá