Magdiretso sa kaundan

Magdiretso sa listahan sang kaundan

Mahimo Ka Mangin Malipayon Bisan May Kapaslawan

Mahimo Ka Mangin Malipayon Bisan May Kapaslawan

 Mahimo Ka Mangin Malipayon Bisan May Kapaslawan

SIN-O bala sa aton ang wala nagakapaslawan? Bisan ang aton Amay sa langit nga si Jehova nga Dios, nakabatyag man kon daw ano kasakit ang mapaslawan. Halimbawa, ginluwas niya gikan sa Egipto ang mga Israelinhon kag bugana sila nga ginpakamaayo. Apang ang Biblia nagasiling: “Sa liwat kag liwat gintilawan nila ang Dios, kag ginpaakig ang Balaan sang Israel.” (Salmo 78:41, Maayong Balita) Walay sapayan sina, si Jehova isa gihapon ka “malipayon nga Dios.”—1 Timoteo 1:11.

Matuod, madamo ang kabangdanan kon ngaa nagakapaslawan kita. Apang paano kita mangin malipayon walay sapayan sang kapaslawan? Kag ano ang matun-an naton kay Jehova tuhoy sini?

Mga Kabangdanan sang Kapaslawan

Ang “tion kag wala ginapaabot nga mga hitabo” nagakahanabo sa aton tanan, siling sang Biblia. (Manugwali 9:11, NW) Sa hinali, isa ka krimen, aksidente, ukon balatian ang bangdan sang daku nga kalisdanan kag kapaslawan. Ang Biblia nagsiling man: “Ang paglaum nga napalantang nagapasakit sang tagiposoon.” (Hulubaton 13:12) Nalipay kita sa pagpaabot sang mga butang nga naluyagan gid naton, apang kon indi gani ini madayon, masubuan gid kita. Halimbawa, si Duncan * kag ang iya asawa madugay na nga misyonero, kag naluyagan gid nila ini nga pribilehiyo. Apang, nag-abot ang tion nga kinahanglan sila nga mag-untat. Sa tuman nga kasubo sia nagsiling: “Karon ko pa lang nabatyagan nga daw wala sing paglaum ang akon kabuhi. Wala na ako sing tulumuron. Daw wala na sing pulos ang tanan nga butang para sa akon.” Mahimo nga madugay madula ang kasubo bangod sang kapaslawan, kaangay sa kahimtangan ni Claire. Sia nagsiling: “Pito ka bulan ang akon ginabusong sang mahulugan ako. Tinuig na ang nagligad, apang tubtob karon, kon makakita gani ako sing bata nga lalaki nga nagahatag sing bahin sa entablado, sa pensar ko, ‘Amo na tani sina kadaku ang akon bata.’”

Bangod nagakabuhi kita karon sa mabudlay nga tion kag ang mga tawo di-himpit, natural lang nga nagakapaslawan kita. Halimbawa, kon ginbayaan ka sang imo kahagugma ukon tiayon, kon  ang imo anak nagrebelde, kag kon ang imo abyan nagluib kag nangin di-mainapresyahon sa imo. Masakit ini batyagon, indi bala?

Mahimo man kita mapaslawan kon wala kita makapasar sa eksam, wala kita mabaton sa obra, ukon wala ginbaton ang aton paghigugma, kag bangod sini, mahimo nagbatyag kita nga daw wala na kita sing pulos. Nagakapaslawan man kita kon ang aton hinigugma wala na nagauswag sa pag-alagad kay Jehova. Si Mary nagsiling: “Daw mapisan man sa pag-alagad ang akon bata nga babayi kag daw wala man ako nagkulang sa iya. Apang, sang gintalikdan niya si Jehova nga Dios kag ang mga pagsulundan sang amon pamilya, pamatyag ko daw wala na ako sing pulos. Indi matumbasan sang bisan ano nga kadalag-an sa paghimud-os ko sa iban nga butang ang akon kapaslawan. Daw malupok ang akon dughan.”

Paano naton malandas ang kasubo bangod sa mga kapaslawan? Agod mahibaluan mo ang sabat, binagbinaga kon ano ang ginhimo ni Jehova.

