Magdiretso sa kaundan

Magdiretso sa listahan sang kaundan

Pagpatindog sa Kadayawan ni Jehova

Pagpatindog sa Kadayawan ni Jehova

 Pagpatindog sa Kadayawan ni Jehova

“Daw indi ako makapati sa akon nakita. Wala gid ako maghunahuna nga magatipon kami sa subong sini katahom nga duog agod dayawon si Jehova. Indi gid mabayaran ang kalipay nga akon nabatyagan!”​​—⁠MARIA, MEXICO.

ANG MGA SAKSI NI JEHOVA mahuyugon sa pagtipon agod magtuon sa Pulong sang Dios, ang Biblia. (Salmo 27:⁠4; Hebreo 10:23-25) Kag malipayon gid sila kon makatipon sila sa nagakaigo nga mga duog sang pagsimba. Sining ulihi nga mga tuig, nakapatindog sila sing linibo ka bag-o nga mga duog sang pagsimba, nga kilala subong mga Kingdom Hall, sa madamo nga pungsod sa bug-os nga kalibutan.

Ngaa kinahanglan nila nga magpatindog? Sin-o ang mga nagapangabudlay sa pagpatindog? Kag ano ang epekto sini nga pagpatindog sa ila? Agod masabat ini nga mga pamangkot, binagbinagon naton ang nagakatabo sa Mexico kag Belize.

Linibo ka Kingdom Hall ang Kinahanglan!

Sang una, ang mga Saksi ni Jehova sa Mexico nagatipon para sa pagsimba sa bisan diin nga bakante nga lugar, ayhan sa likod sang isa ka balay, sa puluy-an sang mga Saksi, sa bodega, sa garahe, ukon sa gin-arkilahan nga mga tilipunan. Sadto nga tion, pirme nagapamensar ining matutom nga mga Saksi nga maayo gid kuntani kon makapatindog sila sang ila kaugalingon nga mga Kingdom Hall.

Sang 1994, may yara 388,000 ka Saksi sa Mexico. Ginpakita sang surbe sadto nga tuig nga kon tanan sila may kaugalingon nga duog sang pagsimba, 3,300 ka bag-ong mga Kingdom Hall ang kinahanglan nga ipatindog. Daku gid ini nga trabaho!

Ang mga kongregasyon sa sini nga pungsod nakapatindog na sang ila kaugalingon nga mga Kingdom Hall sa masarangan nila. Apang pagligad lamang sang lima ka tuig, indi mapanghiwala nga kinahanglan gid nila ang madamo pa nga Kingdom Hall kag dapat ini himuon sing madasig. Paano ini ginhimo?

Lantip nga mga Boluntaryo Gikan sa Iban nga mga Lugar

Sang 1999, ginsugdan ang bag-o nga programa sa pagpatindog. Ang Kingdom Hall Construction Groups gintukod sa bug-os nga Mexico. Ang mga Saksi ni Jehova sa bug-os nga pungsod, madamo sa ila lantip sa pagpatindog, nagboluntaryo agod makigbahin sa sining makalilipay nga programa. Sa karon, ang Mexico may yara 35 ka grupo, kag isa ka grupo ang gintukod sa Belize.

Ining Kingdom Hall Construction Groups, sa masami may yara walo ka boluntaryo nga lalaki kag mga babayi kada grupo, nga nagatrabaho sing bug-os tion kag wala sing sueldo. Ining malipayon nga mga boluntaryo nagasaylosaylo sa nagkalainlain nga mga lugar sang pungsod kag nagapanguna sa mga proyekto sa pagpatindog. Ang tagsa ka  boluntaryo nagatrabaho sing walo ka oras kada adlaw halin Lunes tubtob Biernes kag subong man kada ikaduha nga Sabado. Ginasugdan nila ang adlaw paagi sa pagbinagbinag sing isa ka teksto sa Biblia sa alas 7:00 sa aga kag ginasundan ini sang pamahaw. Nalangkag ang tanan sa paghimo sang ginapahimo sa ila. Ang mga babayi, halimbawa, nagatrabaho kaupod sang mga lalaki sa pagpalitada, pagtakod sing mga tayl, kag pagpintura.

Ang kongregasyon nga ginapatindugan sing tilipunan nagabulig paagi sa pag-aman sing mga dalayunan, pagpanglaba, kag pagdigamo para sa mga boluntaryo. Magluwas nga nagabinuligay sa pagpatindog, ang mga boluntaryo kag mga Saksi sa sini nga lugar malipayon nga nagaupdanay sa pagtambong sa Cristianong mga miting kag sa pagbantala sa mga pamalay.

