Mangin Suod sa Dios

“Ang Dios nga May Bug-os nga Paglugpay”

2 Corinto 1:3, 4

ANG mga hitabo sa aton kabuhi subong sang pag-antos, kapaslawan, kag pag-isahanon nagaresulta sing kasubo kag pagkadula sing paglaum. Sa sini nga mga kahimtangan, ayhan makapamangkot ka, ‘Sin-o ang makabulig sa akon?’ Ang ginsiling ni apostol Pablo sa 2 Corinto 1:3, 4 nagapakita nga may isa ka masaligan nga ginahalinan sang lugpay. Sia amo si Jehova nga Dios.

Sa bersikulo 3, ang Dios gintawag nga “Amay nga may mapinalanggaon nga kaluoy.” Ano ang buot silingon sini? Ang Griego nga tinaga nga ginbadbad “mapinalanggaon nga kaluoy” may kahulugan nga pagbatyag sing kaluoy sa pag-antos sang iban nga tawo. * Ang isa ka reperensia sa Biblia nagsiling nga ini nga termino mahimo badbaron nga “naluoy” ukon “nagaulikid gid.” Ang “mapinalanggaon nga kaluoy” sang Dios nagapahulag sa iya nga manghikot. Kon nahibaluan naton ini nga kinaiya sang Dios, indi bala nga malipay gid kita nga makigsuod sa iya?

Ginpatuhuyan man ni apostol Pablo si Jehova subong “Dios nga may bug-os nga paglugpay.” Gingamit diri ni Pablo ang tinaga nga “nagakahulugan sing paglugpay sa ginatublag kag ginasubuan, kag paghatag sing bulig ukon pagpalig-on.” Ang The Interpreter’s Bible nagpaathag: “Malugpayan naton ang isa nga nagaantos kon ginapalig-on naton sia nga mabatas ang iya kasakit.”

Ayhan mamangkot ka, ‘Paano kita ginalugpayan kag ginapalig-on sang Dios agod mabatas naton ang kasakit?’ Ginalugpayan kita sang Dios paagi sa iya Pulong, ang Biblia, kag paagi sa aton pangamuyo. Ginasugiran kita ni Pablo nga ang Dios mahigugmaon nga naghatag sa aton sang Iya Pulong agod nga “paagi sa lugpay gikan sa Kasulatan makatigayon kita sang paglaum.” Subong man, paagi sa tinagipusuon nga pangamuyo, maeksperiensiahan naton “ang paghidait sang Dios nga nagalabaw sa tanan nga panghunahuna.”​—Roma 15:4; Filipos 4:7.

May mga problema bala nga indi makalugpay si Jehova nga Dios? Si Pablo nagsiling nga ang Dios “nagalugpay sa aton sa tanan naton nga kapipit-an.” (2 Corinto 1:4) Bisan ano man nga pag-ipit, kalisdanan, ukon pag-antos nga aton maeksperiensiahan, ang Dios magahatag sa aton sing pagpalig-on kag kusog agod makabatas kita. Masaligan mo gid ini.

Ang lugpay nga ginahatag sang Dios sa aton may epekto man sa iban. Nagsiling si Pablo nga ang Dios nagalugpay sa aton agod nga “malugpayan naton ang yara sa bisan ano nga sahi sang kapipit-an paagi sa lugpay nga ginlugpay man sang Dios sa aton.” Bangod nalugpayan kita gikan sa aton mga kapipit-an, nagabatyag man kita sing kaluoy sa iban. Gani, luyag man naton buligan ang mga nagakinahanglan.

Bilang isa ka “Dios nga may bug-os nga paglugpay,” indi buot silingon nga ginadula ni Jehova sing insigida ang aton mga problema ukon kasakit. Apang, mapat-od naton nga kon magpalapit kita sa iya, pabakuron niya kita agod mabatas naton kag malampuwasan ang bisan ano nga kasubo ukon palaligban sa kabuhi. Ining maluluy-on nga Dios nagakabagay gid simbahon kag dayawon.

[Footnote]