Magdiretso sa kaundan

Magdiretso sa listahan sang kaundan

Kon Ngaa Mapuslanon ang Biblia Subong

Kon Ngaa Mapuslanon ang Biblia Subong

 Kon Ngaa Mapuslanon ang Biblia Subong

“Ang bug-os nga Kasulatan ginsulat paagi sa gahom sang Dios, kag mapuslanon . . . sa pagtudlo sang matarong nga pagkabuhi.”—2 TIMOTEO 3:16, Ang Pulong sang Dios.

SA SULOD sang madamo nga siglo, ang Biblia nagpahulag sa lainlain nga mga tawo nga magbag-o sang ila pagkabuhi. Ang bersikulo nga ginsambit sa ibabaw nagapaathag kon ngaa epektibo gid ang Biblia—ang kaalam sini naghalin mismo sa Dios. Bisan pa ang Biblia ginsulat sang mga tawo, ginasugid sini sa aton ang panghunahuna sang Dios. Ang Biblia nagpaathag: “Ang mga tawo nagpamulong gikan sa Dios samtang ginatuytuyan sila sang balaan nga espiritu.”—2 Pedro 1:21.

Ang Biblia mapuslanon gid sa duha ka paagi. Una, ginapakita sini kon ano ang himuon para matigayon ang maayo nga pagkabuhi. Ikaduha, may gahom ini nga nagapahulag sa mga tawo nga himuon ang mga pagbag-o para mangin maayo ang ila pagkabuhi. Binagbinagon naton ining duha ka paagi.

Kaalam Para sa Maayo nga Pagkabuhi

Ginpakita sang Biblia ining saad sang Dios: “Tudluan ko ikaw sang dalan nga dapat mo pagaagyan. Laygayan ko ikaw samtang nagabantay ako sa imo.” (Salmo 32:8, APD) Talupangda nga wala lamang kita ginalaygayan sang Dios kundi ginatudluan niya kita para mangin maalam. Paagi sining kaalam, mabuligan kita nga pilion ang maayo nga pagkabuhi kag likawan ang wala pulos nga mga handum.

Halimbawa, madamo nga tawo ang nagahandum nga mangin bantog kag mangin manggaranon. Ang self-help nga mga libro nagaunod sing mga pamaagi kon paano malabawan ang iban para matigayon ang kabantugan kag manggad. Sa pihak nga bahin, ang Biblia nagsiling sa aton: “Ang tawo ginakahisaan sang iya isigkatawo. Ini man kadayawan kag pagpanikasug sa hangin.” “Ang nagahigugma sang pilak indi mabusug sing pilak.” (Manugwali 4:4; 5:10) Mapuslanon bala ina nga laygay subong?

Sa pag-ilustrar kon daw ano ka mapuslanon ang laygay sang Biblia, binagbinagon naton ang halimbawa ni Akinori sa Japan. Bisan pa grabe ang kompetisyon, nalab-ot ni Akinori ang iya handum nga makagradwar sa nagapanguna nga unibersidad kag makaobra sa isa ka kilala nga kompanya. Daw plastado na ang mga butang para sa iya. Pero, ang iya kadalag-an wala naghatag sa iya sing kalipay nga ginalauman niya. Sa baylo, nagbalatian sia bangod sa sobra nga kakapoy. Wala sia nalugpayan sang iya mga abyan nga kaupod niya sa trabaho. Bangod sa  depresyon, nangin alkoholiko sia kag gintilawan pa gani niya nga manginmatay. Sang ulihi, nagtuon sia sa Biblia sa mga Saksi ni Jehova. Ang iya natun-an nagpabag-o sang iya pagtamod kon ano ang importante sa kabuhi. Wala madugay, nadula ang iya balatian nga resulta sang sobra nga kakapoy. Bangod wala na sia nagpadala sa iya bugal kag ambisyon, naeksperiensiahan mismo ni Akinori ang ginsiling sang isa ka hulubaton sa Biblia: “Nagahatag sang kabuhi sa lawas ang matawhay nga tagipusoon.”—Hulubaton 14:30, Biblia sang Katilingban sang mga Kristiano.

