Magdiretso sa kaundan

Magdiretso sa listahan sang kaundan

 Sugilanon sang Kabuhi

Nangin Suod Ako sa mga May Edad

Nangin Suod Ako sa mga May Edad

PANUGIRON NI ELVA GJERDE

Sang nagligad nga mga 70 ka tuig, may nagbisita sa amon balay kag may ginsugid sia kay Tatay nga nagpabag-o sang akon kabuhi. Sugod sadto, madamo na ang nakaimpluwensia sa akon kabuhi. Natigayon ko ang isa ka hamili nga pag-abyanay nga ginpabaloran ko gid sangsa bisan ano. Ipaathag ko kon ngaa.

NATAWO ako sa Sydney, Australia, sang 1932. Ang akon mga ginikanan nagapati sa Dios pero wala sila nagasimba. Ginsilingan ako ni Nanay nga nagatan-aw pirme ang Dios kag silutan niya ako kon magpasaway. Gani, nahadlok gid ako sa Dios. Pero interesado ako sa Biblia. Kon magbisita ang akon tiya kon Sabado kag Domingo, ginaistoryahan niya ako sang mga sugilanon sa Biblia. Nalipay gid ako kon magduaw sia.

Sang tin-edyer ako, nakabaton si Nanay sang mga libro halin sa may edad nga babayi nga Saksi ni Jehova. Ginabasa ini ni Tatay kag nanamian gid sia, amo nga nagpasugot sia nga magtuon sa Biblia upod sa mga Saksi. Isa ka gab-i, samtang nagatuon sila sa Biblia, nadakpan ako ni Tatay nga nagapanilag. Pasudlon na tani niya ako sa kuarto apang nagsiling ang bisita, “Ano abi kon paupdon ta na lang si Elva sa aton pagtuon?” Didto nag-umpisa ang pagbag-o sang akon kabuhi kag ang akon pagpakig-abyan sa matuod nga Dios nga si Jehova.

Wala madugay, nagatambong na kami ni Tatay sa Cristiano nga mga miting. Ginbag-o man ni Tatay ang iya kabuhi bangod sa iya mga natun-an. Ginakontrol na niya ang iya kaakig. Bangod sini, nagtambong man sa miting si Nanay kag ang akon magulang nga si Frank. * Nag-uswag kami nga apat kag nabawtismuhan subong mga Saksi ni Jehova. Sugod sadto, madamo nga may edad ang nangin abyan ko kag nakabulig sila sa lainlain nga tion sang akon kabuhi.

PAGPILI SING KARERA

Tin-edyer pa lang ako, suod na ako sa mga may edad sa amon kongregasyon. Ang isa sa ila amo si Alice Place, nga una nga nagpanaksi sa amon pamilya. Daw lola ko na sia. Ginhanas niya ako sa pagbantala kag ginpalig-on nga magpabawtismo. Gani sa edad nga 15, nagpabawtismo ako.

Nangin suod man ako sa may edad nga mag-asawa nga sanday Percy kag Madge [Margaret] Dunham. Ang akon pagpakig-upod sa ila may daku nga epekto sa akon sa ulihi. Nanamian gid ako sa mathematics, kag gusto ko magtudlo sing math. Sanday Percy kag Madge nangin mga misyonero sa Latvia sang katuigan 1930. Sang nagsugod  ang Bug-os Kalibutan nga Inaway II sa Europa, gin-agda sila nga mag-alagad sa Bethel sa Sydney, Australia. Sanday Percy kag Madge nagpakita gid sing interes sa akon. Ginasugid nila sa akon ang ila makalilipay nga mga eksperiensia sa pagmisyonero. Didto ko narealisar nga ang pagtudlo sa Biblia mas makalilipay sangsa pagtudlo sing mathematics. Gani nagdesisyon ako nga mangin misyonero.

Ginpalig-on ako sini nga mag-asawa nga magpayunir anay. Gani sang 1948, sa edad nga 16, nagpayunir ako upod sa napulo ka pamatan-on nga payunir sa amon kongregasyon sa Hurstville, Sydney.

