Magdiretso sa kaundan

Magdiretso sa listahan sang kaundan

Dapat Ka Bala Mangin Bunayag sa Tanan nga Tion?

Dapat Ka Bala Mangin Bunayag sa Tanan nga Tion?

 Dapat Ka Bala Mangin Bunayag sa Tanan nga Tion?

MAHIMO ang iban bunayag ukon honest kon kaisa. Pero pila ka tawo ang kilala mo nga nagatinguha nga mangin bunayag sa tanan nga tion?

Sa karon, madamo nga tawo ang indi bunayag. Pero nahibaluan naton nga gusto sang Dios nga mangin bunayag kita. Halimbawa, ang kalabanan sa aton pamilyar sa ikawalo sa Napulo ka Sugo nga nagasiling: “Indi kamo magpangawat.” (Exodo 20:15, APD) Pero madamo ang nagasiling nga kon kaisa ang pagpangawat kag pagbinutig indi man sala. Tan-awon naton ang tatlo ka halimbawa kon ngaa nasiling nila ini.

Mangawat Bangod Sa Kapigaduhon

Ang isa anay ka kilala nga pulitiko sa Roma nagsiling: “Ang kapigaduhon amo ang ginabangdan sang krimen.” Gani, ang mga pigado mahimo magbatyag nga indi malain ang pagpangawat. Mahimo mag-ugyon man ang iban. Ano naman ang pagtamod ni Jesus sa sini? Ang Biblia nagsiling nga si Jesus “naluoy” gid sa mga pigado. (Mateo 9:36) Pero, bisan pa maluluy-on sia, wala gid niya ginakunsinti ang pagpangawat. Ti, ano ang himuon sang mga pigado?

Naluoy gid ang Dios sa mga tawo nga nagatinguha sa pagtuman sa iya kag pakamaayuhon niya ang ila mga pagpaninguha nga makatigayon sang ila mga kinahanglanon. (Salmo 37:25) Ang Biblia nagpromisa: “Indi pagpabay-an sang GINOO nga magutuman ang mga matarong, pero ang mga malaot iya indi niya pagtugutan nga matuman ang ila malain nga mga handom.” (Hulubaton 10:3, APD) Makasalig bala sa sini ang mga pigado? Huo. Amo gid sini ang naeksperiensiahan ni Victorine.

Pigado ang pangabuhi ni Victorine kay magluwas nga balo, may lima pa sia ka bata nga nagaeskwela. Nagaistar sia sa imol nga pungsod kag limitado lang nga bulig ang ginahatag sang gobierno. Ang mga tawo sa ila lugar wala pirme nagatener sa ila balay, gani daku gid ang tsansa nga makapangawat. Pero wala gid ini ginhimo ni Victorine. Sa baylo, nagapangabudlay sia sa pagbaligya sa kalye para mabakal niya ang ila mga kinahanglanon. Ngaa wala sia nagapangawat?

“Una, nagapati ako nga ang Dios bunayag kag kon sundon ko sia mangin bunayag man sia sa akon. Ikaduha, mangin bunayag man ang akon mga kabataan kon makita nila nga bunayag ako.”

 Ano ang resulta? “Wala man kami nagakagutman. May ginasuksok man kami kag ginaistaran. Pero kon kaisa, nagapangayo ako sing bulig sa akon mga abyan sa tion sang emerhensia, pareho abi kon may mga balaklon nga bulong. Ginabuligan gid nila ako. Ngaa? Bangod ginasugid ko sa ila ang akon matuod nga kahimtangan kag wala ako nagapamentaha.”

“Ang akon mga kabataan nagdalagku man nga bunayag. Isa ka bes, nakita sang akon kaingod ang pila ka sensilyo sa amon lamesa. Ginpamangkot niya ako kon ngaa ginabilin ko lang sa lamesa ang kuarta kay basi kuhaon ini sang akon kabataan. Indi sia magpati sang ginsilingan ko sia nga wala nagapangawat ang akon kabataan. Wala ako makahibalo nga gintilawan niya sila. Nagbutang sia sing 100 franc (ukon mga 10 ka pesos) sa isa ka lugar nga madali makita sang mga bata. Pagbalik niya sang masunod nga adlaw, nakibot gid sia nga ara gihapon ang kuarta. Bisan pigado lang kami nalipay gid ako kay mabuot kag wala nagapangawat ang akon kabataan.”

