Magdiretso sa kaundan

Magdiretso sa listahan sang kaundan

Kon Paano Mangin Madinalag-on nga Misyonero

Kon Paano Mangin Madinalag-on nga Misyonero

 Ika-126 nga Gradwasyon sang Gilead

Kon Paano Mangin Madinalag-on nga Misyonero

ANG malipayon nga tumalambong nagtipon sa Watchtower Educational Center sa Patterson, New York, para sa isa ka espesyal nga okasyon. Ang gradwasyon sang ika-126 nga klase sang Watchtower Bible School of Gilead ginhiwat sang Sabado, Marso 14, 2009. Ang mga naggradwar ipadala sa 22 ka pungsod para magwali sing maayong balita sang Ginharian sang Dios.—Mateo 24:14.

Bag-o lang natapos sang mga estudyante ang maid-id nga pagtuon sa Biblia sa sulod sang lima ka bulan nga gindesinyo agod mangin epektibo sila nga mga Cristianong misyonero. Ang adlaw sang ila gradwasyon amo ang katapusan nga tion nga makapamati sila subong isa ka klase sang maalamon nga mga laygay para mangin madinalag-on sa ila asaynment.

Ang Gilead School nagsugod sa paghanas sang mga misyonero sang 1943, hinumdom ni Anthony Morris, nga amo ang tsirman sang programa kag miembro sang Nagadumala nga Hubon sang mga Saksi ni Jehova. Sugod sadto, isa gid ka daku nga bulig ang mga naggradwar sa pagwali nga hilikuton sa bug-os nga kalibutan.

Bisan pa ginpakanubo sang mga escriba kag mga Fariseo ang mga apostoles ni Jesus kag ginkabig subong “ordinaryo nga mga tawo kag wala sing alam,” siling sang humalambal, ginkilala sang mga manugpamatok nga nangin maisog ang mga apostoles bangod sa ila pagpakig-upod kay Jesus. (Binuhatan 4:13, Maayong Balita nga Biblia) Ang paghanas nga nabaton sang mga estudyante nakabulig man sa ila nga mangin maisog sa pagsugid sang ila natun-an.

Ang tema nga “Ang Dios Wala sing Ginapasulabi” amo ang ginpadaku ni Robert Ciranko, nga isa sa nagabulig sa Writing Committee sang Nagadumala nga Hubon. Nagsiling sia nga sa ulihi, ang mga estudyante magapakig-upod sa mga tawo nga may lainlain nga kultura kag kustombre. Pero, indi sila mabudlayan sa pagbantala sa sini nga mga tawo kon ilugon nila ang panimuot ni Jehova. Suno sa Binuhatan 10:34, “ang Dios wala sing ginapasulabi.” Ang tanan kahalamut-an sa iya. (Binuhatan 10:35) Kon “ilugon ninyo ang panimuot sang Dios kag tamdon ang mga tawo nga mahimo kahamut-an sang Dios, magamadinalag-on kamo subong mga misyonero,” siling ni Utod Ciranko.

“Yara Na sa Inyo ang mga Kinahanglanon Para Magmadinalag-on”

“Para sa iban, ang kamelyo malaw-ay,” siling sa umpisa ni Samuel Herd, nga miembro sang Nagadumala nga Hubon, “pero, bagay gid ini para sa iya kabuhi sa desyerto.” Kaanggid man sa sini ang kahimtangan sang bag-o nga mga misyonero. Yara na sa ila ang mga kinahanglanon para magmadinalag-on sa ila mga teritoryo. Lima ka butang ang makabulig sa ila.

1. Gugma kay Jehova. (Mateo 22:37, 38) Ginpakita sang mga estudyante nga determinado sila nga mag-alagad kay Jehova.

2. Natipon nga ihibalo sa Pulong sang Dios. Ang kamelyo may reserba nga pagkaon sa nagaulbo nga tambok sa iya likod. Pero wala sia nagauntat sa pagkaon kag wala nagasalig sa iya reserba. Amo man sini ang mga misyonero. Indi sila dapat magsalig sa ila lang natun-an sa Gilead School, kundi dapat nila gihapon palig-unon ang ila kaugalingon paagi sa pagtuon sing Biblia.

3. Gugma sa mga tawo. (Mateo 22:39) Ang mga estudyante may kaluoy sa mga tawo.

4. Kinabubut-on nga pag-alagad. (Salmo 110:3) Kon kapuyon ang mga misyonero, pabaskugon sila ni Jehova.—Isaias 40:29.

5. Mabaskog nga panglawas. Subong nga ang kamelyo mahimo kargahan sing mga dalal-on ukon sakyan sa desyerto, mahimo man “dal-on” sang isa ka misyonero ang iya kaupod nga  Cristiano nga ginabudlayan sa pag-alagad. Nagakinahanglan ini sing daku nga kusog, pero mahimo ini sang mga misyonero kay may mabaskog sila nga panglawas.

Iban Pa nga Bahin sang Programa

Ang almond ukon almendras isa sa pinakamaayo nga patubas nga ginaregalo ni Jacob sa mga manuggahom sang Egipto, siling ni Michael Burnett, nga isa sa mga instruktor sa Gilead. (Genesis 43:11) Gamay lamang nga liso ang almendras pero masustansia ini. Ang mga estudyante nakakaon sing malaragwayon nga almendras sang nagaeskwela sila. Lakip sa mga leksion nga dal-on nila sa ila asaynment amo ang pagkakontento sa mga aman ni Jehova kag paghigugma sa ila bag-o nga palibot.

