Magdiretso sa kaundan

Magdiretso sa listahan sang kaundan

Ginaguba Bala sang mga Saksi ni Jehova ang Pag-asawahay?

Ginaguba Bala sang mga Saksi ni Jehova ang Pag-asawahay?

 Ginaguba Bala sang mga Saksi ni Jehova ang Pag-asawahay?

“KON ang isa ka tiayon magsaylo sa iban nga relihion, maguba ang pag-asawahay.” Amo sini ang ginasiling sang madamo nga tawo. Kon kaisa, ginahambal nila ini sa asawa ukon bana nga nangin Saksi ni Jehova. Apang matuod gid bala ini sa tanan nga mag-asawa?

Kon islan sang isa ang iya namat-an na nga relihion, natural lang nga mahinalian, mabalaka, masubuan ukon maakig pa gani ang iya tiayon.

Sa masami, ang asawa amo ang interesado nga magsaylo sa iban nga relihion. Kon ang imo asawa nagatuon sing Biblia sa mga Saksi ni Jehova, paano sini maapektuhan ang inyo pag-asawahay? Kon ikaw isa ka asawa nga nagapakig-upod sa mga Saksi ni Jehova, ano ang himuon mo agod mahaganhagan ang kabalaka sang imo tiayon?

Ang Pagtamod sang Bana

Si Mark nga taga-Australia, 12 anyos na nga minyo sang magtuon ang iya asawa sa Biblia sa mga Saksi ni Jehova. “Malipayon ang amon pag-asawahay kag may maayo ako nga trabaho,” siling ni Mark. “Daw halos yara na sa akon ang tanan. Nian ang akon asawa nagtuon sa Biblia sa mga Saksi ni Jehova. Hinadlukan ako kay basi maapektuhan sini ang mga butang nga naandan na namon nga ginahimo. Sang primero, indi ako mapahamtang nga nagatuon ang akon asawa sa Biblia, pero sang ginsilingan niya ako nga mapabawtismo sia sa mga Saksi ni Jehova, nabalaka na gid ako.”

Nabalaka si Mark nga basi magbulagay sila bangod sa bag-o nga relihion sang iya asawa. Gani, nahunahuna niya nga pauntaton ang iya asawa sa pagtuon sa Biblia kag indi sia pagtugutan nga makigkita sa mga Saksi. Apang sa baylo nga magpadasudaso, ginpaligad niya anay ang pila ka tion. Ano ang natabo sa ila pag-asawahay?

“Nalipay ako nga nagbakod kag nangin malipayon pa gid ang amon pag-updanay sugod sang ginbawtismuhan sia subong isa sa mga Saksi ni Jehova, 15 ka tuig na ang nagligad,” siling ni Mark. Ano ang nakabulig nga nangin madinalag-on ang ila pag-asawahay? “Madumduman ko pa nga daku gid ang nabulig sang gin-aplikar sang akon asawa ang maayo nga mga laygay sang Biblia. Ginatinguhaan gid  niya pirme nga tahuron ako,” panaysayon ni Mark.

Panugda sang Madinalag-on nga mga Asawa

Kon ikaw isa ka asawa nga nagapakig-upod sa mga Saksi ni Jehova, ano ang puede mo himuon kag ihambal sa imo bana agod mahaganhagan ang iya kabalaka? Binagbinaga ang mga komento sining mga babayi gikan sa lainlain nga bahin sang kalibutan.

Sakiko, Japan: “May tatlo ako ka kabataan kag 31 anyos na ako nga minyo. Beinte dos anyos na ako nga Saksi ni Jehova karon. Daw kabudlay kon kaisa pakigbagayan ang akon bana bangod indi pareho ang amon relihion. Apang ginatinguhaan ko gid nga iaplikar ang laygay sang Biblia nga mangin ‘maabtik sa pagpamati, mahinay sa paghambal, mahinay sa pagpangakig.’ (Santiago 1:19) Ginapasugtan ko man sia sa mga luyag niya kon indi man lang ini supak sa mga prinsipio sa Biblia. Nakabulig ini nga mangin malipayon ang amon pag-asawahay.”

Nadezhda, Rusya: “Beinte otso anyos na ako nga minyo kag 16 anyos na ako karon nga Saksi ni Jehova. Antes ako makatuon sa Biblia, wala ako maghunahuna nga ang akon bana amo ang ulo sang pamilya. Gani, sa masami nagadesisyon ako nga wala sia ginakonsulta. Apang, natalupangdan ko nga sang gin-aplikar ko ang mga prinsipio sa Biblia, nangin malipayon kag mahidaiton ang amon pamilya. (1 Corinto 11:3) Mas mahapos na karon sa akon nga magpasakop sa akon bana, kag natalupangdan niya ining mga pagbag-o.”

Marli, Brazil: “May duha ako ka bata kag 21 anyos na ako nga minyo. Nangin bawtismado ako nga Saksi sa sulod na sang 16 ka tuig. Natun-an ko nga luyag ni Jehova nga Dios nga mag-unungay gid ang mga mag-asawa. Gani gintinguhaan ko nga mangin maayo nga asawa, kag maghambal kag maggawi sa paagi nga makapahalipay kay Jehova kag sa akon bana.”

Larisa, Rusya: “Sang nangin Saksi ni Jehova ako, mga 19 ka tuig na ang nagligad, narealisar ko nga dapat gid ako maghimo sing mga pagbag-o sa akon kabuhi. Nakita sang akon bana nga bangod sa pagtuon ko sa Biblia nangin maayo ako nga asawa kay mas ginapabaloran ko sia karon. Sang primero, pirme kami nagabaisay tuhoy sa pagdisiplina sa mga bata, apang sang ulihi nasolbar man namon ini. Ginapaupod niya ang mga bata sa akon sa pagtambong sa mga miting kay nakita niya nga daku ang mabulig sini sa ila.”

