Magdiretso sa kaundan

Magdiretso sa listahan sang kaundan

Ngaa Dapat Unahon ang Pag-alagad kay Jehova?

Ngaa Dapat Unahon ang Pag-alagad kay Jehova?

 Ngaa Dapat Unahon ang Pag-alagad kay Jehova?

“Ang akon baba magasugid sang imo pagkamatarung, sang imo kaluwasan sa bug-os nga adlaw.”—SAL. 71:15.

ANO ANG IMO SABAT?

Ano ang gin-una nanday Noe, Moises, Jeremias, kag Pablo?

Ano ang makabulig sa imo sa pagdesisyon kon ano ang himuon mo sa imo kabuhi?

Ngaa determinado ka nga unahon ang pag-alagad kay Jehova?

1, 2. (a) Ano ang ginapakita kon gindedikar sang isa ang iya kaugalingon kay Jehova? (b) Paano makabulig sa aton ang mga halimbawa nanday Noe, Moises, Jeremias, kag Pablo?

SANG nagdedikar ka kag nagpabawtismo subong sumulunod ni Jesus, naghimo ka sing pinakaimportante nga desisyon sa imo kabuhi. Daw pareho lang nga nagsiling ka kay Jehova: ‘Dios nga Jehova, luyag ko ikaw mangin Agalon sa bilog ko nga kabuhi. Ulipon mo ako. Tudlui ako kon ano ang dapat ko unahon kag kon paano ko gamiton ang akon tion, mga pagkabutang, kag ikasarang.’

2 Kon dedikado ka nga Cristiano, mahimo nga amo gid sini ang imo ginpromisa kay Jehova. Ginahatagan ka sing komendasyon kay amo ini ang husto kag maalamon nga desisyon. Apang karon nga si Jehova na ang imo Agalon, paano mo ginagamit ang imo tion? Para masabat ini, makabulig sa aton ang halimbawa nanday Noe, Moises, Jeremias, kag apostol Pablo. Sila tanan nag-alagad kay Jehova sing bug-os kalag. Pareho man sa ila ang aton kahimtangan. Ang ila mga desisyon nagapakita kon ano gid ang importante sa ila kabuhi kag nagapalig-on sa aton nga usisaon kon paano naton ginagamit ang aton tion.—Mat. 28:19, 20; 2 Tim. 3:1.

ANTES SANG ANAW

3. Paano ang aton panahon kaanggid sa mga adlaw ni Noe?

3 Ginpaanggid ni Jesus ang aton panahon sa mga adlaw ni Noe. Nagsiling sia: “Subong sang mga adlaw ni Noe, amo man ang presensia sang Anak sang tawo.” Ang mga tawo “nagakaon kag nagainom, ang mga lalaki nagapangasawa kag ang mga babayi nagapamana, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nag-anod sa ila tanan.” (Mat. 24:37-39) Kalabanan sang  mga tawo subong masako sa ila pagkabuhi kag ginabalewala nila ang pagkahilingagawon sang tion. Wala nila ginasapak ang mga paandam sang mga alagad sang Dios. Pareho sang mga adlaw ni Noe, madamo subong ang wala nagapati nga magapasilabot ang Dios sa ginahimo sang tawo. (2 Ped. 3:3-7) Bisan pa sini, paano gingamit ni Noe ang iya tion?

4. Paano gingamit ni Noe ang iya tion sang makabaton sia sing asaynment halin kay Jehova, kag ngaa?

4 Ginsugiran sang Dios si Noe nga laglagon Niya ang mga malauton kag ginhatagan sia sing asaynment. Gani nagtukod si Noe sing arka para maluwas ang mga tawo kag mga sapat. (Gen. 6:13, 14, 22) Ginpaandaman man niya ang mga tawo. Gintawag sia ni apostol Pedro subong “manugbantala sang pagkamatarong,” nga nagapakita nga gintinguhaan ni Noe nga ipahangop sa iban kon daw ano ka serioso ang ila sitwasyon. (Basaha ang 2 Pedro 2:5.) Sa banta mo, maalamon bala para kay Noe kag sa iya pamilya nga unahon ang pagnegosyo, komportable nga pagkabuhi, ukon pagtinguha nga labawan ang iban? Siempre indi! Bangod nahibaluan nila nga may nagapakari nga kalaglagan, ginlikawan nila ini nga mga tublag.

ANG GINPILI SANG PRINSIPE SANG EGIPTO

5, 6. (a) Ngaa gintudluan si Moises sang “tanan nga kaalam sang mga Egiptohanon”? (b) Ngaa wala ginbaton ni Moises ang mga butang nga gintanyag sa iya sa Egipto?

