Magdiretso sa kaundan

Magdiretso sa listahan sang kaundan

Pagbisita sa Tumalagsahon nga Imprintahan

Pagbisita sa Tumalagsahon nga Imprintahan

 Pagbisita sa Tumalagsahon nga Imprintahan

MAHIMO madamo nga isyu sini nga magasin ang nabasa mo na. Ayhan may nagduaw na sa inyo nga mga Saksi ni Jehova kag nagtanyag sa imo sing Ang Lalantawan kag Magmata! para buligan ka nga maintiendihan sing maayo ang Biblia. Ukon nakita mo ang mga Saksi nga nagatanyag sini nga mga magasin sa publiko nga mga lugar. Ang matuod, sobra 35 milyones sini nga magasin ang ginaimprinta kada bulan, kag amo ini ang relihioso nga magasin nga pinakalapnag nga ginapanagtag sa bilog nga kalibutan.

Pero, nakahibalo ka bala kon sa diin kag kon paano ini ginahimo? Ang mga Saksi ni Jehova may mga imprintahan sa lainlain nga lugar. Tan-awon naton ang isa sa sini nga yara sa Wallkill, New York, U.S.A. Madamo nga bumalasa sa bilog nga kalibutan ang indi makakadto sa imprintahan sang mga Saksi ni Jehova sa Estados Unidos. Gani, daw kaangay lang nga nakakadto ka sa sini nga imprintahan paagi sa mga piktyur kag mga paglaragway diri.

Siempre, antes sang pag-imprinta, ginasulat anay ang mga artikulo. Ini nga mga artikulo naghalin sa Writing Department sa Brooklyn, New York kag ginapadala ini sa Graphics Department subong mga electronic file. Ginagamit ini sa paghimo sing mga plate sa pag-imprinta. Sa Wallkill, mga 1,400 ka rolyo sang papel ang nagaabot sa imprintahan kada bulan. Kada adlaw, mga 80 asta 100 ka tonelada sang papel ang ginagamit. Ini nga mga rolyo sang papel, nga nagabug-at sing sobra 1,300 ka kilo, ginapasulod sa lima ka dalagku nga makina sa pag-imprinta. Ginaimprinta ini, gina-utod, kag ginapilo sa tag-32 ka pahina. Ang magasin nga ginabasa mo amo ang isa sa sini. Paano naman ginaimprinta ang mga libro? Sa bindery, ang pila ka tig-32 pahina nga gin-imprinta ginatingob para himuon nga libro. Sa isa ka adlaw, ang isa ka seksion sang bindery makahimo sing 50,000 ka libro nga matig-a sing panghapin ukon 75,000 ka libro nga mahumok sing panghapin. Ang isa pa ka seksion makahimo naman sing mga 100,000 ka libro nga mahumok sing panghapin sa isa lang ka adlaw.

Sang tuig 2008, ini nga imprintahan nakaimprinta sing sobra sa 28,000,000 ka libro, kag 2.6 milyones sini ang mga Biblia. Sang amo man nga tuig, 243,317,564 ka magasin ang naimprinta. Ginapundo sa sini nga imprintahan ini nga mga literatura sa Biblia sa mga 380 ka lenguahe. Ano ang masunod nga ginahimo kon maimprinta na ang mga literatura?

Ang imprintahan nagabaton sing order sang mga literatura halin sa 12,754 ka kongregasyon sang mga Saksi ni Jehova sa Estados Unidos kag 1,369 ka kongregasyon sa Caribbean kag Hawaii. Ginasulod sang mga boluntaryo sa Shipping Department ining tanan nga order sa karton kag ginapadala sa mga adres sang kongregasyon. Kada  tuig, mga 40 milyones ka kilo nga mga literatura ang ginapadala sa mga kongregasyon sa Estados Unidos.

Ang labing importante nga bahin sini nga imprintahan indi ang makinarya kundi ang mga tawo. Sobra 300 ang nagatrabaho sa mga departamento sini nga imprintahan—ang Graphics, Scheduling, Pressroom, Bindery, kag Shipping. Ang mga nagatrabaho diri, nga nagaedad sing 19 asta 92, mga boluntaryo kag wala sing sueldo.

Ini nga mga boluntaryo interesado gid sa mga tawo nga gusto magbasa sini nga mga literatura. Sa amo matudluan sila, mapalig-on, kag maggiyahan sang mga prinsipio sa Biblia nga ginabinagbinag sa sini nga mga balasahon. Ginalauman namon nga isa ikaw sining mga bumalasa, kag ang mga literatura nga ginaimprinta diri ukon sa imprintahan sa iban nga lugar makabulig sa imo nga magpadayon sa pagkuha sing ihibalo parte kay Jehova nga Dios kag kay Jesucristo, nga nagahatag sing kabuhi nga wala sing katapusan.—Juan 17:3.

[Mga Retrato sa pahina 16]

 [Bug-os pahina nga retrato sa pahina 17]