Magdiretso sa kaundan

Magdiretso sa listahan sang kaundan

Dapat Bala Bunyagan ang mga Lapsag?

Dapat Bala Bunyagan ang mga Lapsag?

 Pamangkot sang mga Bumalasa . . .

Dapat Bala Bunyagan ang mga Lapsag?

▪ “Nahadlok ako kay basi ang akon manghod nga si John nagkadto sa Limbo,” siling ni Victoria. Ngaa nahadlok gid sia? “Napatay si John nga wala mabunyagan,” siling niya, “kag bangod sini, siling sang pari sang Katoliko, magapabilin sia sa Limbo asta san-o.” Makahaladlok gid ini. Pero ginatudlo bala sang Biblia nga ang mga bata nga napatay nga wala nabunyagan ukon nabawtismuhan magapabilin sa Limbo asta san-o?

Ginatudlo sang Biblia nga ang mga Cristiano dapat magpabawtismo. Ginsugo ni Jesus ang iya mga sumulunod: “Maghimo [kamo] sang mga disipulo sa mga tawo sang tanan nga pungsod, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20) Talupangda nga ang mga nabawtismuhan dapat mga disipulo ni Jesus. Buot silingon, nagtuon sila parte kay Jesus kag nagdesisyon nga sundon sia. Ini nga desisyon indi mahimo sang mga lapsag.

Pero, madamo ang nagasiling nga nalakip sa sini nga sugo ang mga lapsag. “Ang tanan dapat bawtismuhan, pati na ang mga lapsag,” siling sang Lutheran nga pastor nga si Richard P. Bucher. Nagsiling pa sia: “Kon indi sila mabawtismuhan indi mapatawad ang ila mga sala kag magaantos sila sa impierno.” Pero ini nga ideya wala nagaugyon sa mga panudlo ni Jesus. Binagbinagon naton ang tatlo sa sini.

Una, wala gintudlo ni Jesus nga dapat bawtismuhan ang mga lapsag. Ngaa? Gintudluan sing maayo ni Jesus ang iya mga disipulo parte sa mga ginapatuman sang Dios. Kon kaisa, ginasulitsulit pa niya ang importante nga mga panudlo. Ngaa? Para mapat-od nga naintiendihan ini sang iya mga disipulo. (Mateo 24:42; 25:13; Marcos 9:34-37; 10:35-45) Pero, wala gid sia nagtudlo nga dapat bawtismuhan ang mga lapsag. Imposible nga nalipatan lang ini ni Jesus! Kay kon dapat bawtismuhan ang mga lapsag, sigurado nga ginhambal niya ini.

Ikaduha, wala gintudlo ni Jesus nga may mga tawo nga magaantos sa tapos sila mapatay. Nagapati sia sa ginasiling sang Biblia: “Ang buhi nakahibalo nga mapatay sila, apang ang patay wala makahibalo sang bisan ano.” (Manugwali 9:5) Nahibaluan ni Jesus nga ang mga patay wala nagaantos sa purgatoryo, Limbo, impierno, ukon sa iban pa nga lugar. Sa baylo, gintudlo niya nga wala na sila sing hinalung-ong, pareho sang nagakatulog.—Juan 11:1-14.

Ikatlo, gintudlo ni Jesus nga “ang tanan nga yara sa handumanan nga mga lulubngan” mabuhi liwat. (Juan 5:28, 29) Nalakip sa sini ang minilyon nga wala nabawtismuhan. Kon mabanhaw na sila, may kahigayunan sila nga makatuon sa mga ginapatuman sang Dios kag mabuhi sing wala katapusan sa Paraiso nga duta. *Salmo 37:29.

Gani, maathag nga wala ginatudlo sang Biblia nga dapat bunyagan ang mga lapsag.

[Nota]

^ par. 8 Para sa dugang nga impormasyon parte sa Paraiso nga duta kag sa paglaum nga pagkabanhaw, basaha ang kapitulo 3 kag 7 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.