Magdiretso sa kaundan

Magdiretso sa listahan sang kaundan

Sugidsugid ukon Matuod?—Ang Kamatuoran Parte kay Jesus

Sugidsugid ukon Matuod?—Ang Kamatuoran Parte kay Jesus

 Sugidsugid ukon Matuod?—Ang Kamatuoran Parte kay Jesus

BASAHA ANG MASUNOD KAG PAMANGKUTA ANG IMO KAUGALINGON: MATUOD BALA INI UKON SUGIDSUGID LANG?

Si Jesus natawo sang Disiembre 25.

Tatlo ka hari ang nagbisita sa iya sang ginbun-ag sia.

Wala sing utod si Jesus.

Si Jesus amo ang Dios nga nagpakatawo.

Indi lamang si Jesus isa ka maayo nga tawo.

MADAMO ang magasiling nga matuod ini tanan. Pero ang iban naman mahimo magsiling nga mabudlay ukon imposible gid mahibaluan kon ano ang matuod nga sabat. Mahimo nga para sa ila, indi na ini importante basta nagatuo ka lang kay Jesus.

Pero lain ang ginasiling sang Biblia. Ginapalig-on kita sini nga magkuha sing “sibu nga ihibalo tuhoy sa aton Ginuong Jesucristo.” (2 Pedro 1:8) Makuha naton ini nga ihibalo kon tun-an naton ang mga Ebanghelyo. Ginasugid sini sa aton kon ano gid ang matuod parte kay Jesus. Gani, binagbinagon naton kon ano ang ginasiling sang mga Ebanghelyo parte sa mga pagpati nga ginsambit sa ibabaw.

PAGPATI: Si Jesus natawo sang Disiembre 25.

KATEGORYA: SUGIDSUGID.

Wala ginasugid sang Biblia kon ano nga bulan ukon adlaw natawo si Jesus. Kon amo, diin naghalin ang Disiembre 25? Suno sa The Encyclopædia Britannica, “ginpili ini nga petsa [sang pila ka nagapangangkon nga Cristiano] para idungan sa pagano nga kapiestahan sang mga Romano . . . kon winter solstice, ang tion nga mas malawig ang adlaw sangsa gab-i.” Nagsiling pa ini nga reperensia nga madamo sa mga butang nga ginahimo kon Krismas ang naghalin “sa pagano nga mga selebrasyon para sa agrikultura kag pagano nga mga kustombre para sa adlaw kon tigtulugnaw.”

 Gusto bala ni Jesus nga selebrahon naton ang iya pagkabun-ag sa Disiembre 25? Binagbinaga ini: Wala naton mabal-an kon san-o natawo si Jesus. Wala man nagasiling ang Kasulatan nga selebrahon naton ang iya pagkabun-ag. Indi man naton mabasa sa Kasulatan nga ginselebrar ini sang mga Cristiano sang una. Ang ginasugid lang sang Biblia amo ang eksakto nga adlaw sang kamatayon ni Jesus, kag ginsugo niya mismo ang iya mga sumulunod nga selebrahon ini. * (Lucas 22:19) Maathag nga gusto ni Jesus nga mas hatagan naton sing importansia ang iya kamatayon kag sakripisyo sangsa iya pagkabun-ag.—Mateo 20:28.

PAGPATI: Tatlo ka hari ukon mago ang nagbisita kay Jesus sang ginbun-ag sia.

KATEGORYA: SUGIDSUGID.

Siguro nakakita ka na sang belen ukon mga painting nga ang bata nga si Jesus nagahigda sa pasungan kag napalibutan sang tatlo ka hari nga may dala nga mga regalo. Ini nga hitabo indi gid matuod.

May nagbisita gid man kay Jesus halin sa Sidlangan para padunggan sia. Pero, indi sila mga hari kundi mga astrologo ukon mga tawo nga nagatuon parte sa kahulugan sang mga bituon. (Mateo 2:1, APD) Ara pa bala si Jesus sa pasungan pag-abot nila? Wala, kay pag-abot nila mga pila na ka bulan si Jesus kag ara na sia sa isa ka balay.—Mateo 2:9-11.