“Ginahimo Man Ini sang Tanan”

Madamo nga tawo ang nagapangawat sa ila mga ulubrahan. Amo gani nga madamo ang nagasiling, “Ginahimo man ini sang tanan, ti ngaa ako ya indi?” Pero, ang Biblia nagasiling: “Indi kamo magsunod sa kadam-an sa paghimo sing malain.” (Exodo 23:2, APD) Ginsunod gid ni Victoire ini nga sugo. May maayo bala ini nga resulta?

Sang 19 anyos si Victoire nakaobra sia sa planta nga nagahimo sing palm-oil. Sang ulihi, natalupangdan niya nga ginapalasik sang 40 ka babayi nga kaupod niya ang mga bunga sang palma. Ginabutang nila ini sa ila alat kag ginabaligya kada katapusan sang semana. Ang bili sini, mga tatlo ukon apat ka adlaw nga sueldo. Si Victoire nagsiling: “Tanan sila nagapangawat. Gin-engganyo nila ako nga mangawat man. Pero ginsilingan ko sila nga indi ko ina mahimo. Ginkadlawan nila ako kag nagsiling sila nga ako gid ang pierde.”

“Isa ka adlaw, samtang nagalinya kami pagua sa planta, gulpi lang nga nag-abot ang manedyer. Ginpangtan-aw niya ang amon mga basket, kag ako lang ang wala sing may ginkawat nga bunga sang palma. Ang tanan nga nangawat pahalinon dayon sa obra ukon maobra sila sing duha ka semana nga wala sing sueldo. Sa sulod sang duha ka semana, narealisar sang akon upod nga mga babayi nga husto gid ako.”

“Akon Na Ini kay Ako ang Nakakita”

Ano ang himuon mo kon may makita ka nga isa ka malahalon nga butang? Mahimo maghunahuna ang iban nga ila na ini kay sila man ang nakakita. Ukon posible magsiling ang pila nga wala man ini sing malain kay mahimo ginkalimtan na ini sang tag-iya. Ang iban nagasiling nga indi na nila responsibilidad nga pangitaon pa ang tag-iya.

Ano ang masiling sang Dios parte sini? Ginapakita sang Deuteronomio 22:1-3 nga kon ang isa nakakita sang nadula nga butang, taguon niya anay ini kag “kon pangitaon ini sang tag-iya, iuli ini sa iya.” (Maayong Balita) Kon indi manugid ang nakakita, mahimo sia tawgon nga kawatan. (Exodo 22:9) Praktikal pa bala ini subong? Huo, kay napamatud-an ini ni Christine.

Si Christine isa ka direktor sang pribado nga eskwelahan. Mierkoles sadto sang ginkuha niya ang iya sueldo para sa sina nga bulan. Pareho sa ginahimo sang kalabanan nga taga-West Africa, ginlukot niya ang kuarta kag ginsulod ini sa iya bag. Nagtawag sia dayon sing traysikol kag nagpadul-ong sa lugar nga ginahiwatan sang miting. Pag-abot niya, gin-ukay niya ang sulod sang iya bag para mangita sing sensilyo nga i-plete. Bangod madulom, wala niya natalupangdan nga nahulog ang iya linukot nga kuarta.

Pagligad sang pila ka minutos, ang isa ka 19 anyos nga lalaki nga si Blaise nagkadto sa sini  man nga lugar kay may tabuon sia didto. Sang nakita niya ang kuarta, ginsulod niya ini sa iya bulsa. Sang natapos na ang miting, ginhambalan niya ang iya amigo nga kon sin-o ang nadulaan, tawgan lang sia.

Sang nakapauli na si Christine sa ila balay, nakibot gid sia sang makita niya nga wala na ang iya sueldo. Pagligad sang isa ka semana, ginsugiran niya ang iya amiga nga si Josephine parte sini. Nagsiling si Josephine nga may nakit-an ang isa nila ka bisita. Gintawgan ni Christine si Blaise kag ginhambal niya kon ano ang iya nadula. Nalipay gid sia sang gin-uli ni Blaise ang kuarta. Ano naman ang reaksion ni Blaise? Isa na ka semana sa iya ang kuarta. Pero nagsiling sia: “Mas nalipay ako nga gin-uli ko ang kuarta sangsa gintago ko lang ini.”

