Magdiretso sa kaundan

Magdiretso sa listahan sang kaundan

Ano ang Pagtamod sang mga Saksi ni Jehova sa Interfaith?

Ano ang Pagtamod sang mga Saksi ni Jehova sa Interfaith?

 Pamangkot sang mga Bumalasa . . .

Ano ang Pagtamod sang mga Saksi ni Jehova sa Interfaith?

▪ Ang World Christian Encyclopedia nagsiling nga may “10,000 ka relihion sa bilog nga duta.” Ang indi nila paghangpanay nagresulta sing tuman nga kagamo, gani madamo ang naglaum nga maghangpanay sila paagi sa interfaith. Nagapati sila nga magaresulta ini sing paghidait kag paghiusa.

Ginapalig-on sang Biblia ang paghiusa. Ginpaanggid ni apostol Pablo ang Cristianong kongregasyon sa isa ka lawas, nga ang kada “bahin sini nagaangtanay sing nahisanto kag ginatingob.” (Efeso 4:16) Amo man sini ang ginapalig-on ni apostol Pedro sa mga Cristiano: “Kamo tanan mag-isa sa hunahuna.”—1 Pedro 3:8.

Ang mga Cristiano sang una nagapuyo upod sa mga tawo nga may lainlain nga kultura kag relihion. Pero, sang nagsulat si Pablo parte sa pagpakig-upod sa iban nga mga relihion, namangkot sia: “Ano ang bahin sang isa ka matutom nga tawo sa isa nga di-tumuluo?” Dayon, ginpaandaman niya ang mga Cristiano nga ‘maggua sa tunga nila.’ (2 Corinto 6:15, 17) Maathag nga indi gid ugyon si Pablo sa interfaith. Ngaa?

Ginpaathag niya nga indi gid nagakaigo nga mag-updanay sa pagsimba ang butig kag matuod nga mga Cristiano. (2 Corinto 6:14) Mahalitan lamang sini ang pagtuo sang mga Cristiano. Ang kabalaka ni Pablo pareho sa isa ka amay nga nakahibalo nga salawayon ang pila ka kabataan sa ila palibot. Subong nagakabalaka nga ginikanan, maalamon niya nga ginpaandaman ang iya bata kon kay sin-o lamang sia makig-abyan. Mahimo nga indi ini maluyagan sang iban. Pero, sa sini nga sitwasyon, ang pagpaandam sa iya bata makaamlig sa iya sa malain nga mga impluwensia. Sing kaanggid, nahibaluan ni Pablo nga ang indi pagpakig-upod sa iban nga relihion sa ila pagsimba magaamlig sa mga Cristiano gikan sa ila makahalalit nga mga buhat.

Gin-ilog ni Pablo ang panindugan ni Jesus. Sang ginpakita ni Jesus ang pinakamaayo nga halimbawa para palig-unon ang mga tawo nga mangin mahidaiton, wala niya ini ginhimo paagi sa interfaith. Madamo sang relihioso nga grupo, pareho sang mga Fariseo kag mga Saduceo, ang aktibo sa tion sang ministeryo ni Jesus sa duta. Ang matuod, nag-ugyunay ining relihioso nga mga grupo para hingabuton si Jesus, kag nagplano pa gani nga patyon sia. Sa pihak nga bahin, ginsilingan ni Jesus ang iya mga sumulunod nga “mag-andam . . . sa panudlo sang mga Fariseo kag mga Saduceo.”—Mateo 16:12.

Kamusta sa aton panahon karon? Maaplikar pa bala ang paandam sang Biblia parte sa interfaith? Huo, bangod imposible nga mahiusa ang lainlain nga relihion paagi sa interfaith, pareho sang mantika kag tubig nga ginbutang sa isa ka suludlan. Halimbawa, kon ang lainlain nga relihion magtipon sa pagpangamuyo para sa paghidait, sin-o nga dios ang ila ginapangamuyuan? Ang Trinidad nga Dios sang nagapangangkon nga mga Cristiano? Si Brama sang Hinduismo? Si Budha? Kag iban pa nga mga dios?

Gintagna ni Miqueas nga sa “olihi nga mga adlaw,” ang tanan nga tawo magasiling: “Kari kamo, kag magtukad kita sa bukid sang GINOO, sa balay sang Dios ni Jacob; kag tudloan kita niya sang iya mga dalanon kag magalakat kita sa iya mga banas.” (Miqueas 4:1-4) Ang resulta amo ang paghidait kag paghiusa sa bilog nga duta, indi bangod sang interfaith, kundi bangod ginbaton sang tanan nga tawo ang matuod nga pagtuo.

[Retrato sa pahina 27]

Mga miembro sang dalagku nga mga relihion sa bilog nga duta sa isa ka relihioso nga komperensia sang 2008

[Credit Line]

REUTERS/Andreas Manolis