Magdiretso sa kaundan

Magdiretso sa listahan sang kaundan

Ano ang Ginakahadlukan sang mga Tawo?

Ano ang Ginakahadlukan sang mga Tawo?

 Ano ang Ginakahadlukan sang mga Tawo?

“Bisan indi ka relihioso, mabatyagan mo nga nagapadulong na kita sa kalaglagan.”—STEPHEN O’LEARY, ASSOCIATE PROFESSOR SANG UNIVERSITY OF SOUTHERN CALIFORNIA. *

KOMPORME ka bala sa sini? Mabasa mo sa sini nga mga artikulo kon ngaa nahadlok ang mga tawo sa palaabuton. Pero, binagbinagon man sini kon ngaa makasalig ka nga ang aton duta kag ang kabuhi diri indi gid malaglag. Gani may rason kita nga maglaum bisan pa makakululba ang masunod nga mga hitabo.

Daku ang posibilidad nga matabo ang nuklear nga inaway. Sang 2007, ang Bulletin of the Atomic Scientists nagpaandam: “Sugod sang ginbombahan ang Hiroshima kag Nagasaki, ang bilog nga kalibutan pirme na ginakulbaan.” Ngaa? Kay sang 2007, suno sa Bulletin, may ara pa mga 27,000 ka nuklear nga mga armas kag ang 2,000 sini “nakahanda na nga palukpon sa pila lang ka minutos.” Bisan pila lang ang palukpon, grabe gid ang halit nga mahimo sini!

Nabuhinbuhinan bala ang posibilidad sang nuklear nga inaway sugod sadto? Ang lima ka pungsod nga may pinakamadamo nga armas nuklear—ang China, Pransia, Rusya, United Kingdom, kag Estados Unidos—“nakahanda na sang ila bag-o nga mga armas nuklear ukon nagpahibalo nga magahanda sila,” siling sang SIPRI Yearbook 2009. * * Pero ang yearbook nagsiling nga indi lang ini nga mga pungsod ang may mga armas nuklear. Ginabulubanta sang mga researcher nga may tig-60 asta 80 ka bomba nuklear ang India, Pakistan, kag Israel. Nagsiling man ini nga sa bug-os nga kalibutan, 8,392 ka armas nuklear ang nagahulat na lang nga palukpon!

Ang pagbag-o sang klima mahimo magresulta sa kalamidad. “Ang halit nga mahimo sang pagbag-o sang klima,” siling sang Bulletin  of the Atomic Scientists, “halos pareho man kalain sa halit nga mahimo sang mga armas nuklear.” Amo man sini ang ginsiling sang respetado nga mga sientipiko pareho nanday Stephen Hawking, propesor anay sa University of Cambridge, kag Sir Martin Rees, Master sang Trinity College sa University of Cambridge. Nagapati sila nga ang sala nga paggamit sa teknolohiya kag ang malain nga ginahimo sang tawo sa ila palibot makahalit ukon makalaglag pa gani sang kabuhi sa duta.

Nahadlok ang mga tawo sa mga espikulasyon parte sa kalaglagan. Kon i-type mo ang prase nga “end of the world” kag ang tuig “2012” sa isa ka kilala nga internet site, makita mo ang tuman kadamo nga espikulasyon nga mahanabo ang katapusan sa tuig 2012. Ngaa? Ang dumaan nga kalendaryo sang mga Maya nga ginatawag “Long Count,” matapos na sa 2012. Madamo ang nahadlok nga basi amo na ini ang katapusan sang aton kalibutan.

Madamo sang relihioso nga tawo ang nagapati nga ang Biblia nagtudlo nga ang aton planeta nga duta maguba. Nagapati sila nga mapalangit ang tanan nga diosnon nga tawo kag ang mabilin, paantuson sa magamo nga duta ukon itagbong sa impierno.

Ginapakita gid man bala sang Biblia nga ang duta gub-on ukon laglagon? Si apostol Juan nagpaandam: “Indi kamo magpati sa tagsa ka mensahe . . . kundi tilawi ang mga mensahe agod makita kon bala naggikan gid ini sa [Dios].” (1 Juan 4:1) Sa baylo nga magpati dayon sa ginasiling sang iban, ngaa indi mo pagbasahon ang Biblia kag usisaon kon ano ang ginasiling sini parte sa katapusan sang kalibutan? Mahimo makibot ka kon ano ang sabat sini.

[Mga Nota]

^ par. 2 Halin sa artikulo nga “Disasters Fuel Doomsday Predictions,” nga makita sa web site sang MSNBC, Oktubre 19, 2005.

^ par. 5 Ang SIPRI amo ang Stockholm International Peace Research Institute.

^ par. 5 Ang report sang SIPRI Yearbook 2009 ginsulat ni Shannon N. Kile, senior researcher kag head sang nuclear weapons project sang SIPRI Arms Control and Non-proliferation Programme; ni Vitaly Fedchenko, researcher sang SIPRI Arms Control and Non-proliferation Programme; kag ni Hans M. Kristensen, direktor sang nuclear information project sa Federation of American Scientists.

[Picture Credit Lines sa pahina 4]

Mushroom cloud: U.S. National Archives photo; hurricane photos: WHO/League of Red Cross and U.S. National Archives photo