5 Binagbinagon naton karon ang halimbawa ni Moises. Ginpadaku sia sa palasyo sa Egipto bilang gin-adoptar nga bata sang anak nga babayi sang Paraon. Sang lamharon pa sia, gintudluan sia sang “tanan nga kaalam sang mga Egiptohanon.” (Binu. 7:22; Ex. 2:9, 10) Mahimo nga gintudlo ini sa iya para ihanda sia nga magtrabaho sa palasyo ni Paraon. Mahimo sia kuntani mangin prominente sa pinakagamhanan nga gobierno sadto, diin mabaton niya ang kahamungayaan, kadungganan, kag kasulhayan. Pero importante bala kay Moises ini nga mga butang?

6 Bangod ginhanas sia sang iya matuod nga mga ginikanan sang bata pa sia, mahimo nga nahibaluan ni Moises ang ginsaad ni Jehova sa iya mga katigulangan nga sanday Abraham, Isaac, kag Jacob. Nagtuo si Moises sa sini nga mga saad. Mahimo nga ginpamensaran niya sing maayo ang iya palaabuton kag kon paano sia mangin matutom kay Jehova. Gani sang tion nga madesisyon na sia kon bala mangin prinsipe sia sang Egipto ukon mangin ulipon nga Israelinhon, ano ang iya ginpili? Ginpili ni Moises “nga pintasan upod sa katawhan sang Dios sa baylo nga maagom ang umalagi nga pagpangalipay sa sala.” (Basaha ang Hebreo 11:24-26.) Sang ulihi, ginsunod niya ang panuytoy ni Jehova kon paano niya gamiton ang iya kabuhi. (Ex. 3:2, 6-10) Ngaa ginhimo ini ni Moises? Bangod nagapati sia sa mga saad sang Dios. Narealisar niya nga wala sia sing maayo nga palaabuton sa  Egipto. Matuod gid ini kay sang ulihi nagpadala ang Dios sa Egipto sang napulo ka kalalat-an. Ang tanan nga dedikado nga alagad ni Jehova karon makatuon sa halimbawa ni Moises. Sa baylo nga unahon ang kalibutan kag ang mga kasulhayan sa sini, dapat naton unahon si Jehova kag ang pag-alagad sa iya.

NAHIBALUAN NI JEREMIAS ANG MAHANABO

7. Ngaa pareho sa aton ang kahimtangan ni Jeremias?

7 Gin-una man ni manalagna Jeremias ang pag-alagad kay Jehova. Subong iya manalagna, ginsugo ni Jehova si Jeremias nga ibantala ang mensahe sang paghukom sa apostata nga Jerusalem kag Juda. Gani, daw pareho man nga nagkabuhi si Jeremias “sa olihing mga adlaw.” (Jer. 23:19, 20) Kumbinsido sia nga indi na magdugay ang sistema nga iya ginapuy-an.

8, 9. (a) Ngaa dapat tadlungon ang panghunahuna ni Baruc? (b) Ano ang dapat naton dumdumon kon nagahimo sing mga plano?

8 Gani ano ang ginlikawan ni Jeremias? Wala niya ginhandum ang mga butang sa sinang sistema nga malapit na laglagon. Kabuangan gid kon unahon niya ini. Pero may tion nga amo sini ang ginhandum sang iya sekretaryo nga si Baruc. Gani paagi kay Jeremias, ginsilingan sang Dios si Baruc: “Yari karon, ang akon ginpatindug gub-on ko, kag ang akon gintanum gabuton ko—nga amo, ang bug-os nga duta. Kag nagapangita ka bala sing mga butang nga dalagku tungud sa imo kaugalingon? Dili sila pagpangitaa; kay, yari karon, magadala ako sing malaut sa tanan nga unud, . . . apang ang imo kabuhi ihatag ko sa imo nga inagaw sa tanan nga duug diin ka nagakadto.”—Jer. 45:4, 5.

9 Wala naton mahibaluan kon ano ang “mga butang nga dalagku” nga ginhandum ni Baruc. * Pero nahibaluan naton nga yadto nga mga butang wala nagdugay. Nadula yadto sang ginsalakay sang mga Babilonianhon ang Jerusalem sang 607 B.C.E. Ano ang matun-an naton sa sini? Sa karon, nagaplano man kita para matigayon ang aton mga kinahanglanon. (Hulu. 6:6-11) Pero maalamon bala nga maghinguyang sang daku nga tion kag kusog sa mga butang nga indi permanente? Matuod, ang organisasyon ni Jehova padayon nga nagaplano sa pagtukod sang mga Kingdom Hall, pasilidad sang sanga, kag iban pa nga proyekto. Pero ini nga mga plano may kapuslanan bangod nagasuporta ini sa mga intereses sang Ginharian. Dapat man ipakita sang isa ka dedikado nga alagad ni Jehova nga ginauna niya ang Ginharian kon nagahimo sia sing mga plano. ‘Ginapangita mo gid bala anay ang ginharian kag ang pagkamatarong ni Jehova’?—Mat. 6:33.