Pagkasunod nga apat ka tuig, nagpayunir ako sa apat ka banwa sa New South Wales kag Queensland. Ang isa sang akon una nga mga estudyante sa Biblia amo si Betty Law (Remnant na subong). Mapinalanggaon si Betty, kag duha ka tuig ang iya kamagulangan sa akon. Sang ulihi, nagpayunir kami sa banwa sang Cowra, nga mga 230 kilometros sa katundan sang Sydney. Bisan pa malip-ot lang ang amon pag-updanay ni Betty, asta subong mag-abyan gihapon kami.

Sang gin-asayn ako subong espesyal payunir, nagsaylo ako sa banwa sang Narrandera, nga 220 kilometros sa bagatnan-katundan sang Cowra. Ang bag-o ko nga partner amo si Joy Lennox (Hunter na subong), isa ka mapisan nga payunir nga duha ka tuig man ang kamagulangan sa akon. Kami lang ang Saksi sa sina nga banwa. Nagdayon kami ni Joy sa isa ka kuarto sang maabiabihon nga mag-asawa nga sanday Ray kag Esther Irons. Interesado sila sa kamatuoran, pati na ang ila bata nga lalaki kag tatlo ka bata nga babayi. Si Ray kag ang iya bata nga lalaki nagasagod sang karnero kag nagatanom sang trigo sa gua sang banwa, samtang si Esther kag ang iya mga bata nga babayi nagapalakat sang isa ka boarding house. Kon Domingo, nagaluto kami ni Joy sing palanyapunon sini nga pamilya kag sang ila mga boarder, nga mga trabahador sang riles. Ini nga serbisyo ginabuhin sa amon arkila. Pagkatapos namon panghimos, nagatuon kami sa Lalantawan upod sa bilog nga pamilya. Sanday Ray, Esther, kag ang ila apat ka kabataan nagbaton sing kamatuoran kag nangin una nga mga miembro sang Kongregasyon sang Narrandera.

Sang 1951, nagtambong ako sa kombension sang mga Saksi ni Jehova sa Sydney. Gintambungan ko man didto ang pinasahi nga miting para sa mga payunir nga interesado magmisyonero. Ginhiwat ini sa isa ka daku nga tolda kag sobra 300 ang nagtambong. Si Nathan Knorr, halin sa Bethel sa Brooklyn, ang nagpamulongpulong kag ginpaathag niya nga ang maayong balita kinahanglan nga ibantala sa bug-os nga duta. Interesado gid kami sa tanan niya nga ginhambal. Madamo nga payunir nga nagtambong ang nagbantala sang ulihi sa South Pacific kag iban pa nga lugar. Makalilipay gid kay 1 ako sa 17 ka taga-Australia nga gin-agda sa ika-19 nga klase sang Gilead sang 1952. Bisan 20 anyos pa lang ako, nagakatuman na ang akon handum nga mangin misyonero!

MGA KINAHANGLAN BAG-UHON

Ang pag-eskwela ko sa Gilead wala lamang nagpadugang sang akon ihibalo sa Biblia kag nagpabakod sang akon pagtuo kundi may daku man nga epekto sa akon personalidad. Bata pa ako sadto kag daw perpeksionista. Kon kaisa, tuman sa akon ka estrikta. Halimbawa, nakibot gid ako sang nakita ko si Brother Knorr nga nagahampang upod sa lamharon nga mga Bethelite.

Mahimo nakita ini sang akon mga instruktor sa Gilead, nga mahinantupon kag eksperiensiado nga mga lalaki. Nagpakita sila sing interes sa  akon kag ginbuligan nila ako nga bag-uhon ang akon panghunahuna. Amat-amat ko nga naintiendihan nga si Jehova mahigugmaon kag mainapresyahon nga Dios, indi estrikto ukon mabudlay pahamut-an. Ginbuligan man ako sang pila ko ka klasmeyt. Nadumduman ko pa nga ang isa sa ila nagsiling: “Elva, si Jehova wala nagapanglatigo. Indi pag-estriktuhi ang imo kaugalingon!” Natandog gid ako sa iya prangka nga ginhambal.

