Magdiretso sa kaundan

Magdiretso sa listahan sang kaundan

Ang Biblia Nagapabag-o sang Kabuhi

Ang Biblia Nagapabag-o sang Kabuhi

 Ang Biblia Nagapabag-o sang Kabuhi

ANO ang ginhimo sang isa ka miembro sang gang kag adik sa marijuana para magbag-o? Ngaa ginpautdan sang isa ka miembro sang heavy metal nga banda ang iya malaba nga buhok kag ngaa ginbayaan niya ang musika nga nanamian gid niya? Paano nangin ministro sang Dios ang isa ka tawo nga nadulaan sing pagsalig sa gobierno kag relihion? Tan-awon naton kon ano ang masiling nila.

‘Nauntat Ko ang Akon Pagkaadik.’—PETER KAUSANGA

EDAD: 32

PUNGSOD: NAMIBIA

KABUHI SANG UNA: MIEMBRO SANG ISA KA GANG KAG ADIK SA MARIJUANA

ANG AKON NAGLIGAD: Nagdaku ako sa Kehemu, isa sa apat ka dalagku nga komunidad sa banwa sang Rundu. Ang palangabuhian sang mga tawo diri amo ang pagbaligya sing millet, kahoy, kag uling.

Ginpadaku ako sang akon lola kay napatay si Nanay sang duha pa lang ako ka tuig. Simple lang ang amon kabuhi. Mabuot ako nga bata, pero bangod sa pagbulubarkada, nakaentra ako sa isa ka gang sa eskwelahan. Bangod sini, pirme kami makakita sing kontra. Nagapangsimusimo man kami, nagapangawat kag nagaismagol sing diamante, nagapahubog, kag nagadroga. Kaduha ako madakpan kag mapriso bangod sa pagpangawat kag pagpanunto.

Wala ako nakatapos hayskul. Sang ulihi nagsaylo ako sa iban nga lugar kag nagpalayo sa akon mga barkada. Gusto ko gid magbag-o. Pero indi ko mauntat ang pag-marijuana. Kon kaisa pila ka kilometros ang ginalakat ko para lang makakuha sing marijuana.

KON PAANO GINBAG-O SANG BIBLIA ANG AKON KABUHI: Sang maaga nga bahin sang 1999, may nakilala ako nga mga Saksi ni Jehova nga nagapanghatag sing mga balasahon sa dalan. Natandog gid ako kay gintratar nila ako sing maayo kag ginhatagan sing importansia. Sang mabasa ko ang mga balasahon nga ginhatag nila, nakumbinse ako nga amo ini ang matuod nga relihion. Gani, gintun-an ko sing maayo ang Biblia kag sang ulihi narealisar ko nga dapat ako magbag-o para mapahamut-an si Jehova nga Dios.

Nagset ako sing petsa kon san-o untaton ang pagpanigarilyo. Dayon ginpanghaboy ko ang tanan nga parapernalya sini. Ginhambalan ko  man ang akon mga amigo nga indi na nila ako pagtunghulan sing sigarilyo kag indi na sila manigarilyo sa tupad ko. Pero, makaduha ka beses ako nga nagbalik liwat sa pagpanigarilyo kag pag-marijuana. Bisan pa amo sini ang natabo, wala ako maluyahan sing buot. Ginpanumdom ko gid ang Hulubaton 24:16: “Ang matarung nga tawo mapukan sing makapito, kag nagabangon liwat.” Sang ulihi, nauntat ko gid man ini nga mga bisyo.

Nagsuod pa gid ako kay Jehova samtang nakilala ko sia. Ang isa sa mga teksto nga nanamian ko gid amo ang Salmo 27:10: “Kon magbiya sa akon ang akon amay kag akon iloy, niyan ang GINOO magasapopo sa akon.” Samtang padayon ko nga ginatun-an sing maayo ang Biblia nakita ko nga matuod gid ini nga mga pinamulong. Nabatyagan ko nga palangga gid ako ni Jehova pareho sang isa ka matuod nga Amay.

Regular ako nga nakig-upod sa mga Saksi ni Jehova. Nakita ko nga matuodtuod sila nga mga abyan kag nagapalanggaanay gid sila. Wala pa gid ako makakita sing amo sini nga mga tawo.

