Magdiretso sa kaundan

Magdiretso sa listahan sang kaundan

Ngaa Importante ang Eden Para sa Imo?

Ngaa Importante ang Eden Para sa Imo?

 Ngaa Importante ang Eden Para sa Imo?

DAW katingalahan nga siling sang pila ka iskolar, wala na sang iban pa nga tulun-an sa Biblia nga nagasambit sang parte sa Eden. Halimbawa, ang propesor sang Religious Studies nga si Paul Morris, nagsulat: “Wala na ginsambit sa ulihi nga mga bahin sang Biblia ang parte sa Eden.” Bisan pa ugyon sa sini ang madamo nga “eksperto,” lain ang ginapakita sang Biblia.

Ang matuod, madamo nga beses nga ginsambit sa Biblia ang hardin sang Eden, sanday Adan kag Eva, kag ang man-ug. * Pero, ang sala nga paghangop sang pila ka iskolar diutay lang kon ikomparar sa isa ka mas mabug-at pa nga sala. Bangod ginduhaduhaan sang mga lider sang relihion kag sang mga komentarista sa Biblia ang ginasugid sang Genesis parte sa hardin sang Eden, pareho lang nga ginduhaduhaan man nila ang bilog nga Biblia. Paano?

Dapat maintiendihan naton ang natabo sa Eden para maintiendihan man naton ang bilog nga Biblia. Halimbawa, mabuligan kita sang Biblia nga makita ang mga sabat sa makalilibog kag importante nga mga pamangkot. Ang sabat sang Biblia may kahilabtanan pirme sa natabo sa hardin sang Eden. Binagbinaga ang pila ka halimbawa.

Ngaa nagatigulang kita kag nagakapatay? Indi gid tani mapatay sanday Adan kag Eva kon padayon sila nga nagtuman kay Jehova. Mapatay lang sila kon magrebelde sila. Sa adlaw nga nagrebelde sila, nagpadulong sila sa kamatayon. (Genesis 2:16, 17; 3:19) Indi na sila perpekto kag mapanubli sang ila mga anak ang sala kag pagkadi-perpekto. Ang Biblia nagsiling: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.”—Roma 5:12.

Ngaa gintugutan sang Dios ang kalainan? Sa hardin sang Eden, nagsiling si Satanas nga ang Dios butigon kag indi niya gusto ihatag ang maayo sa iya mga tinuga. (Genesis 3:3-5) Ginhangkat niya kon bala matarong ang paagi ni Jehova sa paggahom. Sanday Adan kag Eva nagsunod kay Satanas. Gani, ginsikway man  nila ang pagkasoberano ni Jehova kag nangangkon nga ang tawo makadesisyon kon ano ang maayo kag malain para sa iya kaugalingon. Bangod perpekto ang hustisya kag kaalam ni Jehova, kabalo sia nga isa lang ang husto nga paagi sa pagsabat sini nga hangkat. Paligaron niya anay ang bastante nga panahon, para magamhan sang tawo ang iya kaugalingon suno sa iya gusto. Ang malain nga mga nagakatabo, nga mahimo resulta man sang impluwensia ni Satanas, amat-amat nga nagpakita sini nga kamatuoran: Indi masarangan sang tawo nga gamhan ang iya kaugalingon nga wala ang bulig sang Dios.—Jeremias 10:23.

Ano ang katuyuan sang Dios sa duta? Sa hardin sang Eden, ginpakita ni Jehova kon ano ang gusto niya nga mangin kahimtangan sang duta. Para mangin matahom man kag nahiusa ang bilog nga duta, ginsugo niya sanday Adan kag Eva nga pun-on ini sang ila kaanakan kag “magpakaagalon” sa sini. (Genesis 1:28) Gani katuyuan sang Dios nga ang duta mangin paraiso nga istaran sang perpekto kag nahiusa nga pamilya sang mga anak nanday Adan kag Eva. Ang paagi sang Dios para matuman ining katuyuan mabasa sa kalabanan nga bahin sang Biblia.