“GINAKABIG KO INI NGA MGA BASURA”

10, 11. (a) Ano ang importante kay Pablo antes sia nangin Cristiano? (b) Ngaa nagbag-o ang prioridad ni Pablo?

10 Binagbinagon naton karon ang halimbawa ni Pablo. Antes sia nangin Cristiano, nagahunahuna ang tanan nga may maayo sia nga palaabuton. Nagtuon sia sang kasuguan sang mga Judiyo sa isa sa pinakabantog nga mga manunudlo sang iya panahon. Ginhatagan sia sing awtoridad sang mataas nga saserdote sang mga Judiyo. Kag nangin madinalag-on pa gid sia sa Judaismo sangsa iban niya nga kaupdanan. (Binu. 9:1, 2; 22:3; 26:10; Gal. 1:13, 14) Pero nagbag-o ini tanan sang narealisar ni Pablo nga ginsikway na ni Jehova ang mga Judiyo bilang isa ka pungsod.

11 Nahibaluan ni Pablo nga sa pagtamod ni Jehova wala sing pulos ang iya kabuhi sa  Judiyo nga sistema. (Mat. 24:2) Nahangpan sining Fariseo sang una ang mga katuyuan sang Dios, kag nahibaluan niya nga daku gid nga kadungganan ang Cristiano nga ministeryo. Nagsiling pa gani sia nga ang mga butang nga ginkabig niya sadto nga importante, “mga basura” na subong. Ginbiyaan ni Pablo ang Judaismo kag gindedikar ang nabilin niya nga kabuhi sa duta sa pagbantala sang maayong balita.—Basaha ang Filipos 3:4-8, 15; Binu. 9:15.

USISAA ANG IMO MGA PRIORIDAD

12. Ano ang prioridad ni Jesus sa tapos sia mabawtismuhan?

12 Gingamit nanday Noe, Moises, Jeremias, Pablo, kag iban pa ang ila daku nga tion kag kusog sa pag-alagad kay Jehova. Maayo gid sila nga halimbawa. Siempre, ang pinakamaayo nga halimbawa sa tanan nga alagad ni Jehova amo si Jesus. (1 Ped. 2:21) Sa tapos sia mabawtismuhan, gingamit niya ang iya nabilin nga kabuhi sa duta sa pagbantala sang maayong balita kag pagpadungog kay Jehova. Gani ang pag-alagad kay Jehova amo ang prioridad sang isa ka Cristiano nga nagakilala sa Iya subong Agalon. Ikaw man bala? Paano mo maalagad sing labi pa si Jehova samtang ginahimo mo ang iban nga responsibilidad?—Basaha ang Salmo 71:15; 145:2.

13, 14. (a) Ano ang ginapalig-on nga binagbinagon sang tanan nga Cristiano? (b) Ano nga kalipay ang mahimo mabatyagan sang mga alagad sang Dios?

13 Sa sulod sang mga tinuig, ginapalig-on pirme sang organisasyon ni Jehova ang mga Cristiano nga binagbinagon ang pagpayunir. Pero bangod sa pila ka sirkunstansia, ang iban nga Cristiano indi makahinguyang sing 70 ka oras kada bulan sa pagbantala. Indi sila dapat maluyahan sa sini. (1 Tim. 5:8) Pero kamusta sa imo bahin? Indi ka gid bala makapayunir?

14 Hunahunaa ang kalipay sang madamo nga alagad sang Dios sang panahon sang Memoryal sini nga tuig. Sang Marso, may pinasahi nga kahimusan para sa mga auxiliary payunir, diin makahinguyang sila sing 30 ukon 50 ka oras sa pagministeryo. (Sal. 110:3) Minilyon ang nakigbahin, kag nalipay gid sa sini ang mga kongregasyon. Ma-adjust mo bala ang imo iskedyul para mabatyagan mo pirme ini nga kalipay? Kon magpayunir ang isa ka Cristiano, mabatyagan niya ang kalipay sa iya ginhimo sa bilog nga adlaw, amo nga makasiling sia: “Amay nga Jehova, nahimo ko ang akon masarangan sa pag-alagad sa imo.”