MGA BENEPISYO: Sa bulig ni Jehova kag sang mga Saksi, nagbag-o na ang akon pamayo, batasan, kag panghambal. Sang una daw malaw-ay ako nga atataro. Pero subong nangin matahom na nga alibangbang. Nalipay gid ang akon mga paryente nga nagbag-o ako. Subong, may asawa na ako kag nagatinguha nga mangin maayo nga bana kag amay sa akon kabataan.

“Nakita Ko na ang Matuod nga Kahulugan sang Kabuhi.”—MARCOS PAULO DE SOUSA

EDAD: 29

PUNGSOD: BRAZIL

KABUHI SANG UNA: MIEMBRO SANG BANDA NGA NAGATOKAR SANG HEAVY METAL

ANG AKON NAGLIGAD: Nagaistar kami sa banwa sang Jaguariuna, São Paulo. Ang akon mga ginikanan debotado nga mga Katoliko. Sakristan ako sa simbahan amo nga ginasunlog ako sang akon mga klasmeyt nga “Father.” Sang 15 anyos ako, nag-upod-upod ako sa mga rakista nga nagatokar sing heavy metal. Sang 1996, ginbuligan ako ni tatay nga makabakal sang isa ka set sang drum.

Sang 1998, nag-entra ako sa isa ka banda nga nagatokar sing heavy metal. Ang mga musika nga amon ginatokar satanic, binastos, kag masingki. Naimpluwensiahan sini ang akon panghunahuna kag batasan. Bangod sini nangin agresibo ako kag negatibo.

KON PAANO GINBAG-O SANG BIBLIA ANG AKON KABUHI: Una ko nga nakilala ang mga Saksi ni Jehova sang 1999. Gin-agda nila ako nga magtuon sa Biblia. Nagpasugot ako bisan daw indi gid ako interesado. Pero, ang natun-an ko sa Biblia nagbag-o sa akon pagtan-aw sa kabuhi.

Sa amon lugar, nakilal-an ako nga “longhair,” “rakista,” ukon “dramer.” Pero narealisar ko nga bangod sa pag-entra ko sa banda, nangin bugalon ako kag ambisyuso. Natak-an na  ako sa amo sini nga klase sang pangabuhi. Narealisar ko man nga wala sing direksion ang kabuhi sang mga singer nga ginaidolo ko. Amat-amat ko nga naintiendihan nga para mapahalipay ko si Jehova, kinahanglan nga untatan ko ang pagtokar sang heavy metal nga musika kag ang imoral nga pagkabuhi.

Nanamian gid ako sa akon malaba nga buhok kag hilig ko gid ang heavy metal nga musika. Daw indi ako mabuhi kon wala ini. Kapalaakig man sa akon kag dapat ko gid ini kontrolon. Pero samtang nagatuon ako sa Biblia, natun-an ko pa gid nga palanggaon si Jehova. Sang natun-an ko nga mahigugmaon ang Dios, mapinasensiahon, kag maluluy-on, mas nangin suod pa gid ako sa iya. Nangamuyo ako kay Jehova nga buligan niya ako nga magbag-o kag ginbuligan gid niya ako. Matuod gid ang ginasiling sang Hebreo 4:12: “Ang pulong sang Dios buhi kag gamhanan.”

Sang nag-upod ako sa mga Saksi, nakita ko nga lain sila sa iban. Ginapakita gid nila ang matuod nga pagpalangga sa isa kag isa. Subong pa lang ako nakakita sing amo sini nga klase sang mga tawo. Ini nga gugma makita mo gid sa dalagku nga mga kombension sang mga Saksi. Nagdayaw gid ako sa mapisan nga mga boluntaryo nga nagapangabudlay para sa iban.

MGA BENEPISYO: Sa bulig ni Jehova, nakontrol ko na ang akon kaakig kag pagkabugalon.

Sang primero, daw ginapangita ko pa ang akon kabuhi sang una. Pero subong, wala na. Nalipay gid ako nga may matuod na nga kahulugan ang akon kabuhi. Natun-an ko man nga pamensaron ang iban kag indi lang ang akon kaugalingon.

