Magdiretso sa kaundan

Magdiretso sa listahan sang kaundan

Ang Biblia Nagapabag-o sang Kabuhi

Ang Biblia Nagapabag-o sang Kabuhi

 Ang Biblia Nagapabag-o sang Kabuhi

Paano mauntatan sang isa ka tawo ang pagpanigarilyo kag paghithit sing marijuana nga bisyo na niya halin pa sang bata sia. Ano ang nakabulig sa isa ka mapintas nga miembro sang gang nga makontrol ang iya kaakig kag madula ang iya dumot sa iban nga rasa? Binagbinaga kon ano ang masiling nila.

MALIP-OT NGA BIOGRAPIYA

NGALAN: HEINRICH MAAR

EDAD: 38

PUNGSOD: KAZAKHSTAN

KABUHI SADTO: ADIK SA MARIJUANA KAG SIGARILYO

ANG AKON NAGLIGAD: Nabun-ag ako sa bagatnan nga Kazakhstan, mga 120 kilometros halin sa siudad sang Tashkent. Kon tig-ilinit, ang amon lugar mamala kag mainit. Ang temperatura nagalab-ot sa 45°Celsius, kag sa tigtulugnaw naganubo ini sa mga −10°Celsius. Ini nga klima maayo para sa tanom nga ubas kag marijuana.

Taga-Germany ang akon mga ginikanan. Miembro sila sang evangelical nga relihion, pero wala nila ginasunod ang ginatudlo sa ila. Bisan pa sa sini, gintudluan nila ako nga sauluhon ang Amay Namon nga pangamuyo. Sang 14 anyos ako, si Nanay kag ang akon magulang nga babayi nagtuon sa mga Saksi ni Jehova. Isa ka bes, namati ako sang ginpakita sang duha ka Saksi nga nagatuon kay Nanay ang ngalan sang Dios nga si Jehova sa iya mismo Biblia. Indi ko gid yadto malimtan. Pero wala magpadayon sa pagtuon si Nanay, kag wala man ako nagpadayon sa pagpangusisa parte sa Dios. Sang ulihi, ang amon maestra sa eskwelahan nagapanugid sang iya mga nabatian nga mga istorya parte sa sekta kuno nga ginatawag mga Saksi ni Jehova. Bangod nakatambong na ako sa mga miting sang mga Saksi ni Jehova upod sa akon utod nga babayi, ginsilingan ko ang akon maestra nga indi matuod ang iya ginapang-istorya.

Sang 15 anyos na ako, nagkadto ako sa Leningrad, nga subong St. Petersburg, sa Rusya, agod mag-eskwela para makaobra. Ginasugid ko man sa akon mga upod sa kuarto ang akon diutay nga nahibaluan parte kay Jehova. Pero, nakatuon ako sa pagpanigarilyo. Kon magpauli ako sa amon sa Kazakhstan, mahapos lang ako makabakal sang marijuana, bisan pa nahibaluan ko nga ilegal ini. Palainom man ako sang vodka kag alak nga ginhimo lang sa balay.

Sang nakatapos ako sa pag-eskwela, nangin soldado ako sang Soviet sa sulod sang duha ka tuig. Pero, wala ko gid malipatan ang akon  natun-an sa Biblia sang bata pa ako. Kon may kahigayunan, ginasugiran ko parte kay Jehova ang iban nga soldado kag ginapangapinan ang mga Saksi kon makabati ako sang kabutigan nga ginasugid parte sa ila.

Pagkatapos sang pagserbisyo sa militar, nagkadto ako sa Germany. Samtang yara ako sa kampo sang mga imigrante, nakabaton ako sing isa ka balasahon sa pagtuon sa Biblia nga ginhimo sang mga Saksi. Ginbasa ko ini dayon kag kumbinsido ako nga amo ini ang kamatuoran. Pero, indi ko gid mabayaan ang akon pagkaadik sa sigarilyo kag marijuana. Wala madugay, nagsaylo ako sa siudad sang Karlsruhe. Didto ko nakilala ang isa sa mga Saksi ni Jehova kag gintun-an niya ako sa Biblia.

KON PAANO GINBAG-O SANG BIBLIA ANG AKON KABUHI: Madugay ko na ginapatihan nga ang Biblia Pulong sang Dios. Kag sa tapos ko nabasa ang balasahon nga akon nabaton, kumbinsido ako nga ginasabat sang Biblia ang tanan nga importante nga mga pamangkot sa kabuhi. Sa gihapon, nabudlayan ako nga untatan ang akon bisyo. Sang ulihi, napahulag ako sa laygay sang Biblia sa 2 Corinto 7:1 kag nagdesisyon nga tinluan ang akon lawas “gikan sa tanan nga dagta sang unod kag espiritu,” buot silingon dapat ko untatan ang paggamit sing marijuana kag sigarilyo.

Nauntatan ko dayon ang paggamit sang marijuana. Pero mga anom pa ka bulan kag nauntatan ko ang pagpanigarilyo. Isa ka adlaw ginpamangkot ako sang Saksi nga nagatuon sa akon, “Ano ang katuyuan sang imo kabuhi?” Nagpahunahuna yadto sa akon parte sa akon pagkaadik sa sigarilyo. Makapila ka beses nga gintinguhaan ko nga untatan ang akon pagpanigarilyo. Pagkatapos sadto, kon daw nagalaway ako sa pagpanigarilyo nagapangamuyo dayon ako agod mapunggan ko ang akon kaugalingon sa baylo nga magpadala kag mangayo sa Dios sang pasaylo sa ulihi. Sang 1993, nagpili ako sang adlaw nga dapat ko untatan ang pagpanigarilyo. Sa bulig ni Jehova, wala na gid ako nakapanigarilyo liwat.

