Magdiretso sa kaundan

Magdiretso sa listahan sang kaundan

Madumduman Mo Bala?

Madumduman Mo Bala?

 Madumduman Mo Bala?

Nabasa mo bala sing maayo ang ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

Ang buhok bala ni Samson ang ginahalinan sang iya kusog?

Ang kusog ni Samson wala naghalin sa iya buhok. Ang iya buhok nagasimbulo sa iya pinasahi nga kaangtanan sa Dios subong isa ka Nazareo. Ina nga kaangtanan naapektuhan sang ginpautdan ni Delila ang buhok ni Samson.—4/15, pahina 9.

Sa pagpaanggid sa aton literal nga tagipusuon, anong tatlo ka butang ang dapat himuon agod mangin mapagros ang aton malaragwayon nga tagipusuon?

(1) Pagkaon. Subong nga kinahanglan sang aton literal nga tagipusuon ang masustansia nga pagkaon, kinahanglan man naton ang bastante nga espirituwal nga pagkaon. (2) Ehersisyo. Ang makugi nga pagpakigbahin sa ministeryo makabulig para mangin mapagros ang aton malaragwayon nga tagipusuon. (3) Palibot. Mabuhinan ang stress kon makig-upod kita sa mga kauturan nga nagaulikid sa aton.—4/15, pahina 16.

Pagkatapos sang pagluib sang isa ka tiayon, paano mapasag-uli sang mag-asawa ang pagsalig?

Dapat sila (1) mangin tampad sa isa kag isa; (2) magbuligay; (3) magbag-o; kag (4) magtinguha nga dulaon ang kaugot para mabalik ang ila relasyon.—5/1, pahina 12-15.

Ngaa indi nagakaigo nga iaplikar sang nagapamulongpulong ang Salmo 116:15 sa napatay?

Ang teksto nagsiling: “Bilidhon sa itololok sang GINOO ang kamatayon sang iya mga balaan.” Nagakahulugan ini nga bilidhon para kay Jehova ang kabuhi sang tanan nga matutom sa iya. Indi niya pagtugutan nga mapapas sa duta ang iya mga alagad subong isa ka grupo.5/15, pahina 22.

Sin-o ang mga colporteur?

Antes sang 1931, “colporteur” ang tawag sa mga payunir.—5/15, pahina 31.

Ano ang pila ka ebidensia nga ang Biblia indi lamang isa ka libro nga ginsulat sang mga tawo?

Ang Biblia nagaunod sang mga tagna nga nagakatuman. Ang mga rekord sini sibu sa kasaysayan, indi uluistorya lamang. Sibu ini sa siensia, kag ang mga libro ukon mga tulun-an sini nagahisanto. Praktikal man ini subong.—6/1, pahina 4-8.

Sin-o ang ginapatuhuyan sang “tanan nga ginharian” sa Daniel 2:44?

Ginapatuhuyan sang tagna ang mga ginharian, ukon mga gobierno, nga ginarepresentar sang lainlain nga bahin sang larawan nga ginpaathag ni Daniel.—6/15, pahina 17.

San-o nangin ikapito nga kagamhanan sa kalibutan ang Anglo-Amerikano nga kagamhanan nga gintagna sa Biblia?

Ining kagamhanan sa kalibutan nagluntad sang ang Britanya kag Estados Unidos nag-updanay sa pagpanghikot sang Bug-os Kalibutan nga Inaway I.—6/15, pahina 19.

Sa ano nga paagi ginapatawad kag ginakalimtan sang Dios ang sala sang mga mahinulsulon?

Ginsilingan ni Jehova ang iya mga nahamut-an: “Indi na pagdumdumon ang ila sala.” (Jer. 31:34) Mapatawad niya ang mga sala paagi sa gawad. Kon magpatawad ang Dios, ginakalimtan niya ang aton mga sala sa kahulugan nga indi na niya ini pag-ungkaton para silutan kita.—7/1, pahina 18.

Ngaa mapatihan naton ang mga milagro sa Biblia?

Masami ini nga ginhimo sa publiko, indi sa tago. Simple lamang ang paagi sa paghimo sini kag wala sing pinasahi nga props. Ginhimo ini para himayaon ang Dios, indi ang tawo. Sarisari nga milagro ang ginhimo, kag bisan ang mga manugpamatok wala magpanghiwala sini. Amo ini ang mga rason kon ngaa makasalig kita sa mga milagro sa Biblia.—8/1, pahina 7-8.