15. Ano dapat ang pagtamod sang Cristiano nga mga pamatan-on sa sekular nga edukasyon?

15 Kon manuggradweyt ka na, may maayo nga panglawas, kag diutay ang responsibilidad, nabinagbinag mo na bala sing maayo ang pagregular payunir? Mahimo nga ginsilingan ka sang imo mga manunudlo nga magkuha sing mataas nga edukasyon agod mangin maayo ang imo palaabuton. Apang ang ila ginasaligan amo ang kuarta kag mga organisasyon sang tawo nga madula sa ulihi. Pero kon unahon mo ang pag-alagad kay Jehova, nagahimo ka sing mapuslanon nga hilikuton nga makahatag sa imo sing maayo nga palaabuton. Luwas sini, ginasunod mo ang perpekto nga halimbawa ni Jesus. Ini nga desisyon makapahalipay kag makaamlig sa imo. Ginapakita man sini nga determinado ka nga tumanon ang imo dedikasyon kay Jehova.—Mat. 6:19-21; 1 Tim. 6:9-12.

16, 17. Ano ang dapat ipamangkot sang tagsa ka Cristiano sa ila kaugalingon?

16 Madamo nga alagad sang Dios subong ang nagatrabaho sing malawig para maaman ang mga kinahanglanon sang ila pamilya. Kag ang iban mahimo nga naga-overtime pa. (1 Tim. 6:8) Ginapapati kita sang  kalibutan nga dapat gid naton baklon ang madamo nga produkto kag ang mga uso para mabuhi. Pero indi luyag sang matuod nga mga Cristiano nga diktahan sila sang kalibutan ni Satanas. (1 Juan 2:15-17) Para naman sa mga nagretiro na sa ila trabaho, mas maayo kon gamiton nila ang ila tion sa pagpayunir, nga ginauna ang pag-alagad kay Jehova.

17 Maayo nga pamangkuton sang tanan nga alagad ni Jehova ang ila kaugalingon: Ano gid bala ang pinakaimportante sa akon kabuhi? Ginauna ko bala ang Ginharian? Ginailog ko bala ang pagkamasinakripisyuhon ni Jesus? Ginatuman ko bala ang laygay ni Jesus nga padayon sia nga sundon? Ma-adjust ko bala ang akon iskedyul para madugangan ko ang akon tion sa pagbantala ukon sa iban pa nga hilikuton sa pag-alagad? Bisan wala pa ginatugot sang akon kahimtangan nga mapasangkad ang akon pag-alagad, padayon ko bala nga ginapakita ang pagkamasinakripisyuhon?

“MAGBUOT KAMO KAG MANGHIKOT”

18, 19. Ano ang dapat mo ipangamuyo, kag ngaa makapahamuot ina kay Jehova?

18 Makalilipay gid ang kakugi sang mga alagad sang Dios. Pero may iban, nga bisan ginatugot sang ila kahimtangan, indi interesado sa pagpayunir ukon nagabatyag nga indi kalipikado. (Ex. 4:10; Jer. 1:6) Kon amo sina ang imo ginabatyag, mangamuyo kay Jehova. Ginsilingan ni Pablo ang iya mga masigkatumuluo nga si Jehova, “tungod sa iya nahamut-an nagapanghikot sa sulod ninyo agod magbuot kamo kag manghikot.” (Fil. 2:13) Gani kon daw wala ka sing interes nga pasangkaron ang imo ministeryo, pangabaya si Jehova nga hatagan ka sing handum kag ikasarang sa paghimo sini.—2 Ped. 3:9, 11.

19 Sanday Noe, Moises, Jeremias, Pablo, kag Jesus mga matutom nga tawo. Gingamit nila ang ila tion kag kusog para ipahayag ang paandam ni Jehova. Wala sila nagpatublag. Malapit na gid ang katapusan sining sistema sang mga butang. Gani subong dedikado nga mga alagad sang Dios, dapat gid naton tinguhaan nga sundon ining maayo nga mga halimbawa. (Mat. 24:42; 2 Tim. 2:15) Kon himuon naton ini, mapahamut-an naton si Jehova kag matigayon naton ang iya bugana nga mga pagpakamaayo.—Basaha ang Malaquias 3:10.

[Nota]

^ par. 9 Tan-awa Ang Mensahe sang Dios sa Aton Paagi kay Jeremias, pahina 104-106.

[Mga Pamangkot sa Pagtinuon]

[Retrato sa pahina 21]

Ang mga tawo wala nagpamati sa paandam ni Noe

[Retrato sa pahina 24]

Nabinagbinag mo na bala sing maayo ang pagregular payunir?