Magdiretso sa kaundan

Magdiretso sa listahan sang kaundan

Ginapapili Kita ni Jehova

Ginapapili Kita ni Jehova

 Mangin Suod sa Dios

Ginapapili Kita ni Jehova

Deuteronomio 30:11-20

“PIRME ako nahadlok nga basi indi ako makapabilin nga matutom kay Jehova.” Amo sini ang ginsiling sang isa ka Cristianong babayi nga nagabatyag nga indi gid niya malikawan nga makasala bangod sa iya malain nga inagihan sang bata pa sia. Matuod bala ini? Wala na gid bala kita sing mahimo para malikawan ang pagpakasala? Indi. Ginhatagan kita ni Jehova nga Dios sing kahilwayan sa pagdesisyon para makapili kita kon ano ang himuon naton sa aton kabuhi. Gusto ni Jehova nga pilion naton kon ano ang maayo, kag ang iya Pulong, ang Biblia, makabulig sa aton kon paano ini himuon. Binagbinaga ang ginsiling ni Moises nga mabasa sa Deuteronomio kapitulo 30.

Mabudlay bala mahibaluan kag himuon ang ginapangayo sang Dios? * Si Moises nagsiling: “Ining sogo nga ginasogo ko sa imo sining adlaw indi tama kabudlay sa imo, ukon malayo.” (Bersikulo 11) Wala nagapangayo si Jehova sang indi naton masarangan. Ang iya mga sugo masarangan naton himuon, rasonable, kag puede matun-an. Indi na kinahanglan nga magkadto pa kita “sa langit” ukon “sa tabok sang dagat” para mahibaluan ang ginapangayo sang Dios sa aton. (Bersikulo 12, 13) Ngaa? Kay matun-an ini mismo sa Biblia.—Miqueas 6:8.

Pero, wala kita ginapilit ni Jehova nga tumanon sia. Si Moises nagsiling: “Ginbutang ko sining adlaw sa atubangan nimo ang kabuhi kag ang kaayohan, ang kamatayon kag ang kalaut.” (Bersikulo 15) May kahilwayan kita nga pilion ang maayo ukon ang malain, ang kabuhi ukon ang kamatayon. Kon pilion naton nga simbahon kag tumanon ang Dios, pakamaayuhon niya kita. Pero kon sikwayon naton sia, magaantos kita. Diin man sa sini ang aton pilion, kita ang magadesisyon.—Bersikulo 16-18; Galacia 6:7, 8.

Importante bala kay Jehova kon ano ang aton pilion? Siempre! Nagsiling si Jehova paagi kay Moises: “Pili-a ang kabuhi.” (Bersikulo 19) Pero, paano naton pilion ang kabuhi? Si Moises nagsiling: “Higugmaa ang GINOO nga inyo Dios, tumana sia kag magmatutom kamo sa iya.” (Bersikulo 20, Maayong Balita nga Biblia) Kon ginahigugma naton si Jehova, tumanon naton sia kag mangin matutom sa iya bisan ano man ang matabo. Kon himuon naton ini, ginapili naton ang kabuhi, ang pinakamaayo nga kabuhi karon nga may paglaum nga mabuhi sing walay katapusan sa bag-o nga kalibutan sang Dios.—2 Pedro 3:11-13; 1 Juan 5:3.

Ining pinamulong ni Moises makapalig-on gid. Bisan ano man ang imo naeksperiensiahan sa sining malaut nga kalibutan, may mahimo ka pa. Ginhatagan ka ni Jehova sing kahilwayan sa pagpili. Puede mo pilion nga higugmaon si Jehova, pamatian sia, kag mangin matutom sa iya. Kon himuon mo ini, pakamaayuhon ka gid niya.

Ang babayi nga ginsambit kaina nalugpayan gid sang mahibaluan niya nga puede niya pilion nga higugmaon kag simbahon si Jehova. Sia nagsiling: “Ginahigugma ko gid si Jehova. Kon kaisa nagakalipat ako nga ang kinahanglan ko gid lang amo ang akon gugma sa iya para makapabilin ako nga matutom.” Sa bulig ni Jehova nga Dios, makapabilin ka man nga matutom.

[Nota]

^ par. 2 Tan-awa ang artikulo nga “Mangin Suod sa Dios—Ano Gid Bala ang Ginapangayo ni Jehova sa Aton?” sa Oktubre 1, 2009 nga isyu sang Ang Lalantawan.