Valquíria, Brazil: “May isa ako ka bata kag 19 anyos na nga minyo. Trese ka tuig na ako nga Saksi ni Jehova. Sang primero, indi magpasugot ang akon bana nga mag-upod ako sa pagbantala. Apang ginpaathag ko ini sa iya sa malulo nga paagi kag ginpakita sa iya nga ang Biblia may maayo nga epekto sa akon personalidad. Amat-amat nga nakita sang akon bana kon daw ano ka importante sa akon ang pagbantala nga hilikuton. Karon, ginasuportahan na niya ang akon espirituwal nga mga hilikuton. Kon magdumala gani ako sing pagtuon sa Biblia sa mga uma-uma, sia ang nagadrayb sang amon salakyan kag ginahulat gid niya ako tubtob makatapos.”

Maayo nga Resulta

Kon ang imo tiayon nagapakig-upod sa mga Saksi ni Jehova, indi ka magkabalaka. Indi maguba ang inyo pag-asawahay. Nasapwan sang madamo nga bana kag asawa sa lainlain nga bahin sang kalibutan nga ang Biblia makabulig sa pag-asawahay.

Ang isa ka bana nga indi Saksi ni Jehova, tampad nga nag-ako: “Sang primero grabe gid ang akon kabalaka kag daw indi ko mabaton nga nangin Saksi ni Jehova ang akon asawa. Pero subong daw nadula na ang tanan ko nga kabalaka kay nakita ko nga mas maayo gali nga nangin Saksi sia.” Ang isa naman ka bana nagkomento tuhoy sa iya asawa: “Bangod sa katutom, determinasyon, kag integridad sang akon asawa, nagdayaw gid ako sa mga Saksi ni Jehova. Daku ang nabulig sang iya relihion sa amon pag-asawahay. Ginapasensiahan namon ang kakulangan sang isa kag isa kag luyag gid namon nga mag-unungay kami tubtob nagakabuhi.”

 [Kahon/​Piktyur sa pahina 13]

Paano Ginatamod sang mga Saksi ni Jehova ang Pag-asawahay?

Ginakabig sang mga Saksi ni Jehova ang Biblia nga inspirado nga Pulong sang Dios. Gani ginatamod gid nila nga serioso ang mga laygay sini tuhoy sa pag-asawahay. Talupangda kon ano ang sabat sang Biblia sa masunod nga mga pamangkot:

Ginapalig-on bala sang mga Saksi ni Jehova nga bulagan sang ila mga katapo ang ila tiayon nga indi Saksi? Wala. Si apostol Pablo nagsulat: “Kon ang bisan sin-o nga utod nga lalaki may di-tumuluo nga asawa, apang nagapasugot sia sa pagpuyo upod sa iya, indi niya sia pagbayaan; kag ang babayi nga may di-tumuluo nga bana, apang nagapasugot sia sa pagpuyo upod sa iya, indi niya pagbayaan ang iya bana.” (1 Corinto 7:12, 13) Ginatuman sang mga Saksi ni Jehova ini nga sugo.

Ginapalig-on bala ang asawa nga Saksi ni Jehova nga indi niya pagtumanon ang luyag sang iya bana nga tuhay sing relihion? Wala. Si apostol Pedro nagsulat: “Kamo nga mga asawa, magpasakop kamo sa inyo bana, agod ang bisan sin-o nga wala nagatuman sa pulong, madaug sila nga wala sing pulong paagi sa paggawi sang ila asawa, bangod nasaksihan mismo nila ang inyo putli nga paggawi upod ang tudok nga pagtahod.”​—1 Pedro 3:1, 2.

Ginatudlo bala sang mga Saksi ni Jehova nga may bug-os nga awtoridad ang bana sa iya asawa? Wala. Si apostol Pablo nagsiling: “Luyag ko nga mahibaluan ninyo nga ang ulo sang tagsa ka lalaki amo ang Cristo; ang ulo naman sang babayi amo ang lalaki; ang ulo naman sang Cristo amo ang Dios.” (1 Corinto 11:3) Dapat tahuron sang Cristianong asawa ang iya bana kay ang bana amo ang ulo sang pamilya. Apang ang bana wala sing bug-os nga awtoridad sa iya asawa. Suno sa teksto ang bana dapat magpasakop sa iya ulo​—ang Dios kag si Cristo. Gani, kon may ginapahimo ang bana sa iya asawa nga supak sa kasuguan sang Dios, dapat tumanon sang Cristianong asawa ang “Dios subong manuggahom sa baylo sang mga tawo.”​—Binuhatan 5:29.

Ginadilian bala sa mga Saksi ni Jehova ang pagdiborsio? Wala. Si Jesucristo nagsiling: “Ang bisan sin-o nga magdiborsio sa iya asawa, luwas lamang kon nakighilawas [seksuwal nga imoralidad], kag magpangasawa sang iban nagapanghilahi.” (Mateo 19:9) Gani, ginasunod sang mga Saksi ni Jehova ang pagtamod ni Jesus nga mahimo diborsiohan sang isa ang iya tiayon bangod sa panghilahi. Apang nagapati gid sila nga indi dapat magbulagay ang mag-asawa bangod lamang sa witiwiti nga mga rason. Ginapalig-on nila ang ila mga katapo nga sundon ang mga pulong ni Jesus: “Bayaan sang lalaki ang iya amay kag ang iya iloy kag magahiusa sa iya asawa, kag ang duha mangin isa ka unod. . . . Gani, ang gintingob sang Dios indi pagbulagon sang tawo.”​—Mateo 19:5, 6.