Ngaa nagkari si Jesucristo sa duta? Ang pagrebelde sa hardin sang Eden nagresulta sa kamatayon nanday Adan kag Eva, pati sang ila kaanakan. Pero mahigugmaon nga naghatag ang Dios sing paglaum. Ginpadala niya ang iya Anak sa duta para maghatag sang ginatawag sa Biblia nga gawad. (Mateo 20:28) Ano ang buot silingon sini? Si Jesus amo “ang katapusan nga Adan,” kay ginhimo niya ang wala mahimo ni Adan. Nagpabilin nga perpekto si Jesus bangod wala gid niya ginsupak si Jehova. Ginhatag niya ang iya kabuhi bilang halad, ukon gawad. Paagi sa sini, ang tanan nga matutom mapatawad sa ila mga sala kag mabuhi pareho nanday Adan kag Eva sa Eden sang wala pa sila makasala. (1 Corinto 15:22, 45; Juan 3:16) Gani, gingarantiyahan ni Jesus nga matuman ang katuyuan ni Jehova nga ang duta mangin paraiso pareho sa Eden. *

Ang katuyuan sang Dios maathag, kag indi isa ka panudlo nga kagamo intiendihon. Matuod gid ini. Ang hardin sang Eden isa ka matuod nga lugar diri sa duta, nga may matuod nga mga sapat kag mga tawo. Gani ang promisa sang Dios masaligan gid kag madali na lang matuman. Matigayon mo bala ini? Depende ina sa imo. Gusto gid sang Dios nga amo sini ang palaabuton sang tanan nga tawo, pati ang mga nagpalayo sa iya.—1 Timoteo 2:3, 4.

Sang dali na lang mapatay si Jesus, gin-istorya niya ang isa ka kriminal, kag bal-an sang kriminal nga dapat sia mapatay. Pero, nangayo sia sing lugpay kag paglaum kay Jesus. Si Jesus nagsabat: “Mangin kaupod ko ikaw sa Paraiso.” (Lucas 23:43) Kon gusto ni Jesus nga mabanhaw kag may kahigayunan nga mabuhi sing dayon sa paraiso nga pareho sa Eden ang isa anay ka kriminal, gusto bala niya nga ato ka man didto? Siempre! Gusto man ini sang iya Amay! Kon gusto mo ini nga palaabuton, tun-i sing maayo ang parte sa Dios nga naghimo sang hardin sang Eden.

[Mga Footnote]

^ par. 8 Para sa dugang nga impormasyon parte sa gawad ni Jesus, basaha ang kapitulo 5 sang libro nga Ano Gid ang Ginatudlo sang Biblia? nga ginahimo sang mga Saksi ni Jehova.

 [Kahon/Mga piktyur sa pahina 10]

ANG TAGNA NGA AMO ANG PANGUNA NGA TEMA SANG BIBLIA

“Butangan ko sing kaawayon sa tunga mo [ang man-ug] kag sang babayi, kag sa tunga sang imo kaliwat [“binhi,” NW] kag sang iya kaliwat [“binhi,” NW]; sia magadugmok sang imo olo kag dugmokon mo ang iya tikod.”—Genesis 3:15.

Amo ini ang una nga tagna sa Biblia nga ginhambal sang Dios sa Eden. Sin-o ining apat ka karakter: ang babayi, ang iya binhi, ang man-ug, kag ang iya binhi? Ngaa may “kaawayon” sa tunga nila?

ANG MAN-UG

Si Satanas nga Yawa.—Bugna 12:9.

ANG BABAYI

Ang organisasyon sang mga tinuga ni Jehova sa langit. (Galacia 4:26, 27) Nagtagna si Isaias nga ang “babayi,” magabun-ag sang isa ka espirituwal nga pungsod.—Isaias 54:1; 66:8.

ANG BINHI SANG MAN-UG

Ang hungod nga nagahimo sang gusto ni Satanas.—Juan 8:44.

ANG BINHI SANG BABAYI

Ang panguna nga bahin sini amo si Jesucristo, nga naghalin sa organisasyon ni Jehova sa langit. Lakip man sa “binhi” ang espirituwal nga mga utod ni Cristo, nga makaupod niya nga magahom sa langit. Ining ginpili sang Dios nga mga Cristiano mangin espirituwal nga pungsod, ang “Israel sang Dios.”—Galacia 3:16, 29; 6:16; Genesis 22:18.

PAGDUGMOK SA TIKOD

Isa ka masakit nga pag-igo sa Mesias, pero indi permanente ang epekto sini. Nagmadinalag-on si Satanas sa pagpatay kay Jesus sa duta. Pero nabanhaw si Jesus.

PAGDUGMOK SA ULO

Isa ka makamamatay nga igo kay Satanas. Laglagon ni Jesus si Satanas kag indi na gid sia mabuhi liwat. Antes sini, kay-uhon ni Jesus ang tanan nga kalainan nga ginsugdan ni Satanas sa Eden.—1 Juan 3:8; Bugna 20:10.

Para sa sumaryo sang panguna nga tema sang Biblia, basaha ang brosyur nga Ang Biblia—Ano ang Mensahe Sini? nga ginahimo sang mga Saksi ni Jehova.

[Piktyur sa pahina 11]

Gin-antos nanday Adan kag Eva ang resulta sang sala