MGA BENEPISYO: Bangod gin-untatan ko na ang magasto kag makahalalit nga bisyo sang paggamit sang marijuana kag sigarilyo, nangin maayo ang akon panglawas. Sa karon, nagaboluntaryo ako sa sanga talatapan sang mga Saksi ni Jehova sa Germany. Nalipay gid ako nga ginsunod ko ang mga laygay sang Biblia! Bangod nahibaluan ko kon ano ang ginatudlo sang Biblia, may katuyuan na ang akon kabuhi.

MALIP-OT NGA BIOGRAPIYA

NGALAN: TITUS SHANGADI

EDAD: 43

PUNGSOD: NAMIBIA

KABUHI SADTO: MAPINTAS NGA MIEMBRO SANG GANG

ANG AKON NAGLIGAD: Nagdaku ako sa isa ka lugar sa Ohangwena sa aminhan sang Namibia. Ang mga tawo sa Ohangwena ginpangkastigo kag ginpamatay sa tion sang inaway sang katuigan 1980. Sa amon lugar, ginakabig nga matuod nga lalaki ang bata nga maayo makig-away kag nagapangkastigo sa iban nga bata. Gani nagtuon ako sing maayo sa pagpakig-away!

Sang nakatapos ako sa pag-eskwela, nag-istar  ako sa akon tiyo sa banwa sang Swakopmund, nga malapit sa dagat. Pag-abot ko gid didto, nag-entra ako sa gang sang rebelde nga mga pamatan-on. Nagakadto kami sa mga lugar nga ginadilian ang mga negro, kaangay sang mga hotel kag mga bar, agod lang mangita sang away. Pila ka beses kami nga nakig-away sa mga guardia kag mga pulis. Kada gab-i, nagadala ako sing kutsilyo ukon gamay nga wasay agod handa ako pirme kon may masugata ako nga kontra.

Isa ka gab-i, diutayan lang ako mapatay sa isa ka rambol. Lab-on na ako tani sang amon kontra, pero maayo na lang kay ginsumbag sia sang akon upod kag nalipong. Bisan pa sa sini, wala gihapon ako nadudla. Kon may magbais gani sa akon, lalaki man ukon babayi, ginatapungol ko dayon.

KON PAANO GINBAG-O SANG BIBLIA ANG AKON KABUHI: Sang una ko nga nakilala ang isa sa mga Saksi ni Jehova, ginbasa sa akon sang babayi ang pila ka bersikulo sa Salmo 37 kag ginsilingan niya ako nga sa tulun-an sang Bugna sa Biblia may iban pa nga matahom nga saad sa palaabuton. Pero wala niya ginsugid sa akon kon sa diin nga bersikulo ko ini mabasa, amo nga nangita ako sing Biblia kag ginbasa ang bug-os nga Bugna sa sina nga gab-i. Nanamian gid ako sa saad nga nabasa ko sa Bugna 21:3, 4 nga “wala na sing kamatayon, ukon paglalaw ukon paghibi ukon kasakit pa.” Sang nagbalik ang mga Saksi, ginbaton ko ang ila tanyag nga pagtuon sa Biblia.

Nabudlayan gid ako nga bag-uhon ang akon panghunahuna kag paggawi. Pero natun-an ko sa Binuhatan 10:34, 35 nga “ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” Nanikasog man ako nga maaplikar ang Roma 12:18: “Kon mahimo, tubtob sa masarangan ninyo, magpakighidait sa tanan nga tawo.”

Luwas nga tun-an ko ang pagkontrol sa akon kaakig, kinahanglan ko man nga untatan ang akon bisyo nga pagpanigarilyo. Pirme ako nagahilibion sa pagpangayo sing bulig kay Jehova. Sang primero, nagasiling ako nga amo na ini ang akon “katapusan” nga sigarilyo, kag sa tapos makapanigarilyo mangamuyo ako dayon. Ginbuligan ako sang Saksi nga nagatudlo sa akon nga importante ang pagpangamuyo antes ako masulay sa pagpanigarilyo. Kinahanglan nga indi man ako makig-upod sa mga nagapanigarilyo. Isa pa, ginsunod ko ang laygay nga isugid sa akon kaupod sa trabaho ang malain nga resulta sang pagpanigarilyo. Nakabulig gid ini sa akon para wala na sing kaupod ko sa trabaho nga magtanyag sa akon sing sigarilyo.

Wala magdugay, nauntat ko ang pagpanigarilyo kag ang akon malain nga estilo sa pagkabuhi. Pagkatapos sang anom ka bulan nga pagtuon kag pag-aplikar sang mga prinsipio sa Biblia, nangin kalipikado ako nga magpabawtismo bilang isa sa mga Saksi ni Jehova.

MGA BENEPISYO: Sang nakita ko ang paghigugmaanay sa tunga sang mga Saksi ni Jehova bisan ano man ang ila rasa ukon kolor sang panit, nakumbinsi ako nga amo na ini ang matuod nga relihion. Antes pa ako nabawtismuhan, gin-imbitar ako sang isa ka puti nga Saksi nga magkaon sa ila balay. Daw nagadamgo lang ako. Wala pa gid ako makaupod sa isa ka puti nga tawo, ilabi na sa pagkaon sa ila balay. Karon, nangin bahin na ako sang matuod nga internasyonal nga paghiliutod.

Sang una, ginapilit ako sang mga guardia kag mga pulis nga magbag-o, pero wala sila sing nahimo. Ang Biblia lamang ang may gahom sa pagbag-o sa akon kag nagbulig sa akon nga mangin malipayon.

[Blurb sa pahina 29]

“Sa masami, nagahilibion ako sa pagpangayo sing bulig kay Jehova”