Pagkagradweyt sa Gilead, lima kami nga gin-asayn sa Namibia, Aprika. Sang ulihi, nagadumala na kami sing 80 ka pagtuon sa Biblia. Nanamian ako sa Namibia kag sa pagmisyonero, pero nobyo ko na ang isa ko ka klasmeyt sa Gilead nga gin-asayn sa Switzerland. Pagligad sang isa ka tuig, nagsaylo ako didto. Pagkatapos sang amon kasal, gin-updan ko ang akon bana subong manugtatap sang sirkito.

PAG-ATUBANG SA KABUDLAYAN

Pagligad sang lima ka tuig nga pag-alagad sa sirkito, gin-agda kami sa Bethel sa Switzerland. Didto, nalipay gid ako nga makaupod ang hamtong nga mga kauturan.

Sang ulihi, naglalain gid ako sang nadiskobrehan ko nga nagluib ang akon bana sa akon kag kay Jehova. Sang ginbiyaan niya ako, daw indi ako kabalo sang akon himuon! Ang gugma kag suporta sang may edad ko nga mga abyan sa Bethel nakabulig sa akon nga maatubang ini nga sitwasyon. Ginapamatian nila ako kon gusto ko mag-istorya kag ginahatagan sing tion nga makapahuway. Ang ila lugpay kag pagkamainayuhon nagbulig sa akon nga atubangon ang grabe nga kasakit kag mangin suod pa gid kay Jehova.

Nadumduman ko man ang ginsiling anay sang mga may edad nga nag-atubang man sing mga kabudlayan. Halimbawa, ginsilingan ako anay ni Madge Dunham: “Elva, sa imo pag-alagad kay Jehova, magaatubang ka sing madamo nga pagtilaw, apang ang pinakamabudlay sa sini mahimo maghalin sa mga suod sa imo. Sina nga tion, magdangop ka kay Jehova. Dumduma nga sia ang ginaalagad mo, indi ang mga tawo!” Ang laygay ni Madge nagbulig sa akon nga mabatas ang madamo nga kabudlayan. Determinado ako nga indi pagtugutan ang ginhimo sang akon bana nga magpahilayo sa akon kay Jehova.

Sang ulihi, nagbalik ako sa Australia agod makapayunir malapit sa akon pamilya. Sang nagabiyahe ako pauli, naistorya ko parte sa Biblia ang isa ka grupo sang mga pasahero sa barko. Ang isa sa ila amo ang hipuson nga lalaki nga taga-Norway nga si Arne Gjerde. Nanamian sia sa iya nabatian. Sang ulihi, ginduaw ako ni Arne kag ang akon pamilya sa Sydney. Madasig sia nga nag-uswag sa espirituwal kag nabawtismuhan. Sang 1963, nagpakasal kami ni Arne. Duha ka tuig sang ulihi, ginbata ko ang amon anak nga lalaki nga si Gary.

PAG-ATUBANG SANG ISA PA KA KABUDLAYAN

Malipayon kami nga tatlo subong pamilya. Sang ulihi, ginpadakuan ni Arne ang amon balay para maatipan ang tigulang ko nga mga ginikanan. Apang pagligad sang anom ka tuig, natukiban nga may kanser sa utok si Arne. Daw tinakluban kami sang langit. Adlaw-adlaw ko sia nga ginakadtuan sa ospital kay madugay sia nga nagtener didto samtang ginabulong. Nag-ayoayo man sia, apang sang ulihi naglala naman sia kag naistrok.  Ginsilingan ako nga sinemana na lang ang iya kabuhi. Apang nakalampuwas si Arne. Nakapauli sia sa balay kag didto ko sia gin-atipan. Sang ulihi, nakalakat na sia liwat kag natatap na niya ang iya hilikuton subong gulang. Bangod masinadyahon sia kag palalahog, madasig sia nga nag-ayo kag mahapos ko sia nga naatipan.