Ang mga Pagkamaayo sang Isa ka Boluntaryo

Ano ang masiling sini nga mga boluntaryo sa ila trabaho? “Matuod nga nagatrabaho kami sa mainit kag matugnaw nga paniempo, nagakaon kami sing pagkaon nga wala namon maanari, pirme kami nagasaylosaylo, malayo kami sa amon pamilya, kag masami nga indi masulhay ang amon kahimtangan,” siling ni Daniel, isa ka boluntaryo sa sulod sang kapin sa tatlo ka tuig. “Apang balewala ang mga kabudlayan kon ikomparar sa mga pagpakamaayo nga nabaton namon,” padayon niya.

Ano ang pila sini nga mga pagpakamaayo? Madamo nga boluntaryo ang nakatuon sing dugang pa nga kalantip sa pagpatindog. Apang, ginsambit ni Carlos, nga nagadumala sa isa sa dalagku nga mga grupo, ang ginakabig niya nga isa ka mas importante nga pagpakamaayo. “Daw subong kami sa isa ka pamilya nga may 20 ka katapo,” siling niya. “Dungan kami nga nagakaon, nagatrabaho, nagatuon, kag nagapangamuyo. Nangin suod ang amon pag-abyanay.”

Nangin suod man sila sa mga kongregasyon nga ginabuligan nila sa pagpatindog sing Kingdom Hall. Si José, nga nakigbahin sa kapin sa 100 ka proyekto, nagsiling: “Ang mga luha sang kalipay kag mga yuhum sang pagpasalamat sang lokal nga mga Saksi sang makita nila ang katumanan sang ila handum nga makatigayon sing bag-o nga Kingdom Hall makalilipay gid.” Nagsiling pa sia: “Nalipay kami nga napalig-on namon ang pagtuo sang iban paagi sa amon diutay nga bahin sa madinalag-on nga pagpatindog sing isa pa ka balay para sa putli nga pagsimba.”

Isa ka Dalayawon nga Hinimuan!

Ini nga mga duog sang pagsimba wala sing madamo nga puni kag indi mahal. Sa baylo, ang desinyo sang mga Kingdom Hall simple lamang, amo nga madasig kag barato ini ipatindog. Kon mahimo, lokal lamang nga mga materyales kag mga pamaagi ang ginagamit. Amo kon ngaa ang isa ka bag-o nga tilipunan mapatindog sa sulod lamang sang anom ka semana!

Sang 2007, ang tanan nga 17 ka kongregasyon sa Belize napatindugan sing bag-o nga mga Kingdom Hall. Sa Mexico, kapin sa 1,400 ka tilipunan ang ginpatindog sugod lamang sang 1999!

 Walay sapayan sang madamo na nga ginhimo, madamo pa sing dapat nga himuon. (Mateo 9:37) Ang kadamuon sang mga Saksi ni Jehova sa Mexico kapin sa 600,000 na karon kag tanan sila nagatipon sing tatlo ka beses sa isa ka semana agod magtuon sa Pulong sang Dios. Gani, halos 2,000 ka bag-o nga mga Kingdom Hall pa ang kinahanglan. Imposible ini matigayon kon ining boluntaryo nga pagpatindog nagasandig lamang sa panikasog sang mga tawo. Apang “ang tanan nga butang posible” bangod ginasakdag ini ni Jehova nga Dios, amo nga madamo na nga tilipunan ang napatindog.​​—⁠Mateo 19:26.

[Kahon/Piktyur sa pahina 22]

“Ginahimo Nila ang Ginasiling Nila”

Indi lamang lokal nga kongregasyon sang mga Saksi ni Jehova ang nalipay sa ginapatindog nga mga Kingdom Hall. Halimbawa, sang ginapatindog ang isa ka Kingdom Hall sa Belize, ginsilingan sang isa ka lalaki ang iya Pentecostal nga asawa nga kon mahuman na ang “simbahan” sang mga Saksi ni Jehova, matambong man sia upod sa ila. Ngaa? “Nakita ko nga ang Dios kaupod nila,” siling niya. “Wala sila nagaaway samtang nagatrabaho. Ginahimo nila ang ginasiling nila.”

[Piktyur]

Kingdom Hall sa Orange Walk, Belize

[Kahon/Mga piktyur sa pahina 23]

Isa ka Bug-os Kalibutan nga Panikasog

Ang Kingdom Hall Construction Groups gintukod sa 120 ka pungsod. Ginalista sa ubos ang pila lamang sa mga pungsod nga may malipayon nga mga boluntaryo nga nagapakigbahin sa sini nga hilikuton:

Angola, Bolivia, Croatia, Dominican Republic, Ethiopia, Fiji, Ghana, Hong Kong, India, Jamaica, Kazakhstan, Liberia, Moldova, Nigeria, Papua New Guinea, Rwanda, Tuvalu, Ukraine, Venezuela, Zambia.

[Mga piktyur]

Kingdom Hall sa Acapulco, Mexico

Mga katapo sang isa ka Kingdom Hall Construction Group sa Mexico

[Piktyur sa pahina 23]

Kingdom Hall sa Tlaxcala, Mexico