Si Mark Noumair, instruktor man sa Gilead, nagsiling nga ang Pulong sang Dios kaangay sang puyopuyo nga puno sing “kaalam.” (Job 28:18) Dapat naton buksan ining puyopuyo kag gamiton ang unod sini. Kon ang asaynment sang mga estudyante lain sangsa ila ginapaabot, dumdumon nila si apostol Pablo. Ginpapauli sia sang mga disipulo sa iya lugar kag ginpahulat sing siam ka tuig. Sa baylo nga magsiling nga dapat sia i-asayn sa iban nga lugar bangod sia ang “pinili nga suludlan,” ginhimo ni Pablo ang iya masarangan bisan diin man sia. (Binuhatan 9:15, 28-30) Kon kaisa naman, mahimo mabudlay sundon ang katuyuan ni Jehova. Ang halimbawa sini amo si Jonatan. Ginkilala niya nga si David amo ang ginpili ni Jehova nga hari, gani ginsuportahan niya si David.

Sa tema nga “Ang mga Alagad sang Dios Nagahambal nga May Kaisog,” ginsaysay sang mga estudyante ang ila mga eksperiensia sa pagbantala nga bahin sang ila klase. Madamo sa ila ang nakasugod sang pagtuon sa Biblia.

Ang masunod pa gid nga bahin may tema nga “Ginhanda sang Organisasyon ni Jehova.” Gin-interbyu sa sini ang tatlo ka madugay na nga mga misyonero. Ginpaathag nila kon paano sila ginhanas nga magpasakop sa organisasyon sang Dios.

“Mangin Malipayon nga Misyonero”

Si Gerrit Lösch, isa man ka miembro sang Nagadumala nga Hubon, naghatag sing panguna nga bahin sang programa nga may tema, “Mangin Malipayon nga Misyonero.” Madamo sing mga butang nga ginakabig nga “masadya” pero wala nagahatag sing matuod nga kalipay, siling niya. (Hulubaton 14:13; Manugwali 2:10, 11) Ang matuod nga kalipay matigayon sa paghimo sang kabubut-on sang Dios bisan pa indi ini pirme mahapos. Ang pag-eskwela sa Gilead indi mahapos pero madamo gid ini sang benepisyo.

May pila ka rason kon ngaa malipayon ang mga Cristiano. Ginasimba nila ang malipayon nga Dios. (Salmo 33:12; 1 Timoteo 1:11) Nagakabuhi sila sa espirituwal nga paraiso, kag nagasaad ang Biblia nga sa indi madugay ang duta mangin paraiso. Nasapwan nila ang katuyuan sang kabuhi—ang pag-alagad kay Jehova. Dugang pa, ginahigugma sila ni Jehova kag ni Jesus.

“Mangin malipayon kamo nga mga misyonero,” siling ni Utod Lösch, “kon mangin kontento kamo.” Ang isa pa ka rason sang pagkalipay amo ang pagpalangga sa iban kag pagpalangga nila sa imo. Gani, tabuni sang gugma ang sala sang iban imbes nga padakuon ini. Maghimo sing maayo, buligi ang maluya, kag ipaambit ang makapalig-on nga mga eksperiensia. (Salmo 41:1, 2; Binuhatan 20:35) Mangin malipayon man kita kon ginagamit naton ang aton kabuhi sa pagbantala.––Lucas 11:28.

“Dapat mangin malipayon kamo, mga misyonero. Maayo man ang haganhagan nga pagkinalipay pero dumduma nga ang inyo prioridad amo ang pagdayaw sa aton malipayon nga Dios nga si  Jehova, kag ang pagpahalipay man sa iban,” siling ni Utod Lösch.

Pagkatapos mabasa ang panamyaw halin sa iban nga lugar, ginlawag ni Anthony Morris ang mga estudyante kag ginhatagan sing diploma. Pagkatapos sini, ginbasa sang isa sa mga estudyante sang ika-126 nga klase ang ila sulat para sa Nagadumala nga Hubon. Nagpasalamat sila sa pribilehiyo nga nakaeskwela sila sa Gilead School.

Sa katapusan nga bahin sang iya pamulongpulong, ginpadaku sang tsirman nga ang “mga lutalutahan kag mga lanitlanit” nga nagaangot sa mga bahin sang lawas kaanggid sa mga kahimusan nga ginagamit sang “matutom kag mainandamon nga ulipon.” Kag paagi sini ginapabakod kag ginatuytuyan ni Jehova ang iya katawhan. (Colosas 2:18, 19; Mateo 24:45) Kon ang mga naggradwar sa Gilead bug-os nga magpasakop sa mga representante nga gintangdo sang Dios, mangin madinalag-on sila sa pagtuman sing bug-os sa ila ministeryo.—2 Timoteo 4:5.

[Kahon sa pahina 30]

ESTADISTIKA SANG KLASE

Kadamuon sang pungsod nga ginhalinan:6

Kadamuon sang pungsod nga ginpadalhan: 22

Kadamuon sang mga estudyante: 56

Kadamuon sang mga mag-asawa: 28

Aberids nga edad: 32.8 Aberids nga tuig sa kamatuoran: 17.9

Aberids nga tuig sa bug-os tion nga ministeryo: 13.5

MGA PUNGSOD NGA GINPADALHAN SANG MGA ESTUDYANTE

Ang mga naggradwar gin-asayn sa Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo, kag Uganda.

[Retrato sa pahina 31]

Ika-126 nga Naggradwar nga Klase sang Watchtower Bible School of Gilead

Ang mga raya nanumeruhan halin sa atubangan pakadto sa likod, kag ang mga ngalan nalista halin sa wala pakadto sa tuo sa tagsa ka raya.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.