Magdiretso sa kaundan

Magdiretso sa listahan sang kaundan

“Sin-o Bala ang Kakugmatan Ko?”

“Sin-o Bala ang Kakugmatan Ko?”

 “Sin-o Bala ang Kakugmatan Ko?”

“Bisan ang inaway mag-abut batok sa akon, walay sapayan magasalig ako.” —SAL. 27:3.

SUNO SA MASUNOD NGA MGA TEKSTO, ANO ANG MAKABULIG SA IMO NGA MAPALAMBO ANG KAISOG?

Salmo 27:1

Salmo 27:4

Salmo 27:11

1. Ano ang mabulig sa aton sang ika-27 sang Salmo?

NGAA ang aton pagbantala nagauswag bisan nagalala ang mga kahimtangan sa kalibutan? Ngaa nalipay kita nga gamiton ang aton tion kag kusog sa pagbantala samtang madamo ang naapektuhan sa pag-usmod sang ekonomiya? Paano kita makapabilin nga maisugon bisan madamo ang nagakahadlok sa palaabuton? Ang gingiyahan sang Dios nga ambahanon ni Hari David, nga mabasa sa Salmo 27, magasabat sa sini.

2. Ano ang epekto sang kakugmat sa tawo, pero ano ang aton masaligan?

2 Sa panugod sini nga salmo, si David nagsiling: “Si Jehova amo ang akon kapawa kag ang akon kaluwasan. Sin-o bala ang kahadlukan ko? Si Jehova amo ang kuta sang akon kabuhi. Sin-o bala ang kakugmatan ko?” (Sal. 27:1, NW) Kon ang kahadlok makapaluya, ang kakugmat may mas grabe nga epekto. Pero wala sing kakugmat nga makatublag sa mga nagakahadlok kay Jehova. (1 Ped. 3:14) Kon si Jehova ang aton pamakod, “magapuyo [kita] sing malig-on kag magamalinong, sa wala sing kahadluk sa malaut.” (Hulu. 1:33; 3:25) Ngaa?

SI JEHOVA ANG “AKON KAPAWA KAG AKON KALUWASAN”

3. Sa ano nga kahulugan si Jehova ang aton kapawa, pero ano ang dapat naton himuon?

3 Ang pinamulong nga si Jehova ang “akon kapawa,” nagapakita nga ginahilway niya kita gikan sa pagkawalay hinalung-ong kag espirituwal nga kadulom. (Sal. 27:1) Bangod sa kapawa, makita naton ang katalagman ukon balagbag sa dalan, pero ini nga butang indi madula sang kapawa. Dapat kita maghulag sing maalamon sa aton makita. Sing kaanggid, ginapahayag ni Jehova sa aton ang panguna nga kahulugan sang mga hitabo sa kalibutan. Ginapaandaman niya kita sang mga katalagman  sining sistema sang mga butang. Ginahatagan niya kita sang mga prinsipio sa Biblia nga makabulig sa aton, apang dapat naton iaplikar ang aton matun-an. Kon himuon naton ini, makapanghikot kita sing mas maalamon sangsa aton mga kaaway ukon mga manunudlo.—Sal. 119:98, 99, 130.

4. (a) Ngaa nakasiling si David nga si Jehova amo ang “akon kaluwasan”? (b) Sa ano nga kahimtangan ilabi na nga mangin kaluwasan naton si Jehova?

4 Ang pinamulong ni David sa Salmo 27:1 nagapakita nga nadumduman niya ang mga pagluwas ni Jehova sa iya. Halimbawa, ginluwas sia ni Jehova “sa kamomoo sang leon kag sa kamomoo sang oso.” Ginbuligan man sia ni Jehova nga malutos ang higante nga si Goliat. Sang ginbangkaw sia ni Hari Saul, ginluwas sia pirme ni Jehova. (1 Sam. 17:37, 49, 50; 18:11, 12; 19:10) Amo nga nakasiling si David nga si Jehova ang “akon kaluwasan”! Pareho kay David, luwason man ni Jehova ang iya mga alagad. Paano? Paagi sa pagluwas sa ila sa nagahilapit nga “dakung kapipit-an.”—Bug. 7:14; 2 Ped. 2:9.

DUMDUMA ANG TAGSA KA KADALAG-AN

5, 6. (a) Paano ang paghinumdom sa mga hitabo sang una makapalambo sang aton kaisog? (b) Paano ang rekord sang mga pagpakig-angot ni Jehova sa iya mga alagad makapabakod sang imo kaisog?