Sang 1986, naglala naman ang balatian ni Arne. Sadto nga tion, napatay na ang akon mga ginikanan gani nagsaylo kami malapit sa amon mga abyan sa matahom nga Blue Mountains sa gua sang Sydney. Sang ulihi, ginpangasawa ni Gary ang matahom kag espirituwal nga utod nga si Karin. Nagsiling sila nga maupdanay kami nga apat sa isa ka balay. Pagligad sang pila ka bulan, nagsaylo kami sa isa ka balay nga mga pila lang ka kanto sa ginaistaran anay namon ni Arne.

Sa nabilin nga 18 ka bulan sang kabuhi ni Arne, nagahigda na lang sia kag kinahanglan gid atipanon. Bangod ara lang ako pirme sa balay, ginatun-an ko ang Biblia kag ang aton mga publikasyon sing duha ka oras kada adlaw. Madamo ako sing natun-an nga laygay sa pag-atubang sang akon sitwasyon. Ginaduaw man kami sang mga may edad sa amon kongregasyon, nga ang iban sa ila nagbatas man sini nga mga kabudlayan. Nagpalig-on gid ini sa akon! Napatay si Arne sang Abril 2003, nga nagalaum sa pagkabanhaw.

ANG AKON DAKU NGA BULIG

Sang bata pa ako, gusto ko mangin perpekto ang tanan. Pero natun-an ko nga ang kabuhi tuhay gid pirme sa aton ginapaabot. Nakatigayon ako sang madamo nga pagpakamaayo kag naagyan ko man ang duha ka masakit nga hitabo. Una, ginluiban ako kag ginbiyaan sang akon bana. Ikaduha, napatyan ako sing bana. Sa sini nga mga tion, nabuligan ako kag napaumpawan sa lainlain nga paagi. Apang, ang akon pinakadaku nga bulig naghalin sa “dumaan sang mga adlaw,” si Jehova nga Dios. (Dan. 7:9) Ang iya laygay nagbag-o sang akon personalidad, gani naeksperiensiahan ko ang kalipay sa pagmisyonero. Kon may problema, ‘ang malig-on nga paghigugma ni Jehova nagapatindug sa akon kag ang iya mga paglipay nagapasadya sang akon kalag.’ (Sal. 94:18, 19) Nalipay man ako sa bulig kag pagpalangga sang akon pamilya pati na ‘sang mga abyan nga natawo tungud sa kapiotan.’ (Hulu. 17:17) Madamo sa ila ang mga may edad na.

Nagsiling si Job: “Sa mga tawo nga tigulang yara ang kaalam, kag sa kalawigon sang mga adlaw ang paghangup.” (Job 12:12) Base sa akon mga inagihan, makasiling ako nga matuod gid ini. Ang laygay sang maalam nga mga tigulang nakabulig sa akon, ang ila mga paumpaw nagsakdag sa akon, kag ang ila pagpakig-abyan nagpauswag sang akon kabuhi. Nagapasalamat ako nga nangin suod ako sa ila.

Karon 80 anyos na ako. Bangod sa akon eksperiensia, nahibaluan ko ang kinahanglanon sang mga may edad. Ginaduaw ko sila pirme kag ginabuligan. Pero nalipay man ako makig-upod sa mga pamatan-on. Makapalig-on ang ila kusog kag makalalaton ang ila kapagsik. Kon ang mga pamatan-on nagapangabay sa akon sing laygay ukon suporta, nalipay gid ako magbulig sa ila.

[Nota]

^ par. 7 Ang magulang ni Elva nga si Frank Lambert nangin makugi nga payunir sang ulihi sa nabaw-ing nga lugar sang Australia. Mabasa sa 1983 Yearbook of Jehovah’s Witnesses, pahina 110-112, ang isa sa iya makalilipay nga mga eksperiensia.

[Retrato sa pahina 14]

Nagapayunir upod kay Joy Lennox sa Narrandera

[Retrato sa pahina 15]

Si Elva upod sa pamilya Bethel sang Switzerland sang 1960

[Retrato sa pahina 16]

Pag-atipan kay Arne sang nagamasakit sia