Magdiretso sa kaundan

Magdiretso sa listahan sang kaundan

Malipayon kag May Paglaum sa Pihak sang Kapigaduhon

Malipayon kag May Paglaum sa Pihak sang Kapigaduhon

 Sulat Halin sa Bolivia

Malipayon kag May Paglaum sa Pihak sang Kapigaduhon

SA AKON pag-alagad subong misyonera sa isa ka imol nga pungsod, nakita ko gid ang kaimulon sang mga tawo kag daw wala na sila sing paglaum nga magaayo pa ang ila kahimtangan. Gusto ko masolusyunan dayon ang ila problema. Pero nahibaluan ko nga ang Ginharian sang Dios lamang ang makasolbar sini. Sa pihak nga bahin, nakita ko naman nga madamo sing tawo ang malipayon bisan pa mabudlay ang ila kahimtangan tungod ginatuman nila ang Pulong sang Dios. Ang isa sa ila amo si Sabina.

Mga pila ka tuig na ang nagligad, madumduman pa ni Sabina nga ginakugos niya ang iya duha ka bata samtang ginatan-aw ang iya bana nga nagasakay sa daan nga bus para mangita sing mas maayo nga obra sa iban nga pungsod. Naghulat sia sa pagpauli sang iya bana, pero nagligad lang ang mga binulan kag mga tinuig, wala na ini nakabalik. Sugod sang naglakat ang iya bana, si Sabina na ang nagapangita sang ila kinawala adlaw-adlaw para mabuhi sila sang iya duha ka bata nga sanday Milena kag Ghelian.

Nakilala ko si Sabina sang isa ka hapon samtang masako sia nga nagaatipan sa mga kostumer sa balaligyaan sang iya magulang. Makita ko sa mga mata ni Sabina nga kapoy gid sia sa bug-os nga adlaw nga pagtrabaho. Gintanyagan ko sia nga magtuon sing Biblia upod sa iya kabataan. “Gusto ko man tani,” siling niya, “galing, masako gid ako. Pero, puede mo man matudluan ang akon mga bata.” Nagsugot ako. Samtang nagapadayon ang pagtuon namon sang iya mga bata, nakilala ko pa gid si Sabina, kag nakita ko ang iya mabudlay nga kahimtangan.

Alas 4:00 pa lang sang aga, nagabugtaw na si Sabina. Samtang nagakatulog pa ang iya mga bata sa ila gamay nga ilistaran, ang karne nga inugpalaman sa empanada ginaluto na niya sa isa ka daku kag daan na nga lulutuan. Amo ini ang iya palangitan-an. Sa gab-i pa lang, ginamasa na ni Sabina ang harina para himuon nga empanada.

Ginakarga ni Sabina sa ginhulam niya nga kariton ang iya mga gamit sa pagbaligya—payongpayong, gas stove, tangke, lamesa, mga pulungkuan, kalaha, kag mantika, pati na ang mga empanada kag pila ka galon nga juice.

Pagka-alas 6:00 sang aga, ginatrangkahan ni Sabina ang ila ginaistaran kag nagalakat sila sang iya duha ka bata. Wala gid sing nagatingog ukon nagakulukadlaw sa ila kay ginatigana nila ang ila kusog sa pagtrabaho. Halos kada aga, makita ko sa bintana sang amon gina-istaran ang mga tawo nga nagahalin sa ila balay nga may amo man sini nga palangitan-an. Isa lang si Sabina sa madamo nga babayi nga kaagahon pa  nagalakat na para magbaligya sing kalan-on kag juice sa mga kalye sang Bolivia.

Pagka-alas 6:30 sang aga, sa pagtamwa sang adlaw sa kabukiran, ara na si Sabina kag ang iya mga bata sa ila puesto. Wala sing tinimoktimok nga gindiskarga nila ang ila mga dala kag ginplastar ang ila mga baligya. Dugaydugay, ginsugdan na ni Sabina ang pagprito sang mga empanada. Ang kahamut sang iya linuto amat-amat nga nag-upod sa matugnaw nga dapya sang hangin kag nagaganyat sa gutom nga mga bumalakal.