Ano ang ginakabig mo nga pinakamaayo nga handum sa kabuhi nga makahatag sa imo sing matuod nga kalipay? Ang madinalag-on bala nga pag-asawahay? Ang maayo nga pagpadaku sa imo kabataan? Ang pagtigayon sing madamo nga abyan? Ukon ang malipayon nga pagkabuhi? Tanan ini maayo gid nga mga handum. Ang matuod, nagsiling ang Biblia nga tigayunon naton ini nga mga butang, pero indi ini dapat ang pinakaimportante nga butang sa aton kabuhi. Ginatudlo sang Biblia kon ano ang importante nga kinahanglanon para matigayon naton ang makalilipay nga pagkabuhi. Nagsiling ini: “Magkahadluk sa Dios, kag magbantay sa iya mga sogo; kay amo ini ang bug-os nga katungdanan sang tawo.” (Manugwali 12:13) Kon indi naton ini pagtumanon, ang aton kabuhi mangin wala sing pulos, puno sing kasubo kag kapaslawan. Sa pihak nga bahin, ang Biblia nagapasalig sa aton: “Malipayon sia nga nagasalig kay Jehova.”—Hulubaton 16:20, NW.

Kon Paano ang Biblia Makapabag-o sa mga Tawo

“Ang pulong sang Dios buhi kag gamhanan,” sulat ni apostol Pablo. Ang Biblia pareho sa espada nga matalom kag duha sing sulab. Makasalop ini sa nasulod nga panghunahuna kag intension sang isa ka tawo. (Hebreo 4:12) Paagi sa Biblia, makilala sing maayo sang isa ang iya matuod nga pagkatawo. Gani, ang mga tawo nga may matarong nga tagipusuon makahunahuna nga kinahanglan nila maghimo sing mga pagbag-o. Halimbawa, sa mga Cristiano sa kongregasyon sang dumaan nga Corinto nga sadto anay mga kawatan, palahubog, makihilahion kag iban pa, si Pablo nagsiling: “Amo sina anay ang pila sa inyo. Apang ginhugasan na kamo . . . sang espiritu sang aton Dios.” (1 Corinto 6:9-11) Sa karon, ang balaan nga espiritu ni Jehova aktibo kag gamhanan gihapon, kag makapahulag man ini sa mga tawo nga maghimo sing mga pagbag-o.

Si Mario, nga nagaistar sa Europa, mapintas nga tawo. Nagapanigarilyo sia kag nagabaligya sing marijuana. Isa ka bes, sang ginkompiskar sang pulis ang iya mga droga, naakig gid sia amo nga ginbalusan niya ang pulis kag ginguba ang iya salakyan. Isa pa, wala sing trabaho si Mario kag nalubong sia sa utang. Bangod indi niya masolbar ang iya mga problema, nagpasugot sia nga magtuon sa Biblia. Ginsunod ni Mario ang iya natun-an amo nga ginbag-o niya ang iya pamayo. Gin-untatan man niya ang paggamit kag pagbaligya sang droga, kag nangin mabuot sia. Natingala gid ang iya mga kilala. Ginpamangkot nila sia, “Mario, ikaw na ina?”

Ano ang nagpabag-o sa mga tawo pareho ni Akinori kag Mario, kag paano nila nasapwan ang matuod nga kalipay sa kabuhi? Maathag gid nga ginpabag-o sila sang ila natun-an sa Biblia parte sa Dios. Ang Dios lamang ang makahatag sing mapuslanon nga pagtudlo nga kinahanglan naton para magmadinalag-on subong kag matigayon ang kabuhi nga wala katapusan sa palaabuton. Pareho sang isa ka Amay, si Jehova nga Dios nagapakighambal sa aton paagi sa Biblia: “Pamatii, O anak ko, kag batona ang akon mga ginasiling, kag ang mga tuig sang imo kabuhi magadamu. . . . Kon ikaw nagalakat, indi masablagan ang imo mga tikang; kag kon ikaw nagadalagan, indi ka makasandad. Kapti sing malig-on ang pagtudlo, dili sia pagbuhii; bantayi sia, kay sia imo kabuhi.” (Hulubaton 4:10-13) May mas mapuslanon pa bala sa laygay sang aton Manunuga?

