Magdiretso sa kaundan

Magdiretso sa listahan sang kaundan

Nagsaad Bala ang Dios nga Magmanggaranon Ka?

Nagsaad Bala ang Dios nga Magmanggaranon Ka?

 Nagsaad Bala ang Dios nga Magmanggaranon Ka?

‘Gusto sang Dios nga magmanggaranon ka, may madamo nga salakyan kag may matin-ad nga negosyo. Magtuo ka lang sa iya, buksi ang imo kahita, kag ihatag sa iya ang tanan mo nga kuarta.’

AMO ini ang pirme nga ginawali sang pila ka relihion sa Brazil, suno sa isa ka pamantalaan didto. Kag ginapatihan man ini sang madamo nga tawo. Sa isa ka surbe sa mga nagapangangkon nga Cristiano sa Estados Unidos, ang Time nga magasin nagreport: “Mga 61% ang nagapati nga gusto sang Dios nga magmanggaranon ang mga tawo. Kag 31% . . . ang nagaugyon nga kon ihatag mo sa Dios ang imo kuarta, bugayan ka niya sing madamo pa gid nga kuarta.”

Ini nga pagpati, nga masami ginatawag teolohiya sang kabuganaan, madasig nga naglapnag ilabi na sa mga pungsod sa Latin-Amerika, subong sang Brazil. Gani, ang mga tawo nagadugok sa mga simbahan nga nagapasalig sa ila nga magmanggaranon sila. Nagsaad gid man bala ang Dios nga magmanggaranon ang mga nagaalagad sa iya? Manggaranon bala ang tanan nga alagad sang Dios sang una?

Sa Hebreo nga Kasulatan, pirme naton mabasa nga manggaranon ang mga tawo nga ginapakamaayo sang Dios. Halimbawa, ang Deuteronomio 8:18 nagasiling: “Magdumdum ka sa GINOO nga imo Dios, kay sia amo ang nagahatag sa imo sing gahum sa [pag-agom] sing manggad.” Ginapasalig sini ang mga Israelinhon nga kon tumanon nila ang Dios, himuon niya sila nga isa ka manggaranon nga pungsod.

Kamusta naman ang mga indibiduwal nga nagaalagad sa iya? Ang matutom nga si Job manggaranon gid kaayo, kag sang ginkuha ni Satanas ang tanan niya nga pagkabutang, ginbalik ini sa iya ni Jehova “sing pilo sang kadamuon.” (Job 1:3; 42:10) Si Abraham manggaranon man. Nagsiling ang Genesis 13:2 nga “manggaranon gid [sia] sa kahayupan, sa pilak, kag sa bulawan.” Sang ginbihag sang mga soldado sang apat ka hari sang Sidlangan ang hinablos ni Abraham nga si Lot, “ginpangolohan [ni Abraham] ang iya nahanas nga mga tawo, nga natawo sa iya balay.” (Genesis 14:14) Si Abraham may 318 ka “nahanas nga mga tawo” sa pagpakig-away, gani mahimo nga daku gid ang iya panimalay. Makasiling kita nga tuman ka manggaranon si Abraham kag madamo gid ang iya kasapatan kay nasuportahan niya ang iya daku katama nga pamilya.

Matuod, madamo sa matutom nga alagad sang Dios sang una ang manggaranon subong nanday Abraham, Isaac, Jacob, David, kag Solomon. Buot bala silingon nga ang tanan nga alagad sang Dios mangin manggaranon man? Sa pihak nga bahin, ginapahangop bala sini nga ang mga imol wala ginakahamut-an sang Dios? Ini nga mga pamangkot binagbinagon sa masunod nga artikulo.