Magdiretso sa kaundan

Magdiretso sa listahan sang kaundan

Paano Ka Mangin Suod sa Dios?

Paano Ka Mangin Suod sa Dios?

 Magtuon sa Pulong sang Dios

Paano Ka Mangin Suod sa Dios?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ginapamatian bala sang Dios ang tanan nga pangamuyo?

Ginaagda ni Jehova ang mga tawo sa tanan nga pungsod nga makigsuod sa iya paagi sa pangamuyo. (Salmo 65:2) Pero may mga pangamuyo nga wala niya ginapamatian. Halimbawa, sang sulitsulit nga naghimo sing malain ang mga Israelinhon, wala ginpamatian sang Dios ang ila mga pangamuyo. (Isaias 1:15) Kon ginamaltratar sang bana ang iya asawa, mahimo masablagan ang iya mga pangamuyo. (1 Pedro 3:7) Pero pamatian sang Dios ang mga makasasala kon maghinulsol sila.—Basaha ang 2 Cronica 33:9-13.

2. Paano kita dapat mangamuyo?

Pribilehiyo naton nga makapangamuyo kag bahin ini sang aton pagsimba, gani kay Jehova lang kita dapat mangamuyo. (Mateo 4:10; 6:9) Indi kita perpekto, gani dapat kita mangamuyo sa ngalan ni Jesus bangod sia ang gintangdo nga “dalan.” (Juan 14:6) Indi gusto ni Jehova nga sulitsuliton naton ang nasaulo ukon nasulat nga mga pangamuyo, kundi dapat naton ipabutyag sa iya ang aton ginabatyag.—Basaha ang Mateo 6:7; Filipos 4:6, 7.

Ginapamatian sang aton Manunuga bisan ang mahipos nga pangamuyo. (1 Samuel 1:12, 13) Ginaagda niya kita nga mangamuyo sa tanan nga tion—sa pagbugtaw, antes magtulog, antes magkaon, kag kon may mga problema.—Basaha ang Salmo 55:22; Mateo 15:36.

3. Ngaa nagahiwat sing pagtilipon ang mga Cristiano?

Indi mahapos nga makigsuod sa Dios bangod ara sa palibot naton ang mga tawo nga wala sing pagtuo sa Dios kag nagabalewala sa iya promisa nga paghidait sa duta. (2 Timoteo 3:1, 4; 2 Pedro 3:3, 13) Para mapabakod kita, dapat kita makig-upod sa aton mga masigkasumilimba.—Basaha ang Hebreo 10:24, 25.

Mangin suod ka sa Dios kon makig-abyan ka sa mga tawo nga nagahigugma sa iya. Paagi sa pagtambong sa pagtilipon sang mga Saksi ni Jehova, mapabakod ka sang pagtuo sang iban.—Basaha ang Roma 1:11, 12.

  4. Paano ka mangin suod sa Dios?

Mangin suod ka kay Jehova kon pamalandungan mo ang imo natun-an sa Biblia. Pamalandungi ang mga hinimuan, paggiya, kag mga promisa sang Dios. Paagi sa pangamuyo kag pagpamalandong, maapresyar mo ang iya gugma kag kaalam.—Basaha ang Josue 1:8; Salmo 1:1-3.

Mangin suod ka lamang sa Dios kon magsalig ka kag magtuo sa iya. Pero ang pagtuo kinahanglan pabakuron pirme. Para mahimo ini, dapat padayon mo nga usisaon ang imo mga ginapatihan.—Basaha ang 1 Tesalonica 5:21; Hebreo 11:1, 6.

5. Paano ka makabenepisyo sa pagpakigsuod sa Dios?

Ginaulikdan ni Jehova ang mga nagahigugma sa iya. Ginaproteksionan niya sila sa mga butang nga makahalit sa ila pagtuo kag paglaum nga kabuhi nga wala sing katapusan. (Salmo 91:1, 2, 7-10) Ginapaandaman kita ni Jehova sang mga butang nga makahalit sa aton panglawas kag makadula sang aton kalipay. Ginatudluan niya kita sang pinakamaayo nga paagi sang pagkabuhi.—Basaha ang Salmo 73:27, 28; Santiago 4:4, 8.

Para sa dugang nga impormasyon, basaha ang kapitulo 17 sini nga libro, Ano Gid ang Ginatudlo Sang Biblia? nga ginhimo sang mga Saksi ni Jehova.