Magdiretso sa kaundan

Magdiretso sa listahan sang kaundan

Parte sa Palaabuton sang Katawhan

Parte sa Palaabuton sang Katawhan

 Ang Matun-an Naton kay Jesus

Parte sa Palaabuton sang Katawhan

Nagsaad bala si Jesus sing kabuhi sa langit?

Huo! Si Jesus mismo ginbanhaw kag nagsaka sa langit agod makaupod ang iya Amay. Apang antes sang iya kamatayon kag pagkabanhaw, ginsilingan niya ang iya 11 ka matutom nga apostoles: “Sa balay sang akon Amay may madamo nga puluy-an. . . . Magalakat ako agod maghanda sang duog para sa inyo.” (Juan 14:2) Pero, diutay lang ang makabaton sini nga pribilehiyo. Ginpaathag ini ni Jesus sang ginsilingan niya ang iya mga disipulo: “Indi magkahadlok, diutay nga panong, bangod nahamut-an sang inyo Amay nga ihatag sa inyo ang ginharian.”—Lucas 12:32.

Ano ang himuon sang “diutay nga panong” sa langit?

Gusto sang Amay nga ining diutay nga grupo mangin bahin sang panguluhan sa langit upod kay Jesus. Paano naton mahibaluan? Sang nabanhaw si Jesus, ginpahayag niya kay apostol Juan nga ang pila sa mga matutom ‘magagahom sa duta subong mga hari.’ (Bugna 1:1; 5:9, 10) Isa ini ka maayo nga balita. Kinahanglan gid sang katawhan ang maayo nga panguluhan. Ano ang himuon sining panguluhan nga gamhan ni Jesus? Si Jesus nagsiling: “Sa pagtuga-liwat, kon ang Anak sang tawo magalingkod sa iya mahimayaon nga trono, kamo nga nagsunod sa akon magalingkod man sa napulog-duha ka trono.” (Mateo 19:28) Ang paggahom ni Jesus kag sang iya mga sumulunod magaresulta sing “pagtuga liwat,” ukon pagpasag-uli sang perpekto nga kahimtangan nga natigayon anay sang unang mag-asawa sa duta antes sila nagpakasala.

 Ano ang ginsaad ni Jesus sa iban nga katawhan?

Indi kaangay ni Jesus nga gintuga agod magkabuhi sa langit, ang mga tawo gintuga para magkabuhi sa duta. (Salmo 115:16) Gani, si Jesus nagsiling: “Gikan kamo sa mga duog sa idalom; gikan ako sa mga duog sa ibabaw.” (Juan 8:23) Ginsambit ni Jesus ang matahom nga palaabuton sang mga tawo sa duta. Isa ka bes, sia nagsiling: “Malipayon ang mga malulo, kay magapanubli sila sang duta.” (Mateo 5:5) Ginpatuhuyan niya ang salmo nga nagasiling: “Apang ang mapainubuson magapanubli sang duta, kag magakalipay sila sa kabuganaan sang paghidait. Ang mga matarung magapanubli sang duta, kag magapuyo dira sa gihapon.”—Salmo 37:11, 29.

Gani indi lang ang “diutay nga panong” nga mapalangit ang makabaton sing kabuhi nga walay katapusan. Naghambal man si Jesus nga may paglaum nga bukas para sa minilyon ka tawo. Sia nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”—Juan 3:16.

Paano dulaon sang Dios ang pag-antos sang katawhan?

Naghambal si Jesus sing paumpaw gikan sa duha ka rason sang pag-antos sang sia nagsiling: “Karon may paghukom sa sini nga kalibutan; karon ang manuggahom sini nga kalibutan tabugon.” (Juan 12:31) Una, ang di-diosnon nga mga tawo nga amo ang ginabangdan sang pag-antos pagahukman kag laglagon. Ikaduha, tabugon si Satanas kag indi na niya mapatalang ang katawhan.

Apang kamusta naman ang mga tawo nga nagkabuhi kag napatay nga wala nakatuon amo nga wala sila nagtuo sa Dios kag kay Cristo? Ginsilingan ni Jesus ang makasasala nga nagatagumatayon sa Iya tupad: “Mangin kaupod ko ikaw sa Paraiso.” (Lucas 23:43) Ini nga tawo, upod sa minilyon, may kahigayunan nga makatuon tuhoy sa Dios kon banhawon na sia ni Jesus sa paraiso nga duta. Mahimo sia mangin bahin sang mga malulo kag mga matarong nga makabaton sang kabuhi nga walay katapusan sa duta.—Binuhatan 24:15.

Para sa dugang nga impormasyon, tan-awa ang libro nga Ano Gid ang Ginatudlo Sang Biblia? * sa kapitulo 3 kag 7.

[Footnote]

^ par. 13 Ginhimo sang mga Saksi ni Jehova.

[Retrato sa pahina 23]

“Ang mga matarung magapanubli sang duta, kag magapuyo dira sa gihapon.”—Salmo 37:29