“Pila imo baklon?” pamangkot ni Sabina sa una nga kostumer. Samtang nagaduko, nagsenyas sing duha ang ginatuyo nga tawo, kag ginhatagan sia ni Sabina sing duha ka mapulapula kag mainit nga empanada. Ginakuha niya dayon ang ila bayad. Ini nga pagbaklanay sulitsulit nga nagakatabo sa bug-os nga adlaw. Kon maubos na ang ila baligya, nagapauli sila dayon. Bisan masakit na ang mga tiil ni Sabina sa taguri nga pagtindog, nagakadto pa sia sa iya ikaduha nga obra sa balaligyaan sang iya utod.

Sa una namon nga pagtuon sa Biblia sang iya mga bata sa balaligyaan, may nahanda na nga duha ka gamay nga pulungkuan sa higad. Ginapaabot kag ginahandaan gid nanday Milena kag Ghelian, nga 9 kag 7 anyos pa lang sadto, ang amon pagtuon. Sang primero, mahuluy-on sila pero sang ulihi nangin palaistorya na sila kag amat-amat nga nagsuod sa akon. Nalipay gid sa sini si Sabina. Sang ulihi, bisan pa nga kapoy na sia sa iya obra, nagtuon man sia sa Biblia.

Samtang nagadugang ang natun-an ni Sabina, nagatubo man ang iya gugma kay Jehova nga Dios. Nabatyagan na niya ang kalipay nga wala niya sadto maeksperiensiahan! Sang una, pirme lang sia kapoy kag masinulub-on, pero karon malipayon na sia. Nagatiso na sia, wala na nagaduko, kag makita na ang kalipay sa iya mga mata. “Pirme na nagayuhom si Sabina subong,” siling sang iya utod. Nakita man sang iban ang daku nga pagbag-o ni Sabina kag sang iya mga bata. Natun-an na gid man ni Sabina ang parte sa Dios kag sa iya mga katuyuan.

Nalipay gid si Sabina sa iya pagtuon, ugaling bangod masako sia, indi sia makatambong sa mga pagtilipon sang mga Saksi. Pero sang ulihi, nagkadto sia sa Kingdom Hall. Sugod sadto, pirme na sia nagatambong. Sa kongregasyon, nakakita si Sabina sang matuod nga mga abyan. Naeksperiensiahan man niya nga ginasuportahan gid ni Jehova ang mga nagahigugma sa Iya kag nagasakripisyo para maalagad Sia.—Lucas 12:22-24; 1 Timoteo 6:8.

Ginapabaloran gid ni Sabina ang iya natun-an, kag gusto niya ini isugid sa iban. Pero nagsiling sia, “Kon madumduman ko gani ang parte sa pagwali sa mga tawo, ginakulbaan gid ako.” Sa pensar niya, ‘Mahuluy-on ako kag wala sing tinapusan, ti paano ko matudluan ang iban?’ Bisan pa amo sini ang iya ginabatyag, ang kaayo nga ginpakita sa iya sang mga Saksi kag ang mga pagbag-o nga naeksperiensiahan niya sa iya kabuhi nagpahulag sa iya nga makigbahin sa pagwali. Narealisar man niya nga ginatan-aw sang iya mga bata ang iya halimbawa. Amo nga nag-upod sia sa pagsugid sa iban sing maayong balita. Kag nalipay ang iya mga bata nga mag-upod man sa iya.

Sa karon, malipayon na si Sabina bisan pa nagabakabaka sia adlaw-adlaw. Pigado man sia gihapon, pero nagbag-o na ang iya panan-aw sa kabuhi. Isa na sia karon ka bawtismado nga Cristiano. Ginasugid niya sa iban ang maayong balita sang Ginharian sang Dios nga amo lamang ang permanente nga solusyon sa kaimulon kag makahatag sing paglaum sa mga tawo.—Mateo 6:10.

Alas 5:00 na sang aga, kag manuglakat na naman si Sabina. Pero subong nga aga, indi sia magbaligya sing mga empanada. Maupod sia sa grupo sang pareho niya nga mga Cristiano para magsugid sing maayong balita sa mga tawo sa dalan. Nagdugang ang iya kalipay bangod ginagamit niya ang iya iban nga oras kada semana para buligan ang iban. Gintrangkahan niya ang puertahan kag nagayuhom nga naglakat. Wala sia sing ginatulod nga kariton, kundi may dala sia nga daku nga bag nga may unod nga Biblia kag mga balasahon sa Biblia nga gamiton niya sa pagsugid sa iban parte sa iya paglaum. Nagayuhom sia nga nagsiling, “Daw indi ako makapati nga nagasugid na ako sa iban sang mensahe sang Biblia.” Nagsiling pa sia, “Nalipay gid ako sa sini!”