Magdiretso sa kaundan

Magdiretso sa listahan sang kaundan

Si Jesus—Ano ang Ginasiling sang mga Tawo Tuhoy sa Iya?

Si Jesus—Ano ang Ginasiling sang mga Tawo Tuhoy sa Iya?

 Si Jesus​—Ano ang Ginasiling sang mga Tawo Tuhoy sa Iya?

“Si Jesus nga taga-Nazaret . . . pat-od gid nga amo ang pinakabantog nga tawo sa kasaysayan.”​—H. G. Wells, Ingles nga istoryador.

“Si Cristo . . . pinasahi gid sa tanan nga baganihan sa kasaysayan.”​—Philip Schaff, taga-Switzerland nga teologo kag istoryador.

SIN-O bala ang matawag nga pinakabantog nga tawo nga nagkabuhi? Paano matakus ang pagkabantog sang isa ka tawo? Paagi bala sa iya pagkasampaton sa militar? Sa iya pisikal nga kusog? Sa iya kaalam? Ukon paagi bala sa impluwensia sang iya mga pulong, mga buhat, kag mga halimbawa nga ginapakita sa mga tawo?

Talupangda kon ano ang ginsiling sang mga istoryador, sientipiko, iskolar, manunulat, pulitiko, kag iban pa​—sang una kag karon—​tuhoy kay Jesucristo nga taga-Nazaret:

“Kinahanglan mo dayaon ang kamatuoran agod mapanghiwala nga si Jesus nga taga-Nazaret amo ang may pinakadaku nga impluwensia, indi lamang sa nagligad nga duha ka libo ka tuig kundi sa bug-os nga maragtas sang tawo.”​—Reynolds Price, Amerikano nga manunulat kag iskolar sang Biblia.

“Ginhalad sang isa ka tawo nga wala sing sala ang iya kaugalingon para sa kaayuhan sang iban, lakip na sa iya mga kaaway kag nangin gawad para sa bug-os nga kalibutan. Isa gid ini ka perpekto nga buhat.”​—Mohandas K. Gandhi, lider sang pulitika kag relihion sa India.

“Subong isa ka bata, natudluan ako sa Biblia kag sa Talmud. Isa ako ka Judiyo, apang nanamian gid ako sa pagkatumalagsahon ni Jesus.”​—Albert Einstein, sientipiko nga natawo sa Alemanya.

“Para sa akon, nagapangibabaw gid si Jesucristo sa bug-os nga kasaysayan, subong Anak sang Dios kag Anak sang Tawo. Ang tanan Niya nga ginsiling kag ginhimo mapuslanon para sa aton karon, kag wala na sing tawo nga kaangay niya, patay man ukon buhi.”​—Sholem Asch, awtor nga natawo sa Poland nga ginkutlo sa Christian Herald; italiko ila.

“Sa sulod sang treintay singko ka tuig sang akon kabuhi, wala ako sing ginapatihan. Apang sang nagligad nga lima ka tuig, nangin kumbinsido ako nga matuod gid si Jesus. Nagpati ako sa mga panudlo tuhoy kay Jesucristo kag hinali lang nga nagbag-o ang akon bug-os nga kabuhi.”​—Count Leo Tolstoy, isa ka Ruso nga pilosopo kag manunulat sing nobela.

“Ang kabuhi [ni Jesus] amo ang may pinakadaku nga impluwensia sa sini nga planeta kag nagadamo pa gid ang nagakaimpluwensiahan.”​—Kenneth Scott Latourette, Amerikano nga istoryador kag awtor.

“Kabigon bala naton nga sugidsugid lamang ang kasaysayan sang kabuhi ni Jesus? Sa pagkamatuod abyan ko, indi gid ini sugidsugid lamang. Sa kabaliskaran, ang kasaysayan tuhoy kay Socrates, nga wala gani sing may nagapangduhaduha, may diutay lamang nga pamatuod kon ipaanggid kay Jesucristo.”​—Jean-Jacques Rousseau, Pranses nga pilosopo.

Maathag gid nga wala na sang mas maayo pa nga huwaran sa aton kabuhi kundi si Jesucristo lamang. Si Pablo, nga isa ka edukado nga tawo sang unang siglo, nga ginpili ni Jesus nga mangin Iya sumulunod kag magpanaksi tuhoy sa Iya sa mga pungsod, nagpalig-on sa aton nga ‘magtulok sing maayo’ kay Jesus. (Hebreo 12:2; Binuhatan 9:3) Ano ang matudlo ni Jesus sa aton pagkabuhi? Paano makabulig sa imo ang iya kabuhi?