5 Ang importante nga bahin sa pagpalambo sang kaisog ginapatalupangod sa aton sang Salmo 27:2, 3. (Basaha.) Ginhinumdom ni David ang mga hitabo nga naluwas sia sa bulig ni Jehova. (1 Sam. 17:34-37) Ini nga mga eksperiensia nakahatag sa iya sing kompiansa bisan pa sa pinakagrabe nga mga kabudlayan. Amo man bala sini ang epekto sa imo sang imo mga eksperiensia? Halimbawa, naagyan mo na bala nga nangamuyo ka parte sa isa ka mabudlay nga problema kag nakita kon paano ka ginhatagan ni Jehova sing kaalam ukon kusog para malandas ini? Ukon nadumduman mo bala kon paano nadula ang mga balagbag sa imo malipayon nga pag-alagad, ukon kon paano nabuksan para sa imo ang isa ka daku nga ganhaan sa hilikuton? (1 Cor. 16:9) Ano ang epekto sa imo sa paghinumdom sini? Indi bala nga napalig-on ka sini nga si Jehova magabulig sa imo para malandas ukon mabatas bisan ang grabe nga mga kabudlayan?—Roma 5:3-5.

6 Ano abi kon magplano ang gamhanan nga gobierno nga dulaon ang organisasyon sang mga Saksi ni Jehova? Madamo ang nagtinguha sina sa moderno nga tion, pero  napaslawan sila. Ang paghinumdom kon paano ginbuligan ni Jehova ang iya katawhan sang una makahatag sa aton sing kompiansa nga atubangon ang matabo sa palaabuton.—Dan. 3:28.

APRESYAHA ANG PUTLI NGA PAGSIMBA

7, 8. (a) Suno sa Salmo 27:4, ano ang ginpangabay ni David kay Jehova? (b) Ano ang dakung espirituwal nga templo, kag paano kita nagasimba didto?

7 Ang isa pa ka bahin kon ngaa maisugon kita amo ang aton kalipay sa putli nga pagsimba. (Basaha ang Salmo 27:4.) Sang adlaw ni David, ang “balay sang GINOO” amo ang tabernakulo. Si David mismo ang naghimo sing kahimusan para sa matahom nga templo nga pagatukuron sang iya anak nga si Solomon. Pagligad sang mga siglo, ginpakita ni Jesus nga ang kalahamut-an nga pagsimba kay Jehova wala nagadepende sa isa ka daku nga tinukod nga ginpakamaayo sang Dios. (Juan 4:21-23) Ginpakita ni apostol Pablo sa Hebreo kapitulo 8 kag 10 nga ang dakung espirituwal nga templo nagluntad sang nabawtismuhan si Jesus sang 29 C.E., sang ginhalad niya ang iya kaugalingon sa paghimo sang kabubut-on ni Jehova. (Heb. 10:10) Ining dakung espirituwal nga templo amo ang kahimusan ni Jehova para makapalapit kita sa iya paagi sa aton pagtuo sa halad gawad ni Jesus. Paano kita makasimba diri? Paagi sa pagpangamuyo “nga may maminatud-on nga tagipusuon nga may bug-os nga pasalig sang pagtuo”; paagi sa pagpahayag sang aton paglaum nga wala nagakalingkang; kag paagi sa paghunahuna, pagpahulag, kag pagpalig-on sa mga masigkasumilimba kon nagatipon kita sa aton mga miting sa kongregasyon kag pangpamilya nga pagsimba. (Heb. 10:22-25) Ang pag-apresyar sa kahimusan sang matuod nga pagsimba magapabakod sa aton sa sining katapusan nga mga adlaw.

8 Sa bilog nga duta, ginadugangan sang mga matutom nga alagad ni Jehova ang ila pagpakigbahin sa ministeryo. Nagatuon sila sang iban nga lenguahe kag nagasaylo sa mga lugar nga mas nagakinahanglan sang mga manugbantala sang Ginharian. Ginapakita sini nga pareho sa salmista ang ila ginapangabay kay Jehova. Gusto nila nga maeksperiensiahan ang kaayo ni Jehova kag makigbahin sa sagrado nga pag-alagad ano man ang matabo.—Basaha ang Salmo 27:6.

MAGSALIG SA BULIG SANG DIOS

9, 10. Ano ang buot silingon sang pasalig sa Salmo 27:10?

9 Ginpabutyag ni David ang iya pagsalig sa bulig ni Jehova. Sia nagsiling: “Kon magbiya sa akon ang akon amay kag akon iloy, niyan ang GINOO magasapopo sa akon.” (Sal. 27:10) Sa mga hitabo nga ginsambit sa 1 Samuel kapitulo 22, makasiling kita nga si David wala ginbiyaan sang iya mga ginikanan. Pero sa karon, madamo ang ginsikway sang ila pamilya. Apang ginbuligan sila kag ginproteksionan sang Cristianong kongregasyon.