Magkonsentrar sa Solusyon

Gin-aman ni Jehova nga Dios ang tanan nga kinahanglanon sang una nga mag-asawa, apang wala gid nila ini gin-apresyar kag nagrebelde pa gani sila. (Genesis, kapitulo 2 kag 3) Ang ila anak nga si Cain nangin malaut man. Wala sia namati sa paandam ni Jehova, kag ginpatay gid niya ang iya utod. (Genesis 4:1-8) Mahanduraw mo bala kon daw ano nga kasubo ang ginbatyag ni Jehova?

Apang walay sapayan sang natabo, ngaa malipayon gihapon ang Dios? Bangod padayon sia nga nagapanghikot agod matuman ang iya katuyuan nga pun-on kag pagapuy-an sang himpit nga katawhan ang duta. (Juan 5:17) Agod matuman ang iya katuyuan, ginhatag niya ang iya anak bilang gawad sa aton mga sala kag naghimo man sia sing kahimusan paagi sa iya Ginharian. (Mateo 6:9, 10; Roma 5:18, 19) Nagakonsentrar si Jehova sa kon ano ang solusyon kag indi sa problema.

Ginapalig-on kita sang Biblia nga magkonsentrar sa kon ano ang puede naton mahimo kag indi sa kon ano tani ang aton ginhimo. Nagsiling ini: “Bisan ano nga butang nga matuod, bisan ano nga butang nga serioso, bisan ano nga butang nga matarong, bisan ano nga butang nga putli, bisan ano nga butang nga hiligugmaon, bisan ano nga butang nga dungganon, bisan ano nga labing maayo kag bisan ano nga dalayawon nga butang, padayon nga hunahunaa ini nga mga butang.”—Filipos 4:8.

Ang Husto nga Pagtamod sa Kapaslawan

May mga hitabo nga mahimo makapabag-o gid sa aton kabuhi. Halimbawa, gulpi na lang kita nadulaan sing trabaho, ginbulagan kita sang aton asawa ukon bana, ukon nadula naton ang aton hamili nga pribilehiyo. Mahimo man nga magmasakit kita, madulaan sing puluy-an, ukon mga abyan. Paano naton atubangon ining mga pagbag-o?

Narealisar sang iban nga daku gid nga bulig kon may yara tulumuron ang isa. Si Duncan, nga ginsambit kaina, nagsiling: “Sang narealisar namon sang akon asawa nga indi na kami makaalagad bilang misyonero, nasubuan gid kami. Sang ulihi, naghimo kami sing duha ka tulumuron: ang pag-atipan sa amon Nanay kag kon mahimo magpadayon kami sa paghatag sang amon daku nga tion sa pag-alagad kay Jehova. Kon nagahimo kami sang desisyon, ginatan-aw namon kon ano ang epekto sini sa amon tulumuron. Gani, mahapos para sa amon ang paghimo sing husto nga desisyon.”

Kon mapaslawan kita, masami nga negatibo lamang nga mga butang ang aton ginahunahuna. Halimbawa, mahimo mapaslawan ang aton panikasog sa pagpadaku sang aton anak, pagpangita sing obra, ukon ang aton pagbantala sa mga duog nga nagahambal sing tuhay nga lenguahe. Mahimo masiling kita: ‘Wala gid ako sing pulos.’ Apang subong nga ang natabo anay kay Adan kag Eva wala nagpamatuod nga wala magmadinalag-on  ang Dios, indi man buot silingon nga kon mapaslawan gani kita sa isa ka butang indi na gid kita magmadinalag-on.—Deuteronomio 32:4, 5.

Kon ginapaslaw kita sang iban mahimo nga maglain dayon ang aton buot. Apang indi amo sina si Jehova. Sang nagpanghilahi si Hari David kag ginpapatay pa ang bana ni Bat-seba nasubuan gid sia. Apang, nakita ni Jehova nga sinsero ang paghinulsol ni David, amo nga padayon niya sia nga gingamit subong iya alagad. Sing kaanggid, nakasala man ang matutom nga si Hari Jehosapat sang makig-alyansa sia sa mga kaaway sang Dios. Ang manalagna sang Dios nagsiling sa iya: “Ang kasingkal yara sa imo gikan sa atubangan sang GINOO. Wala sing sapayan may maayo nga mga butang nga nakita sa imo.” (2 Cronica 19:2, 3) Nahibaluan ni Jehova nga ang isa ka sayop nga ginhimo ni Jehosapat, wala nagakahulugan nga gintalikdan na niya si Jehova. Sing kaanggid, agod indi naton madula ang aton mga abyan, indi kita dayon mangakig kon makasayop sila sa aton. Bisan ginpaslaw nila kita, may maayo gihapon sila nga mga kinaiya.—Colosas 3:13.