Pila gid ka bilog ang nagbisita kay Jesus, 2? 3? 30? Wala ini ginasugid sang Biblia. Posible nagasiling ang iban nga tatlo kay tatlo ka klase sang regalo ang ginhatag kay Jesus. * (Mateo 2:11) Ang iban nagsiling pa gani nga ang kada hari nagarepresentar sang lainlain nga rasa sang tawo. Pero indi naton ini mabasa sa Biblia. Suno sa isa ka komentaryo sa Ebanghelyo, ini nga pagpati ginhimuhimo lang sang “isa ka historian sang ikawalo nga siglo nga may grabe nga imahinasyon.”

PAGPATI: Wala sing utod si Jesus.

KATEGORYA: SUGIDSUGID.

Maathag nga ginapakita sang mga Ebanghelyo nga may iban pa nga utod si Jesus. Sa Ebanghelyo ni Lucas, ginatawag si Jesus nga “kamagulangan” nga bata ni Maria. * (Lucas 2:7, APD) Buot silingon nakabata pa sang ulihi si Maria. Ginpakita man sang Ebanghelyo ni Marcos nga may pila ka taga-Nazaret nga nagsiling nga ordinaryo lang si Jesus pareho sang iya mga utod. Amo nga namangkot sila: “Ini ang . . . utod ni Santiago kag ni Jose kag ni Judas kag ni Simon, indi bala? Kag ang iya mga utod nga babayi kaupod naton diri, indi bala?”—Marcos 6:3; Mateo 12:46; Juan 7:5.

Bisan pa amo sini ang ginasiling sang mga Ebanghelyo, madamo gihapon nga teologo ang nagasiling nga wala sing utod si Jesus. Ang iban nagahunahuna nga mga pakaisa ni Jesus ang ginasiling sang Ebanghelyo nga mga utod niya. * Ginakunokuno naman sang pila nga mga bata ini ni Jose sa iban nga babayi. Pero binagbinaga ini: Kon si Jesus gid lang ang bata ni Maria, isiling ayhan ato sang mga taga-Nazaret? Mahimo nga nakita gid sang iban sa ila nga nagbusong si Maria. Kag nahibaluan gid nila nga si Jesus isa sa iya mga bata.

PAGPATI: Si Jesus amo ang Dios nga nagpakatawo.

KATEGORYA: SUGIDSUGID.

Madugay na nga nagapati ang mga tawo nga ang Dios nagkadto sa duta kag nagkabuhi subong ang tawo nga si Jesus. Ini nga pagpati importante sa doktrina sang Trinidad. Pero wala ini ginapatihan sang panahon ni Jesus. Sa  baylo, ang The Encyclopædia Britannica nagsiling: “Ang tinaga nga Trinidad ukon ang doktrina sini indi mabasahan sa Bag-o nga Testamento . . . Amat-amat lang ini nga nahuman sa sulod sang pila ka siglo kag nag-agi sa madamo nga debatihay.”

Ang relihion nga nagatudlo sini nagapakanubo lang kay Jesus. * Ngaa? Binagbinaga ini nga ilustrasyon: Ang pila ka empleyado may ginapangayo nga pabor sa ila superbisor. Pero nagsiling ang superbisor nga wala sia sa posisyon nga ihatag ini sa ila. Kon matuod ang iya ginasiling, maayo sia nga tawo kay ginabaton niya ang iya mga limitasyon. Pero kon indi ini matuod, kag mahatag man lang gali niya ang ila ginapangayo, masiling naton nga nagapanonto lang sia.

Sing kaanggid, sang ginpangabay si Jesus sang iya duha ka apostoles nga hatagan sila sing prominente nga posisyon sa iya Ginharian, sia nagsabat: “Ining paglingkod sa akon tuo kag sa akon wala indi ako ang magahatag, kundi ila ini sang mga gin-amanan sini sang akon Amay.” (Mateo 20:23) Kon si Jesus gid man ang Dios, indi bala nga nagabinutig sia sa ila? Pero nagsiling sia nga may Isa nga mas daku sing awtoridad sa iya. Ginapakita lamang sini nga indi sia tupong sa Dios kag nakahibalo sia sang iya mga limitasyon.