10 Bangod si Jehova handa magbulig sa iya mga alagad kon sikwayon sila sang iban, indi bala nga buligan man niya sila sa iban nila nga kabudlayan? Halimbawa, kon nabalaka kita kon paano amanan sa materyal ang aton pamilya, nagasalig bala kita sa bulig ni Jehova? (Heb. 13:5, 6) Nahibaluan niya ang mga kahimtangan kag mga kinahanglanon sang tanan nga matutom sa iya.

11. Ano ang epekto sa iban sang aton pagsalig kay Jehova? Iilustrar.

11 Binagbinaga ang kahimtangan sang isa ka estudyante sa Biblia sa Liberia nga si Victoria. Sang kalipikado na sia sa pagpabawtismo, ginbiyaan sia kag ang iya tatlo ka bata sang iya ginapuyopuyo. Bisan pa wala sing balay kag obra, nagpadayon sia sa pag-uswag sa espirituwal. Sang nabawtismuhan na si Victoria, nakakita ang iya 13 anyos nga bata nga babayi sing kahita nga puno sang kuarta. Para indi sila masulay, wala na nila  gin-isip ang kuarta. Ginkontak gilayon nila ang soldado nga tag-iya sang kahita. Ginsilingan sila sang soldado nga kon ang tanan nga tawo pareho ka bunayag sa mga Saksi ni Jehova, mangin mas maayo kag malinong ang kalibutan. Ginpakita ni Victoria sa soldado ang saad ni Jehova sa Biblia parte sa bag-o nga duta. Nagdayaw ang soldado sa iya integridad, gani ginhatagan niya si Victoria sing daku nga kantidad gikan sa gin-uli nga kuarta. Ginapakita sini nga nakilal-an ang mga Saksi ni Jehova nga bunayag bangod sang ila bug-os nga pagsalig kay Jehova.

12. Ano ang aton ginapakita kon padayon kita nga mag-alagad kay Jehova bisan pa mamigado kita? Iilustrar.

12 Hunahunaa ang ginbatyag ni Thomas nga isa ka di-bawtismado nga manugbantala sa Sierra Leone. Nagsugod sia sa pagtudlo sa hayskul, apang indi niya makuha ang iya sueldo sa halos isa ka tuig kon indi pa matapos ang iya mga papeles. Ano ang katapusan nga ginapahimo kay Thomas para makuha ang iya sueldo? Dapat sia magpainterbyu sa nagadumala sa eskwelahan, nga isa ka pari. Ginpaathag sang pari nga ang mga pagpati sang mga Saksi ni Jehova indi magsanto sa mga ginapatuman sang eskwelahan. Ginpapili niya si Thomas—ang iya obra ukon ang iya base sa Biblia nga mga pagpati. Naghalin si Thomas sa iya obra nga wala nasuelduhan. Pero nakakita sia sing obra nga pagpangay-o sing radyo kag cell phone. Ginapakita sini kag sang kaanggid pa nga mga halimbawa nga mahimo mahadlok ang iban nga mawad-an sing mga kinahanglanon. Pero indi sini mabungkag ang aton mabakod nga pagsalig sa Manunuga sang tanan nga butang kag Manug-amlig sang iya katawhan.

13. Ngaa nagauswag ang pagbantala sa pigado nga mga pungsod?

13 Sa pila ka pigado nga pungsod, masami nga aktibo ang mga manugbantala. Ngaa? Ang isa ka sanga talatapan nagsulat: “Madamo nga tagbalay nga nagabaton sing pagtuon sa Biblia ang wala sing obra amo nga may tion sila sa pagtuon kon adlaw. May daku man nga tion sa pagbantala ang mga kauturan. Ang mga tawo, ilabi na sa pigado nga mga lugar, indi na kinahanglan hambalan nga ara na kita sa katapusan nga mga adlaw, kay naeksperiensiahan na nila ini nga mga kahimtangan.” Ang isa ka misyonero nga nag-alagad sing sobra 12 ka tuig sa isa ka pungsod nga ang kada manugbantala nagadumala sing kapin sa tatlo ka pagtuon sa Biblia, nagsulat: “Bangod simple kag halos wala sing tublag ang pangabuhi sang kalabanan nga manugbantala, mas daku ang ila tion sa pagministeryo kag sa pagdumala sing pagtuon sa Biblia.”

14. Paano proteksionan sang Dios ang dakung kadam-an?

14 Nagsaad si Jehova nga buligan, proteksionan, kag luwason niya ang iya katawhan subong grupo. Himuon niya ini sa pisikal kag espirituwal, kag nagasalig kita sa iya.  (Sal. 37:28; 91:1-3) Ang kadam-an nga makalampuwas sa “dakung kapipit-an” tuman kadamo. (Bug. 7:9, 14) Gani, ina nga kadam-an indi mapapas subong grupo sa nabilin nga bahin sang katapusan nga mga adlaw. Amanan sila sang tanan nila nga kinahanglanon para mabatas ang mga pagtilaw kag maamligan ang ila kaangtanan kay Jehova. Sa katapusan nga bahin sang dakung kapipit-an, proteksionan man ni Jehova ang iya katawhan.