Natural lang nga antes kita mangin madinalag-on, kon kaisa nagakapaslawan kita. Mahimo masubuan kita kon makahimo kita sing sala. Apang malandas naton ini kon determinado kita nga maghimo sing nagakaigo nga tikang kag  magpadayon. Sang nalugaw-an gid si Hari David bangod sang iya ginhimo, sia nagsulat: “Nahagas ang akon mga tul-an tungud sang akon mga pag-ugayong sa bilog nga adlaw. . . . Ginkilala ko ang akon sala sa imo [Jehova] . . . , niyan ikaw nagpatawad sang kalautan sang akon sala.” (Salmo 32:3-5) Kon marealisar naton nga ginpaslaw naton ang Dios, dapat mangayo kita sing patawad sa iya, bag-uhon naton ang aton batasan, kag mangin determinado nga tumanon ang iya mga laygay.—1 Juan 2:1, 2.

Mangin Handa sa Pag-atubang sing Kapaslawan

Pat-od gid nga tanan kita makaeksperiensia sing pila ka sahi sang mga kapaslawan. Paano kita mangin handa sa pag-atubang sini? Talalupangdon gid ang ginsiling sang isa ka tigulang nga Cristiano nga lalaki nga si Bruno, nga nakaeksperiensia sing kapaslawan nga nagpabag-o gid sa iya kabuhi. Sia nagsiling: “Suod na ako nga daan kay Jehova. Ang pagpakigsuod pa gid sa iya amo ang nakabulig sa akon nga maatubang ang kapaslawan. Nahibaluan ko kon ngaa gintugutan sang Dios nga magpadayon ining malaut nga mga butang. Sa sulod sang mga tinuig nanikasog ako nga mangin suod kay Jehova. Maayo lang kay ginhimo ko yadto. Bangod nahibaluan ko nga ginabuligan ako sang Dios kag yara lang sia sa akon tupad, nalandas ko ang kasubo.”

Samtang ginahunahuna naton ang palaabuton, isa lang ka butang ang pat-od: Bisan nagakapaslawan kita bangod sa aton ginahimo ukon sa ginahimo sang iban sa aton, ang Dios indi gid magapaslaw sa aton. Sa pagkamatuod ang Dios nagsiling nga ang iya ngalan nga Jehova nagakahulugan sing: “Ako mangin amo kon ano ako mangin amo.” (Exodo 3:14, NW) Makasalig gid kita nga sarang niya mahimo ang tanan agod matuman ang iya mga saad. Paagi sa iya Ginharian, tumanon niya ang iya kabubut-on “sa duta, subong sang sa langit.” Amo kon ngaa si apostol Pablo nagsulat: “Kumbinsido ako nga bisan ang kamatayon ukon ang kabuhi ukon ang mga anghel ukon ang mga panguluhan . .  ukon ang iban pa nga tinuga indi makapahamulag sa aton sa gugma sang Dios nga yara kay Cristo Jesus.”—Mateo 6:10; Roma 8:38, 39.

Makasalig gid kita sa saad sang Dios nga ginpahayag niya paagi kay manalagna Isaias: “Yari karon, ako nagatuga sing bag-ong mga langit kag bag-ong duta; kag ang una nga mga butang indi na pagdumdumon ukon mag-abut sa painoino.” (Isaias 65:17) Makalilipay gid nga sa palaabuton ang tanan nga kapaslawan nga aton naeksperiensiahan indi na naton pagdumdumon pa!

[Footnote]

^ par. 5 Ang iban nga mga ngalan gin-islan.

[Blurb sa pahina 13]

Bisan pa nagakapaslawan kita, indi buot silingon nga wala na kita sing pulos

[Blurb sa pahina 14]

Ginapalig-on kita sang Biblia nga magkonsentrar sa kon ano ang puede naton mahimo kag indi sa kon ano tani ang ginhimo naton

[Piktyur sa pahina 15]

Malipayon gihapon ang Dios, bisan ginpaslaw sia sang katawhan, kay napat-od gid niya nga ang iya katuyuan matuman

[Piktyur sa pahina 16]

Ang pag-una sa mga butang nga nagapasuod sa Dios makabulig sa aton agod malandas ang kapaslawan