Ngaa Gintinguhaan Gid Nila nga Mangin Bunayag sa Tanan nga Tion?

Indi kilalahay sanday Victorine, Victoire, kag Blaise kag naghalin sila sa lainlain nga lugar. Pero palareho sila nga mga Saksi ni Jehova kag ginasunod gid nila kon ano ang ginasiling sang Biblia parte sa pagkabunayag. Ginapaabot nila nga matuman ang ginpromisa sang Dios nga bag-ong kalibutan. “May bag-ong langit kag bag-ong duta nga ginahulat naton suno sa iya saad, kag sa sini magapuyo ang pagkamatarong.” Ang tanan nga tawo nga magakabuhi didto matarong kag bunayag.—2 Pedro 3:13.

Nagalaum lamang si Victorine nga mag-ayoayo ang ila pangabuhi kon bag-uhon na sang Dios ang aton kahimtangan. Bisan imol sia, manggaranon naman sia sa espirituwal, isa ka butang nga indi mabakal sang kuarta. Mabuot kag bunayag man ang iya mga kabataan. Kada Domingo ‘ginasugid’ nila sa mga tawo kon daw ano kaayo ang Dios. Ginapaathag man nila nga pakamaayuhon sang Dios ang “tanan nga nagapanawag sa [iya] sing sinsero” kag “ang tanan nga nagahigugma sa [iya].”—Salmo 145:7, 18, 20, APD.

Sang ulihi naghalin si Victoire sa iya ulubrahan. Nagbaligya na lang sia sa merkado sing garri (isa ka sahi sang ginaling nga balinghoy). Madamo sia sing suki kay bunayag sia. Pero sang ulihi, ginbuhinan niya ang tion sa pagbaligya para gamiton ini sa pagsugid sa iban sang paglaum nga mabuhi sa isa ka kalibutan nga ang tanan nga tawo bunayag na. Nakapamana sia sang ulihi, kag karon nagaalagad sila sang iya bana subong bug-os tion nga ministro.

Nadula ni Christine ang iya kuarta sa atubang sang Kingdom Hall sang mga Saksi ni Jehova. Wala gawa sing kilala si Blaise sa miting, pero nahibaluan niya nga ang tanan nga ato didto mga Cristiano niya nga kauturan nga nagatinguha nga mangin bunayag sa tanan nga tion.

Pila ka tawo ang kilala mo nga nagatinguha nga mangin bunayag sa tanan nga tion? Hunahunaa nga kaupod mo ang 50, 100, ukon 200 ka bunayag nga tawo. Amo sini ang mabatyagan sang mga Saksi ni Jehova sa ila mga Kingdom Hall. Pamasyar ka bala didto para makilala mo sila.

[Blurb sa pahina 12]

“Bisan pigado lang kami nalipay gid ako kay mabuot kag wala nagapangawat ang akon kabataan.”—VICTORINE

[Kahon sa pahina 14]

Ang Hulubaton 6:30 Nagakunsinti Bala sa Pagpangawat?

Ang Hulubaton 6:30 (APD) nagsiling: “Masami wala ginapakalain ang kawatan nga nagapangawat tungod kay gutom siya.” Ginakunsinti bala sini ang mga kawatan? Wala gid. Ginapakita sang konteksto sini nga manabat sa Dios ang kawatan. Ang masunod nga bersikulo nagasiling: “Pero kon madakpan siya, pabayaron siya sing pito ka pilo sang iya ginkawat, kag maubos ang tanan niya nga pagkabutang.” (Hulubaton 6:31, APD) Bisan pa indi pareho kabug-at ang silot sa kawatan nga nangawat bangod sa iya kagutom kag sa kawatan nga nangawat bangod sa kakagod ukon sa isa nga hungod nga nanghalit sa iya biktima, dapat niya gihapon ‘bayaran’ ang iya kinawatan. Ang mga tawo nga gusto pahamut-an ang Dios indi gid dapat mangawat bisan ano man ang ila kahimtangan sa kabuhi.