Magdiretso sa kaundan

Magdiretso sa listahan sang kaundan

Ngaa Ginatugutan sang Dios ang Pag-antos?

Ngaa Ginatugutan sang Dios ang Pag-antos?

 Pamangkot sang Amon Bumalasa

Ngaa Ginatugutan sang Dios ang Pag-antos?

Ang Dios indi ang kabangdanan sang pag-antos sang tawo. “Malayo sa Dios nga maghimo sia sing pagkamalaut,” siling sang Biblia. (Job 34:10) Kon amo, ­sin-o ang panguna nga kabangdanan sang pag-antos?

Gintawag ni Jesus si Satanas subong “ang manuggahom sang kalibutan.” (Juan 14:30) Matuod, si Jehova amo ang Soberano sang Bug-os nga Uniberso kag indi gid niya pag-ihatag ini nga posisyon kay bisan ­sin-o. Apang, sa pila ka tion, gintugutan sang Dios nga gamhan ni Satanas ang kalabanan nga tawo.​—⁠1 Juan 5:19.

Ano nga sahi sang manuggahom si Satanas? Sa una pa lang nga tion nga nakighambal sia sa mga tawo, nagbinutig na sia kag nagresulta ini sa kamatayon. Daku nga halit ang nahimo ni Satanas sa mga tawo. Si Jesus nagsiling: “Manugpatay sia sing tawo sang nagsugod sia sa iya kalautan, kag wala sia magpabilin nga malig-on sa kamatuoran, bangod ang kamatuoran wala sa iya. Kon maghambal sia sang kabutigan, nagahambal sia suno sa iya kinaugali, bangod butigon sia kag amay sang kabutigan.” (Juan 8:44) Si Jesus nagsiling man nga ang mga tawo nga luyag magpatay sa iya, mga anak ni Satanas, ang una nga manugpatay sing tawo. Nangin mga anak sila ni Satanas bangod gin-ilog nila sia. Suno pa sa isa ka hulubaton, “kon ano ang puno amo man ang bunga.”

Padayon nga ginaimpluwensiahan ni Satanas ang panimuot sang mga tawo sa pagpatay. Halimbawa, si R. J. Rummel, nga propesor anay sa Unibersidad sang Hawaii, E.⁠U.⁠A., nagbulubanta nga halin sang 1900 tubtob 1987, ang nagkalainlain nga mga gobierno nagpatay sing 169,198,000 ka tawo sa tion sang mga panikasog nga pukanon ang wala mauyunan nga panguluhan, papason ang isa ka rasa, kag pagpamatay nga wala sing kabangdanan. Wala pa diri malakip ang minilyon nga nagkalamatay sa mga patag-awayan sa amo man nga tion.

Kon indi ang Dios ang nagapaantos sa mga tawo, ngaa ginatugutan niya ini? Bangod may mga hulusayon nga halin pa sang una nga nagadalahig sa tanan nga tawo, mga hulusayon tuhoy sa kon ano ang maayo kag malain nga kinahanglan pa husayon. Usisaon naton ang isa sa sini.

Sa panugod sang maragtas sang mga tawo, nagdampig sanday Adan kag Eva kay Satanas. Ginsikway nila ang paggahom sang Dios kag ginpili nga gamhan ang ila kaugalingon, bisan pa nagakahulugan gid ini nga mapaidalom sila sa paggahom sang Yawa.​—⁠Genesis 3:1-6; Bugna 12:9.

Para kay Jehova, indi matarong nga husayon ini sa gilayon. Gani naghatag sia sing tion agod matipon ang tanan nga pamatuod. Ano ang di-mapanghiwala nga resulta sini? Ang paggahom sang tawo sa idalom sang impluwensia ni Satanas nagadul-ong lamang sa pag-antos. Ang pagtugot sang Dios sing tion para gid sa kaayuhan sang tawo sa ulihi. Ngaa? Ang mga nagausisa sa pamatuod kag nagapati sa sini may kahigayunan nga mapakita nga handa sila nga magpasakop sa paggahom sang Dios. Kag ang mga nagatuon sa mga talaksan sang Dios kag nagakabuhi nahisuno sa sini may paglaum nga mabuhi sing walay katapusan.​—⁠Juan 17:⁠3; 1 Juan 2:17.

Matuod, kontrolado pa karon ni Satanas ang kalibutan. Apang indi na ini magdugay. Malapit na gamiton ni Jehova ang iya Anak sa “paglaglag sa mga binuhatan sang Yawa.” (1 Juan 3:8) Paagi sa panuytoy sang Dios, bag-uhon ni Jesus ang kahimtangan sang mga tawo kag paumpawan ang kasakit nga ila ginaantos. Banhawon man niya ang binilyon ka tawo sa duta nga nag-antos kag napatay sang nagliligad nga siniglo.​—⁠Juan 11:25.

Ang pagbanhaw kay Jesus isa ka halimbawa sang kadalag-an sang Dios sa mga binuhatan sang Yawa, kag ginapakita sini kon ano ang mangin palaabuton sang mga tawo nga nagpili sang paggahom sang Dios. (Binuhatan 17:31) Ginabuligan kita sang Biblia nga mahangpan kon ano ang mahanabo sa palaabuton paagi sa sining makalulugpay nga pinamulong: “Ang Dios mismo mangin kaupod nila. Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”​—⁠Bugna 21:​3, 4.