Magdiretso sa kaundan

Magdiretso sa listahan sang kaundan

Isa ka Adlaw sa Baybay

Isa ka Adlaw sa Baybay

 Sulat Halin sa Grenada

Isa ka Adlaw sa Baybay

KON makabaton ka sing asaynment nga mangin misyonero sa iban nga pungsod, mahimo nga excited ka katama. Pareho sang isa ka inosente nga bata, gusto mo mahibaluan kon ano ang mga tawo, lugar, kag mga eksperiensia nga imo maatubang sa pagwali didto.

Sang gin-asayn kami nga mag-asawa sa Grenada, isa ka lugar nga may mga 45 ka matahom nga baybayon, ginapensar namon kon ano ang hitsura sini. Nag-abot gid man ang tion nga naeksperiensiahan namon ang makalilipay nga adlaw sa isa sining mga baybayon, pero indi lamang bangod sa silak sang adlaw kag mga balod kundi bangod sa mga tawo.

Malapit lang ang Grand Anse Beach sa amon ginaistaran sa Grenada, pero makalilipay ang amon biyahe! Ang dalan nagalikoliko, gani makita namon ang matahom gid nga mga talan-awon. Berde katama ang mga bakulod sa palibot. Halos kada liko namon, may makita kami nga mga kabukiran, kagulangan, busay, kag matahom nga view sang dagat. Amo kon ngaa madamo nga turista sa bilog nga kalibutan ang nagakadto diri! Tuman katahom sang palibot, gani dapat maghalong ang drayber kay basi mawili sia. Makitid katama ang nagalikoliko nga mga dalan, amo nga kon kaisa daw indi mapatihan nga makaigo ang nagasugat-anay nga mga salakyan.

Nag-abot kami sa Convention Trade Center, nga ara lang sa higad sang dalan malapit sa Grand Anse Beach. Dugaydugay, nag-abot ang grupo sang mga 600 ka Saksi ni Jehova para sa isa ka adlaw sang malipayon nga pag-updanay kag pagpamati sa ginatudlo sang Biblia. Halandumon gid ini nga adlaw para sa setentahon na nga mag-asawa nga sanday Lesley kag Daphne. Si Lesley magapabawtismo kag madugay na ini ginahulat ni Daphne, kay sang 1958 pa sia nabawtismuhan subong isa sa mga Saksi ni Jehova.

Para sa mga Saksi, ang bawtismo—nga ginahimo paagi sa pagtum-oy sa tubig—may daku nga kahulugan. Himuon ini kon ang isa ka tawo makatuon na sing sibu nga ihibalo sang kamatuoran sa Biblia kag ginasunod ini sa iya kabuhi. Isa ini ka seremonya diin ginapakita sang isa sa publiko nga ginadedikar na niya ang iya kabuhi kay Jehova nga Dios.

Ako ang magapamulongpulong nga magapaathag sa tumalambong kon ano ang ginasiling sang Biblia parte sa bawtismo. Pagkatapos sini, nagtindog si Lesley upod sa duha pa nga bawtismuhan man. Nagasuksok sia sing mahipid nga puti nga polo, nakakurbata,  kag nagayuhum sia. Namangkot ako: “Ginhinulsulan mo na bala ang imo mga sala kag gindedikar ang imo kaugalingon kay Jehova nga himuon ang iya kabubut-on?” Mabatyagan gid ang ila debosyon kag pagkasinsero sang sia kag ang iya duha ka upod nagsabat sing “Huo!”

Sang nahibaluan ko ang istorya sang kabuhi ni Lesley, natandog gid ako. Sa sulod sang mga dekada, wala gid sia nagtuon sing Biblia asta nga nakakadto sila nga mag-asawa sa iban nga isla. Samtang ato sila didto, nagsugtanay sila nga masigkadto sa ila relihion. “Kadto ka sa inyo simbahan, kay makadto man ‘ko sa amon,” siling ni Lesley kay Daphne.

Gindul-ong lang ni Lesley si Daphne sa Kingdom Hall kag nagdiretso sia sa simbahan sang mga Anglikano sa amo man nga lugar. Pagkatapos sang iya pagsimba, ginsugat ni Lesley ang iya asawa sa Kingdom Hall. Pag-abot niya didto, gin-abiabi sia sang mainabyanon nga mga tawo bisan bag-o pa lang sila nagkilalahay. Natandog gid si Lesley. Sa ila simbahan, wala gid sing nagbugno sa iya. “Indi na gid ‘ko magbalikbalik sa amon simbahan,” siling ni Lesley kay Daphne. “Wala gid sing nagsapak sa akon, bisan ang pari. Nagsulod ako kag naggua nga wala gid sing nagtamyaw sa akon.” Amo na ato ang katapusan nga pagsimba ni Lesley sa ila simbahan.

Dayon, gintun-an ni Lesley sing serioso ang Pulong sang Dios. Kag subong, handa na sia nga magpabawtismo. Ang mga pagabawtismuhan nagkadto sa baybay, kag nagasunod kami sa ila. Bangod malapit lang ang dagat, indi na kinahanglan magbutang sing pool pareho sa ginahimo sa kalabanan nga kombension sang mga Saksi ni Jehova. Diri, ang baybay ara lang sa tabok sang dalan.

Ang Grand Anse Beach isa ka matahom nga baybay nga nagalaba sing mga tres kilometros, puti ang balas, kag matin-aw ang tubig. Natingala ang mga turista sang nag-abot ang amon grupo sa baybay, kay ang mga lalaki pormal ang bayo kag nakakurbata, kag ang mga babayi naman nakapalda. Nag-ilis si Lesley sing T-shirt kag short. Daku gid ang kalipay ni Daphne sang nakita niya ang iya bana nga nagpabawtismo pagligad sang mga 50 ka tuig nga ginbawtismuhan sia! Kon ano kainit ang adlaw, amo man katam-is ang iya yuhum. Pati ang mga turista nagbuylog sa kalipay sini nga okasyon. Nagpamalakpak man sila samtang ginahimo ang pagbawtismo.

Ang asul nga kalangitan, puti nga balas, kag mga balod sa sini nga baybay nagahimaya na sa Manunuga. Pero labi pa gid nga kahimayaan ang nahatag sini sang magtakas ang tatlo ka ginbawtismuhan. Nalipay gid kami samtang ginatan-aw namon sila. Tuman gid ka pinasahi ini nga adlaw. Kag indi gid malipatan nanday Lesley kag Daphne ining isa ka adlaw sa baybay.