 [Kahon/Retrato sa pahina 7]

Mapuslanon nga mga Laygay Subong

Ang Biblia nagahatag sing kinaandan pero mapuslanon nga mga prinsipio nga makagiya sa tagsa ka bahin sang aton kabuhi subong. Yari ang pila ka halimbawa:

Maayo nga relasyon sa iban

“Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.”—Mateo 7:12.

“Sia nga nagagawi nga kubos sa tunga ninyo amo ang labing daku.”—Lucas 9:48.

“Sunda ang dalanon sang pagkamaabiabihon.”—Roma 12:13.

Pag-untat sang malain nga mga batasan

“Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.” —Hulubaton 13:20.

“Dili ka magsimpon sa mga palainum sing alak.”—Hulubaton 23:20.

“Dili ka makig-abyan sa tawong maakigon.”—Hulubaton 22:24.

Pagtukod sing mabakod nga pag-asawahay

“Ang kada isa sa inyo maghigugma man sang iya asawa subong sang paghigugma niya sa iya kaugalingon; kag ang asawa dapat may tudok nga pagtahod sa iya bana.”—Efeso 5:33.

“Panapti ang inyo kaugalingon sang mapinalanggaon nga balatyagon nga may kaawa, kaayo, pagpaubos sang hunahuna, kalulo, kag pagkamapinasensiahon. Padayon nga batasa ninyo ang isa kag isa kag patawaron sing kinabubut-on.”—Colosas 3:12, 13.

Pagbulig sa kabataan

“Hanasa ang bata sa dalanon nga dapat niya paglaktan, kag bisan tigulang na sia indi sia magtalikod sa sini.”—Hulubaton 22:6.

“Kamo, mga amay, indi ninyo pagpaakiga ang inyo mga anak, kundi padayon sila nga padakua sa disiplina kag nagatuytoy nga panghunahuna ni Jehova.”—Efeso 6:4.

Paglikaw sa gamo

“Ang mahomok nga panalabton nagapalugpay sang kasingkal, apang ang matigdas nga polong nagapaibwal sang kaakig.”—Hulubaton 15:1.

“Sa pagpadungog sa isa kag isa manguna kamo.”—Roma 12:10.

Bisan pa sa mga mag-abyanay, malikawan pirme ang pag-inaway parte sa negosyo kon may yara nasulat nga kasugtanan. Gani, ang alagad sang Dios nga si Jeremias nagsulat: “Ginpirmahan ko ang kalig-onan, ginpat-inan ini, nagtawag sing mga saksi, kag gintimbangan sia sang cuarta sa mga timbangan.”—Jeremias 32:10.

Pagpakita sing positibo nga panimuot

“Bisan ano nga butang nga matuod, . . . hiligugmaon, . . . dungganon, bisan ano nga labing maayo kag bisan ano nga dalayawon nga butang, padayon nga hunahunaa ini nga mga butang.”—Filipos 4:8.

Wala ginapalig-on sang Biblia nga dumdumon pirme ang mga negatibo nga mga butang, kag ginapakamalaut sini ang “mga reklamador tuhoy sa ila kahimtangan sa kabuhi.” Nagsiling ini: “Magkasadya sa paglaum.”—Judas 4, 16; Roma 12:12.

Ang pagsunod sa sining mapuslanon nga mga prinsipio indi lamang makahatag sing paghidait kag kalipay subong kundi makabulig man sa aton nga himuon ang mga ginapatuman sang Dios kag mabaton ang iya mga pagpakamaayo. Ang Biblia nagasiling: “Ang mga matarung magapanubli sang duta, kag magapuyo dira sa gihapon.”—Salmo 37:29.

[Mga Retrato sa pahina 5]

Sang negosyante si Akinori (sa wala), kag upod sa iya asawa subong nga malipayon nga nagasugid sa iban sang kamatuoran sa Biblia