“Nalipay Ako sa Pagbulig sa Iban.”—GEOFFREY NOBLE

EDAD: 59

PUNGSOD: ESTADOS UNIDOS

KABUHI SANG UNA: WALA NAGAPASAKOP SA RELIHION KAG SA GOBIERNO

ANG AKON NAGLIGAD: Nagdaku ako sa Ipswich, Massachusetts, isa ka banwa malapit sa baybay. Ang mga tawo diri kasarangan lang ang pangabuhi. Pero sang ulihi, nag-istar ako upod sa akon nobya sa maligwin nga lugar sang Vermont. Kon ibase ang amon pagkabuhi sa mga taga-North America, masiling naton nga tama gid ini ka simple. Wala kami sing koryente, gani nagapangahoy lang kami sa kagulangan para gamiton sa pagluto kag pagpainit sa bilog nga balay. Ara sa gua ang amon kasilyas kag buho lang ini sa duta. Pirme lang kami nagakawad-an  sing tubig. Wala kami nagasunod sa mga talaksan kag kasuguan nga naandan na sang kalabanan. Makita gid ini sa amon hitsura. Isa ka bes, ginpabugal ko pa gani nga wala ko ginhusay ang akon buhok sa sulod sang anom ka bulan.

Sadto nga tion, nadalahig ang Estados Unidos sa Vietnam War. Bangod sini, nagbag-o ang akon panan-aw sa awtoridad. Nakita ko ang pagkaipokrito sang gobierno kag relihion. Nagapati ako nga indi sila makahatag sing solusyon sa problema sang katawhan, kag pagusto lang ang kada tawo kon ano ang ila himuon. Gani para sa akon indi sala ang pagpangawat.

KON PAANO GINBAG-O SANG BIBLIA ANG AKON KABUHI: Naga-drugs ako kag gusto ko na ini untatan. Gusto man sang akon nobya nga magpakasal kami kag magbata. Ginabasa namon ang Biblia pero indi namon ini maintiendihan. Dayon, may Saksi ni Jehova nga nagbisita sa amon kag gintun-an niya kami sa Biblia.

Sang ulihi, nauntat ko gid man ang akon bisyo. Pero mas nabudlayan ako nga bag-uhon ang akon pagtamod sa mga may awtoridad. Halin sang una, ginakwestyon ko ang tanan nga butang. Halin sang bata ako, naanad ako nga wala sing may nagapasilabot sa akon. Gani nabudlayan ako magpasakop sa mga kasuguan.

Halin sang una, nagapati ako nga may Manunuga, galing indi ko sia masyado kilala. Pero sang nagtuon ako sa Biblia, nakilala ko sing maayo si Jehova nga Dios. Nakita ko nga ginaplastar niya sing maayo kon ano ang gusto niya nga himuon ko. Maathag gid ang iya mga kasuguan. Natun-an ko man nga nagpromisa sia nga himuon ang duta nga paraiso. (2 Pedro 3:13) Bangod sa mga natun-an ko, gusto ko nga alagdon ang Dios kag amo ini ang rason kon ngaa nagbag-o ako.

Nalipay gid ako nga sa bilog nga kalibutan, ang mga Saksi ni Jehova gid lang ang relihion nga wala nagaentra sa inaway kay ginasunod nila ang ginasiling sang Biblia.

Nabal-an ko nga kinahanglan ko kay-uhon ang akon pamayo kag hitsura para makaalagad ako kay Jehova. Sang primero daw nasaw-ahan ako sa pamayo sang mga Saksi. Wala ako sing longsleeves, ukon ang akon mga amigo. Wala ako sing pormal nga delargo ukon sapatos, kag siempre wala man ako sing kurbata! Pero ginpautdan ko ang akon buhok kag ginhipid ang akon kaugalingon. Nadumduman ko isa ka bes sang nagapamalaybalay ako, nakita ko ang akon hitsura sa kristal sang balay, sa pensar ko, ‘Ano na ang natabo sa akon?’ Sang ulihi, daw naanad na man lang ako.

KON PAANO AKO NAKABENEPISYO: Nagpakasal kami sang akon nobya, kag malipayon kami gihapon asta subong. Napadaku namon ang amon tatlo ka bata nga nagahigugma kag nagaalagad kay Jehova. Nagabulig man ako sa iban nga matun-an ang mga kamatuoran sa Biblia nga nagbag-o sang akon kabuhi.

Sang una ginapabugal ko gid nga wala ako sing labot kon ano ang ihambal sang iban sa akon. Pero subong, nanamian gid ako nga may nagaulikid sa akon kag nalipay ako sa pagbulig sa iban.

[Blurb sa pahina 26]

“Pila ka kilometros ang ginalakat ko para lang makakuha sing marijuana”

[Blurb sa pahina 28]

“Ang natun-an ko sa Biblia nagbag-o sa akon pagtan-aw sa kabuhi”

[Blurb sa pahina 29]

“Sang primero daw nasaw-ahan ako sa pamayo sang mga Saksi”