Magdiretso sa kaundan

Magdiretso sa listahan sang kaundan

Silot Bala Halin sa Dios ang Kinaugali nga mga Kalamidad?

Silot Bala Halin sa Dios ang Kinaugali nga mga Kalamidad?

 Pamangkot sang Amon Bumalasa

Silot Bala Halin sa Dios ang Kinaugali nga mga Kalamidad?

Ang Dios wala nagagamit sing kinaugali nga mga kalamidad agod silutan ang inosente nga mga tawo. Wala niya ini ginhimo kag indi gid niya ini paghimuon. Ngaa? Bangod “ang Dios gugma,” siling sang Biblia sa 1 Juan 4:8.

Ang tanan nga ginahimo sang Dios tungod sa gugma. Ang gugma wala nagatuga sing kapahamakan sa mga inosente, kay ang Biblia nagasiling nga “ang gugma wala nagahimo sang malaut sa isigkatawo sang isa.” (Roma 13:10) Sa Job 34:12, ang Biblia nagsiling: “Sa pagkamatuud, ang Dios indi maghimo sing pagkamalaut.”

Matuod, gintagna sang Biblia nga may mga kalamidad nga matabo sa aton panahon, subong sang “mabaskog nga mga linog.” (Lucas 21:11) Apang, indi si Jehova ang balasulon sang halit nga tuga sini. Subong nga indi mabasol ang isa ka reporter sa kahalitan nga tuga sang bagyo nga iya ginbalita. Gani, bangod indi mabasol sa Dios ang pag-antos nga tuga sang mga kalamidad, ano ang kabangdanan sini?

Ginapakita sang Biblia nga “ang bug-os nga kalibutan yara sa gahom sang isa nga malauton,” kag ini amo si Satanas nga Yawa. (1 Juan 5:19) Nangin manugpatay sia sing tawo sugod sang nagrebelde sia sa panahon nanday Adan kag Eva, kag nagpadayon ini tubtob karon. (Juan 8:44) Para kay Satanas, wala pulos kag indi importante ang kabuhi sang tawo. Maiyaiyahon sia, amo nga nangin maiyaiyahon man ang paagi sang pagdumalahan sa bug-os nga kalibutan. Sa karon, bangod sining maiyaiyahon nga pagdumalahan, ang mga inosente napilitan nga magpuyo sa mga lugar diin delikado sila sa kinaugali nga mga kalamidad ukon mga kalamidad nga tuga sang tawo. (Efeso 2:2; 1 Juan 2:16) Gani, ang mga tawo nga sakon amo ang balasulon sang pila ka kalamidad nga naeksperiensiahan sang mga biktima. (Manugwali 8:9) Ngaa masiling naton ini?

Madamo nga trahedya ang mabasol sa mga tawo. Halimbawa, binagbinaga ang kahalitan sa mga pumuluyo sang New Orleans, U.S.A., sang ang bagyo nagbilin sing baha sa sini nga siudad, ukon sang gintiphagan sang duta halin sa kabukiran sa higad sang baybay ang mga balay sa Venezuela. Sa sini kag sa iban pa nga kahimtangan, ang kinaandan nga mga hitabo subong sang paghangin kag pag-ulan nagtuga sing grabe nga kalamidad. Bangod ini sa kakulang sang ihibalo sang mga tawo tuhoy palibot, mapigaw nga pagtukod, indi maayo nga pagplano, indi pagsapak sa mga paandam, kag pagpabaya sang mga yara sa puesto.

Binagbinaga ang isa ka trahedya sang panahon sang Biblia. Sang panahon ni Jesus, ang hinali nga pagkarumpag sang torre nagpatay sang 18 ka tawo. Ini nga trahedya mahimo nga resulta sang sayop sang tawo, ukon sang “tion kag wala ginapaabot nga hitabo,” apang pat-od gid nga indi ini silot sang Dios.​—Manugwali 9:11, NW.

May mga kalamidad man bala nga halin sa Dios? Huo, apang indi kaangay sang kinaugali nga kalamidad ukon kalamidad nga tuga sang tawo, ginapili ni Jehova kon sin-o ang maluwas kag kon sin-o ang mapatay sa mga kalamidad nga halin sa iya. May katuyuan ini kag talagsa lang nagakatabo. Ang duha sini ka halimbawa amo ang bug-os kalibutan nga Anaw sang panahon sang alagad sang Dios nga si Noe, kag ang kalaglagan sang mga siudad nga Sodoma kag Gomorra sang panahon ni Lot. (Genesis 6:7-9, 13; 18:20-32; 19:24) Ini nga mga paghukom nga halin sa Dios nagpapas sa indi mahinulsulon kag malaut nga mga tawo, apang nagluwas sa mga tawo nga matarong sa pagtamod sang Dios.

Sa pagkamatuod, si Jehova nga Dios may ikasarang kag gahom nga dulaon ang tanan nga pag-antos kag remedyuhan ang mga epekto sang kinaugali nga mga kalamidad, kag luyag gid niya ini himuon. Ang Salmo 72:12 nagtagna tuhoy sa ginpapungko sang Dios nga Hari, si Jesucristo: “Magaluwas sia sang nawad-an kon magtuaw sia, sang imol nga wala sing manugtabang.”