Magdiretso sa kaundan

Magdiretso sa listahan sang kaundan

Ang Kaimulon Bala Tanda nga Wala Nahamuot ang Dios sa Imo?

Ang Kaimulon Bala Tanda nga Wala Nahamuot ang Dios sa Imo?

 Ang Kaimulon Bala Tanda nga Wala Nahamuot ang Dios sa Imo?

ANG Dios nagsiling sa mga Israelinhon sang una: “Manginwala sing imol kaupud nimo.” Amo sini ang ginsiling sang Dios bangod ang Kasuguan nga ginhatag niya sa ila nagasugo nga atipanon ang mga imol kag hilwayon pa gani sila sa ila mga utang. (Deuteronomio 15:1-4, 7-10) Gani, wala dapat sing imol nga mga Israelinhon kay nagsaad si Jehova nga pakamaayuhon sila. Ini nga pagpakamaayo mabaton lamang nila kon tumanon nila ang Kasuguan, pero wala nila ini matuman.

Indi buot silingon sini nga ang mga imol wala nahamut-an sang Dios kag ang mga manggaranon amo ang iya ginapakamaayo. Madamo sa matutom nga mga alagad sang Dios ang mga imol. Ang propeta nga si Amos isa lamang ka trabahador kag manugpahalab sang karnero. (Amos 1:1; 7:14) Sang panahon ni propeta Elias, may natabo nga tiggulutom sa Israel. Ginbuligan si Elias sang isa ka imol nga balo nga babayi, kag ang ila kalan-on amo lamang ang diutay nga harina kag lana nga wala naubos sa tion sang tiggulutom bangod sang milagro. Wala nagmanggaranon si Elias ukon ang balo nga babayi, pero ginhatagan sila ni Jehova sang ila mga kinahanglanon.—1 Hari 17:8-16.

Ang iban nga tawo mahimo gulpi lang mag-imol bangod sa wala ginapaabot nga mga hitabo. Ang aksidente ukon balatian mahimo mangin kabangdanan nga temporaryo nga indi makaobra ang isa ukon madulaan na gid sing obra. Ang iban naman mahimo mabalo ukon mailo. Pero, ining mabudlay nga mga kahimtangan indi pamatuod nga wala nahamut-an sang Dios ini nga mga tawo. Ang kasaysayan nanday Noemi kag Rut isa ka makapalig-on nga halimbawa sang mahigugmaon nga pag-atipan ni Jehova sa mga imol. Imol gid sanday Noemi kag Rut bangod nabalo sila, pero ginpakamaayo sila ni Jehova nga Dios kag ginhatagan sang ila kinahanglanon.—Rut 1:1-6; 2:2-12; 4:13-17.

Maathag nga ang kaimulon indi tanda nga wala nahamuot ang Dios sa imo. Ang mga matutom kay Jehova nga Dios makasalig sa ginsiling ni Hari David: “Nanginpamatan-on ako, kag karon tigulang na; apang wala ako makakita nga ang matarung ginpabayaan ukon ang iya kaliwat nga nagapakilimos sing kalan-on.”—Salmo 37:25.

[Retrato sa pahina 8]

Bisan pa imol sanday Noemi kag Rut, ginpakamaayo sila kag mahigugmaon nga gin-atipan sang Dios