PAGPATI: Indi lamang si Jesus isa ka maayo nga tawo.

KATEGORYA: MATUOD.

Suno kay Jesus indi lamang sia isa ka maayo nga tawo, kundi nagsiling sia: “Ako ang Anak sang Dios.” (Juan 10:36) Siempre pa, ang bisan sin-o puede magsiling nga Anak sia sang Dios. Pero kon indi matuod ang ginsiling ni Jesus, indi sia maayo nga tawo kundi isa ka manugtonto!

Ang pinakamasaligan nga pamatuod naghalin mismo sa Dios. Duha ka beses nga nagsiling sia parte kay Jesus: “Ini ang akon Anak.” (Mateo 3:17; 17:5) Hunahunaa: Pila lang ka beses nga mabasa sa Kasulatan nga nabatian ang tingog mismo sang Dios sa duta. Pero ang duha sa sini, nagapamatuod nga Anak niya si Jesus! Amo gid ini ang pinakadaku nga pamatuod nga si Jesus Anak sang Dios subong sang ginasiling niya.

May mga kamatuoran bala parte kay Jesus sa sini nga artikulo nga bag-o mo lang gid nabal-an? Kon amo, tun-i pa gid sing maayo ang mga Ebanghelyo. Makita mo nga makalilipay gid ini kag may maayo nga resulta. Si Jesus mismo nagsiling nga ang pagtuon sa kamatuoran parte sa iya kag sa iya Amay “nagakahulugan sang kabuhi nga walay katapusan.”—Juan 17:3.

[Mga Nota]

^ par. 13 Napatay si Jesus sang Adlaw sang Paskua ukon Passover, Nisan 14 sa kalendaryo sang mga Judiyo.—Mateo 26:2.

^ par. 18 Nagsiling si Mateo nga ang mga nagbisita kay Jesus ‘nagbukas sang ila mga regalo’ kag ginhatagan sia sing bulawan, olibano, kag mira. Ining malahalon nga mga regalo tayming gid kay ang pamilya ni Jesus pigado lang kag sang ulihi napilitan pa sila nga magpalagyo sa iban nga lugar.—Mateo 2:11-15.

^ par. 21 Si Jesus ginpanamkon ni Maria paagi sa milagro, pero ang iban nila nga bata ni Jose sa natural nga paagi.—Mateo 1:25.

^ par. 22 Ini nga pagpati nga ginpabantog ni Jerome sang mga 383 C.E. nangin popular sa mga tawo nga nagapati nga si Maria birhen asta mapatay. Sang ulihi, nagsiling si Jerome nga nagsala sia. Pero asta subong, ginapatihan man ini gihapon sang madamo nga tawo kag sang Katoliko nga Simbahan.

^ par. 26 Para sa dugang nga paathag sa doktrina sang Trinidad, basaha ang brosyur nga Dapat Ka Bala Magpati sa Trinidad? nga ginhimo sang mga Saksi ni Jehova.

[Kahon/Retrato sa pahina 14]

Dugang nga Kamatuoran nga Mahimo Makapakibot sa Imo

Ano nga klase sang tawo si Jesus? Sobra bala sia ka estrikto ukon serioso amo nga natahap magpalapit sa iya ang mga tawo? Mahimo nga huo ang sabat sang iban. Amo gani nga nakibot gid sila sang mabal-an nila nga si Jesus . . .

• nag-attend sa mga party.—Juan 2:1-11.

• nag-apresyar sa maayo nga ginhimo sang iban. —Marcos 14:6-9.

• nasadyahan mag-upod sa mga kabataan. —Marcos 10:13, 14.

• wala nahuya nga makita sang iban nga nagahibi. —Juan 11:35.

• maluluy-on.—Marcos 1:40, 41.