“TUDLOI AKO SANG IMO DALANON, O GINOO”

15, 16. Paano kita makabenepisyo sa pagsunod sa panuytoy sang Dios? Iilustrar.

15 Para makapabilin nga maisugon, kinahanglan naton ang padayon nga pagtudlo sang Dios. Maathag ini sa pangabay ni David: “Tudloi ako sang imo dalanon, O GINOO; kag tuytuyi ako sa banas nga matapan bangud sang akon mga kaaway.” (Sal. 27:11) Ginaaplikar naton ini nga pangamuyo kon ginapamatian naton sing maayo ang mga panuytoy nga nabase sa Biblia paagi sa organisasyon ni Jehova kag ginasunod ini gilayon. Madamo sa mga naglikaw sa indi kinahanglanon nga pagpangutang ang makapamatuod nga ang laygay sang Biblia nga pasimplehon ang kabuhi nakabulig sa ila sa krisis sa ekonomiya sining karon lang. Bangod sini, indi nila kinahanglan magbakabaka sing trabaho, gani mapasangkad nila ang ila ministeryo. Dapat pamangkuton sang kada isa ang iya kaugalingon, ‘Ginaaplikar ko bala dayon ang tanan nga nabasa ko sa Biblia kag sa publikasyon sang matutom kag mainandamon nga ulipon bisan pa nagakinahanglan ini sang pagsakripisyo?’—Mat. 24:45.

16 Kon magpatudlo kita kag magpatuytoy kay Jehova sa matarong nga dalan, wala kita sing kahadlukan. Sa Estados Unidos, ang isa ka regular payunir nag-aplay sa isa ka obra para makapadayon sa bug-os tion nga pag-alagad ang iya bilog nga pamilya. Pero ang iya superbisor nagsiling nga indi niya makuha ina nga posisyon kay wala sia nakatapos sa kolehiyo. Kon matabo ini sa imo, mahinulsol ka bala kay nagsulod ka sa bug-os tion nga pag-alagad kag wala nakatapos sa kolehiyo? Pagligad sang duha ka semana, ginpahalin ina nga superbisor. Dayon, may isa ka manedyer nga namangkot sa utod parte sa iya mga tulumuron. Ginpaathag niya dayon nga sia kag ang iya asawa mga bug-os tion nga mga ministro sang mga Saksi ni Jehova kag gusto nila nga magpadayon sa sini nga hilikuton. Antes pa makahambal liwat ang utod, nagsiling ang manedyer: “Nahibal-an ko nga pinasahi kamo! Sang nagatagumatayon ang akon amay, duha sa inyo masigkatumuluo ang nagakadto sa iya kag nagabasa sang Biblia kada adlaw. Nagpromisa ako nga kon may kahigayunan nga makabulig sa mga Saksi ni Jehova, buligan ko gid sila.” Pagkaaga, ginhatag sa utod ang obra nga wala ginhatag sang superbisor sa iya. Gani, kon unahon naton ang mga intereses sang Ginharian, tumanon ni Jehova ang iya pasalig nga indi gid kita mawad-an sang aton mga kinahanglanon.—Mat. 6:33.

IMPORTANTE ANG PAGTUO KAG PAGLAUM

17. Ano ang makabulig sa aton para maatubang ang palaabuton nga may pagsalig?

17 Ginpatalupangod dayon ni David nga kinahanglan ang pagtuo kag paglaum sa pagsiling: “Napunaw ako kuntani kon wala ako magtoo sa pagtan-aw sang pagkaayo sang GINOO sa duta sang mga buhi.” (Sal. 27:13) Ano na lang ang matabo sa aton kon wala ang paglaum nga ginhatag sang Dios kag kon wala naton mahangpan ang ginasiling sang Salmo 27? Gani, kabay nga padayon kita nga mangamuyo nga may pagsalig nga pabakuron kita kag luwason sang Dios samtang nagaatubang kita sang mga hitabo nga nagapadulong sa Armagedon.—Basaha ang Salmo 27:14.

[Mga Pamangkot sa Pagtinuon]

[Retrato sa pahina 23]

Napabakod si David sang ginhinumdom niya ang mga pagluwas ni Jehova

[Retrato sa pahina 25]

Ginakalitan bala naton ang kabudlayan sa ekonomiya para pasangkaron ang aton ministeryo?