ANO ang kahulugan sang imo ngalan? Sa iban nga bahin sang kalibutan, kinaandan na nga ang ngalan nga ginahatag sa isa ka bata may lainlain nga kahulugan. Mahimo nga ginabase ini sang iya mga ginikanan sa ila pagpati ukon sa handum nila para sa iya.

Halin pa sang una, kinaandan na ang paghatag sing ngalan nga may lainlain nga kahulugan. Sang panahon sang Biblia, ang ngalan sang mga tawo masami nga ginabase sa kahulugan sini. Ang ila ngalan nagapakita kon ano ang ila mangin papel sa ulihi. Halimbawa sang ginsugid ni Jehova kay David kon ano ang mangin papel sang iya bata nga si Solomon, nagsiling si Jehova: “Ngalanan siya nga Solomon [nga nagakahulugan “Paghidait”], kay hatagan ko gid sang kalinong ang Israel sa iya paghari.”—1 Cronica 22:9, Ang Pulong Dios, APD.

Kon kaisa, ginahatagan ni Jehova sing bag-o nga ngalan ang isa ka tawo nga may bag-o nga papel. Ang baog nga asawa ni Abraham ginhatagan sing ngalan nga Sara nga nagakahulugan “Prinsesa.” Ngaa? Si Jehova nagsiling: “Pakamaayohon ko sia, kag labut pa hatagan ko ikaw sa iya sing anak nga lalaki; pakamaayohon ko sia, kag magin-iloy sia sang mga pungsud; mga hari sang mga katawohan magagikan sa iya.” (Genesis 17:16) Naintiendihan naton kon ano ang bag-o nga papel ni Sara kay nahibaluan naton ang kahulugan sang iya bag-o nga ngalan.

Ano naman ang kahulugan sang pinakaimportante nga ngalan—ang Jehova? Sang namangkot si Moises kon ano ang buot silingon sang Iya ngalan, si Jehova nagsabat: “Mangin amo ako sa kon ano nga mangin amo ako.” (Exodo 3:14, NW) Ang translation ni Rotherham nagsiling: “Mangin Amo Ako suno sa luyag ko.” Kon amo, ang kahulugan sang ngalan sang Dios nagapakita nga may lainlain sia nga papel. Sa pag-ilustrar: Ang isa ka iloy may lainlain nga papel para atipanon ang mga kinahanglanon sang iya kabataan. Mahimo sia mangin nars, kusinera, ukon maestra. Amo man sini si Jehova. Para matuman ang iya katuyuan sa katawhan, mahimo niya ang bisan ano nga papel suno sa gusto niya. Gani para makilala gid naton ang ngalan ni Jehova dapat naton maintiendihan kag apresyahon ang iya lainlain nga papel.

Ang maayo nga mga kinaiya sang Dios wala nahibaluan sang mga tawo nga wala nakakilala sa iya ngalan. Pero kon tun-an mo ang Biblia, makita mo nga si Jehova maalam nga Manuglaygay, gamhanan nga Manluluwas, maalwan nga Manug-aman kag madamo pa. Dalayawon gid ang lainlain nga kahulugan sang iya ngalan.

Pero indi pirme mahapos nga makilala ang ngalan sang Dios. Mahibaluan mo sa masunod nga artikulo kon ngaa.