Magdiretso sa kaundan

Magdiretso sa listahan sang kaundan

Ang Kaayo Makapahumok sang Balatyagon

Ang Kaayo Makapahumok sang Balatyagon

 Ang Kaayo Makapahumok sang Balatyagon

ANG isa ka tigulang nga babayi nagsinuplada sang gin-istorya sia sang duha ka Saksi sa Netherlands, nga sanday George kag Manon, parte sa maayong balita sang Ginharian. Nabal-an nila nga duha ka beses sia nga napatyan sing bana kag napatay man ang iya anak nga lalaki. May malala man sia nga arthritis. Sa ila paghambalanay, daw nagbuot sia pero indi gid mainabyanon.

Pero ginsilingan ni George si Manon nga balikan nila ang tigulang kag dalhan sing isa ka pungpong nga bulak kay daw kasubo gid sa iya kag buringot. Sang nagbalik sila, nakibot gid ang tigulang nga si Rie. Apang alang-alang gid sia sadto, gani ginkasugtan nila nga mabalik na lang sa iban nga adlaw. Pagbalik nanday George kag Manon sa petsa nga ila ginkasugtan, wala sing tawo ang balay. Bisan pa pirme nila sia ginabalikan, wala gid nila sia makita. Amo nga nagpensar sila nga basi ginalikawan sila sang tigulang.

Isa ka bes, naabtan gid man ni George ang tigulang sa iya balay. Nangayo ini sing pasaylo kay wala sia sa ila ginkasugtan nga adlaw bangod didto sia sa ospital. “Pero abi n’yo kon ano ang ginhimo ko paghalin ninyo?” siling niya. “Ginbasa ko ang Biblia!” Maayo ang ila paghambalanay kag nasugdan ang pagtuon sa Biblia.

Samtang nagatuon si Rie sa Biblia, nangin malipayon na sia kag mabuot. Bisan pa indi na sia makahalin sa iya balay, ginasugid niya ang iya bag-o nga pagpati sa mga nagabisita sa iya. Indi sia pirme makatambong sa mga miting bangod sa iya panglawas, pero nalipay sia kon ginaduaw sia sang mga kauturan. Sang adlaw nga nag-82 anyos sia, nagtambong sia sa sirkito nga asembleya kag nagpabawtismo bilang simbulo sang iya dedikasyon sa Dios.

Pila ka bulan sang ulihi, napatay si Rie. Pero may nasapwan nga binalaybay nga iya ginsulat. Sa sini, ginlaragway niya ang kabudlayan kag kasubo sang pagtigulang kag ginpadaku niya nga importante gid ang pagpakita sing kaayo. “Natandog gid ako sa iya binalaybay,” siling ni Manon, “kag nalipay gid ako kay ginbuligan kami ni Jehova nga magpakita sing kaayo sa iya.”

Huo, ang halimbawa ni Jehova nagapahulag sa aton nga magpakita sing gugma kag kaayo. (Efe. 5:1, 2) Mangin mabungahon ang aton ministeryo samtang ‘ginarekomendar naton ang aton kaugalingon subong mga ministro sang Dios, paagi sa kaayo.’—2 Cor. 6:4, 6.