Magdiretso sa kaundan

Magdiretso sa listahan sang kaundan

Natun-an Ko nga Bilidhon Gid ang Kabuhi

Natun-an Ko nga Bilidhon Gid ang Kabuhi

 Natun-an Ko nga Bilidhon Gid ang Kabuhi

ISA KA AGA SANG ABRIL 16, 2007. Samtang nagakuob ako sa pamusod sang opisina sa ikatlo nga panalgan sang Norris Hall sa Virginia Polytechnic Institute and State University, ukon Virginia Tech, nadumduman ko liwat kon ngaa dapat gid naton pasalamatan ang tagsa ka bilidhon nga adlaw sang aton kabuhi.

Antes sini, yara ako sa akon opisina kag manugpanaug na sa ikaduha nga panalgan agod kuhaon ang akon sulat. Apang, ginpangabay ako sang isa ka propesor nga madalikyat sa iya opisina agod buligan sia sa iya problema sa kompyuter. Samtang nagapasulod kami sa iya opisina, nabatian namon ang inasud-asod nga lupok sa ikaduha nga panalgan. Wala kami sing hinalung-ong kon ano ang nagatabo, amo nga nagdalidali kami sulod sa iya opisina kag nangandado, nga ginakulbaan kon ano ang matabo sa amon. Nagpanago ako sa pamusod sang opisina kag nangamuyo kay Jehova nga Dios, nga nagapangabay sang iya panuytoy agod maatubang ang mahimo matabo.

Samtang nagahulat kami, nadumduman ko ang natabo sa akon sang nagligad nga 15 ka tuig. Nagatrabaho ako sadto subong mekaniko sa isa ka talyer. Nagdabdab ang gasolina nga nauyatan sang akon kaupod sa trabaho. Bangod natarantar sia, nasabya niya ini sa akon nawong! Nahaklo ko ini kag napaso gid ang naibabaw nga bahin sang akon lawas. Gindala ako sang helikopter sa ospital para sa mga napaso kag nagpabilin ako sa ICU sing tatlo ka bulan kag tunga, nga nagapakigbato sa kamatayon. Pagligad sing lima ka bulan nga pagbulong kag pagpaayo, nakapauli gid man ako sa balay, kag nagapasalamat nga buhi gihapon ako. Ina nga eksperiensia nagtudlo sa akon nga pabaloran ang kabuhi kada adlaw. Subong Saksi ni Jehova, nangin determinado pa gid ako nga gamiton ang akon kabuhi sa pag-alagad sa naghatag sini sa akon, si Jehova nga Dios.​—Salmo 90:12; Isaias 43:10.

Bangod sang komplikasyon sang akon mga paso, indi na ako makatrabaho subong mekaniko, gani nagtuon ako sing kompyuter kag nakatrabaho sa Virginia Tech. Amo kon ngaa yara ako sa Norris Hall sina nga aga.

Samtang nagapadayon ang linupok, wala kami sing hinalung-ong nga sa ubos lang sang amon nahamtangan nagakatabo ang labing makangilidlis nga pagpangluthang sa maragtas sang Estados Unidos. Nag-untat lamang ini sang naghikog ang kriminal, apang 32 ka inosente ang iya napatay. Pagligad sang mga 20 minutos sugod sang pagpangluthang, nabatian namon ang mga pulis sa pasilyo. Gintawag namon sila kag gin-updan nila kami pagua.

Ining makakulugmat nga hitabo nagtudlo sa akon kon daw ano ka lip-ot kag walay kapat-uran ang kabuhi. (Santiago 4:14) Gani, importante gid nga magsalig kita sa Manughatag sing kabuhi, si Jehova nga Dios, kag tamdon ang tagsa ka adlaw subong bilidhon nga regalo gikan sa iya!​—Salmo 23:4; 91:2.

[Credit Line sang piktyur sa pahina 30]

AP Photo/​The Roanoke Times, Alan Kim